وقۋ-اعارتۋ ءمينيسترى عاني بەيسەمبايەۆ ەلىمىزدىڭ اۋىلدارىنداعى مەكتەپتەرگە قاتىستى سۇراققا جاۋاپ بەردى، دەپ حابارلايدى Dalanews.kz.
ءمينيستردىڭ ايتۋىنشا، قازىرگى ۋاقىتتا ەلدەگى اۋىل مەكتەپتەرىنىڭ سانى 5 مىڭنان اسادى، ولاردىڭ ىشىندە شاعىن جيناقتى مەكتەپتەر – 2700. بۇعان قوسا، از وقۋشىسى بار كىرىكتىرىلگەن سىنىپتاردان تۇراتىن مەكتەپتەر سانى مىڭعا جۋىقتايدى. بۇل ءبىلىم بەرۋ مەكەمەلەرى نەگىزىنەن شالعاي اۋىلداردا، سونىڭ ىشىندە شەكارا ماڭىنداعى ايماقتاردا ورنالاسقان.
“ءبىزدىڭ باستى مىندەتىمىز – شەكارا ماڭىنداعى مەكتەپتەردىڭ جۇمىسىن توقتاتپاۋ. بۇل باعىتتاعى ناقتى ۇستانىمىمىزدى اكىمدىكتەرگە جەتكىزدىك،” – دەدى مينيستر ۇكىمەتتىڭ باسپا ءسوز ورتالىعىندا وتكەن بريفينگتە.
سونداي-اق بەيسەمبايەۆ جابىلۋى ىقتيمال مەكتەپتەر بويىنشا ارنايى ەسەپ جۇرگىزىلىپ جاتقانىن اتاپ ءوتتى.
ايتا كەتەيىك، بۇعان دەيىن مينيستر ەلىمىزدىڭ اۋىلدىق جەرلەرىندەگى ءبىلىم بەرۋ مەكەمەلەرىنىڭ سانى تۋرالى مالىمەت ۇسىنعان بولاتىن.
سونىمەن قاتار وقۋ-اعارتۋ مينيسترلىگى مەكتەپتەردە تاماقتاندىرۋ قىزمەتتەرىن ۇيىمداستىرۋ كەزىندە ءونىم بەرۋشىلەردى ىرىكتەۋ تالاپتارىن بۇزعان شەنەۋنىكتەردى اكىمشىلىك جاۋاپكەرشىلىككە تارتۋ ماسەلەسىن قاراستىرىپ جاتقانىن مالىمدەگەن ەدى. بۇل تۋرالى مينيستر عاني بەيسەمبايەۆ ءمالىم ەتتى.
قىركۇيەك پەن قازان ايلارىندا مەكتەپ اسحانالارىنىڭ سانيتارلىق-ەپيدەميولوگيالىق تالاپتارعا سايكەستىگىنە مونيتورينگ جۇرگىزىلگەن.
"رەسپۋبليكالىق تەكسەرۋ ناتيجەلەرى مەكتەپتەگى تاماقتانۋ ساپاسىنا جەرگىلىكتى اتقارۋشى ورگانداردىڭ باقىلاۋىنىڭ ءالى دە جەتكىلىكسىز ەكەنىن كورسەتتى. بۇل زاڭناما تالاپتارىنىڭ ءجيى بۇزىلۋىنان بايقالادى. مونيتورينگ بارىسىندا 771 ءتۇرلى بۇزۋشىلىق انىقتالعانىن ەرەكشە اتاپ وتكىم كەلەدى"، – دەدى مينيستر ۇكىمەت وتىرىسىندا.
مينيسترلىك سونىمەن قاتار جەرگىلىكتى اكىمدىكتەردىڭ مەكتەپتە تاماقتانۋدى ۇيىمداستىرۋ جۇمىستارىنا كەشەندى باعالاۋ جۇرگىزگەن. بۇل رەتتە بىرنەشە فاكتورلار ەسكەرىلگەن:
- تاماقتانۋ ساپاسىنا قاتىستى مونيتورينگ ناتيجەلەرى؛
- اسحانالاردىڭ ماتەريالدىق-تەحنيكالىق بازاسى؛
- 1 وقۋشىعا شاققانداعى تاماقتانۋ قۇنى؛
- اتا-انالار اراسىندا جۇرگىزىلگەن ساۋالنامالاردىڭ قورىتىندىلارى.
