Oqý-aǵartý ministri Ǵani Beisembaev elimizdiń aýyldaryndaǵy mektepterge qatysty suraqqa jaýap berdi, dep habarlaidy Dalanews.kz.
Ministrdiń aitýynsha, qazirgi ýaqytta eldegi aýyl mektepteriniń sany 5 myńnan asady, olardyń ishinde shaǵyn jinaqty mektepter – 2700. Buǵan qosa, az oqýshysy bar kiriktirilgen synyptardan turatyn mektepter sany myńǵa jýyqtaidy. Bul bilim berý mekemeleri negizinen shalǵai aýyldarda, sonyń ishinde shekara mańyndaǵy aimaqtarda ornalasqan.
“Bizdiń basty mindetimiz – shekara mańyndaǵy mektepterdiń jumysyn toqtatpaý. Bul baǵyttaǵy naqty ustanymymyzdy ákimdikterge jetkizdik,” – dedi ministr Úkimettiń baspasóz ortalyǵynda ótken brifingte.
Sondai-aq Beisembaev jabylýy yqtimal mektepter boiynsha arnaiy esep júrgizilip jatqanyn atap ótti.
Aita keteiik, buǵan deiin ministr elimizdiń aýyldyq jerlerindegi bilim berý mekemeleriniń sany týraly málimet usynǵan bolatyn.
Sonymen qatar oqý-aǵartý ministrligi mektepterde tamaqtandyrý qyzmetterin uiymdastyrý kezinde ónim berýshilerdi irikteý talaptaryn buzǵan sheneýnikterdi ákimshilik jaýapkershilikke tartý máselesin qarastyryp jatqanyn málimdegen edi. Bul týraly ministr Ǵani Beisembaev málim etti.
Qyrkúiek pen qazan ailarynda mektep ashanalarynyń sanitarlyq-epidemiologiialyq talaptarǵa sáikestigine monitoring júrgizilgen.
"Respýblikalyq tekserý nátijeleri mekteptegi tamaqtaný sapasyna jergilikti atqarýshy organdardyń baqylaýynyń áli de jetkiliksiz ekenin kórsetti. Bul zańnama talaptarynyń jii buzylýynan baiqalady. Monitoring barysynda 771 túrli buzýshylyq anyqtalǵanyn erekshe atap ótkim keledi", – dedi ministr Úkimet otyrysynda.
Ministrlik sonymen qatar jergilikti ákimdikterdiń mektepte tamaqtanýdy uiymdastyrý jumystaryna keshendi baǵalaý júrgizgen. Bul rette birneshe faktorlar eskerilgen:
- Tamaqtaný sapasyna qatysty monitoring nátijeleri;
- Ashanalardyń materialdyq-tehnikalyq bazasy;
- 1 oqýshyǵa shaqqandaǵy tamaqtaný quny;
- Ata-analar arasynda júrgizilgen saýalnamalardyń qorytyndylary.
