Sıfrlyq damý, ınovasıalar jáne aeroǵarysh ónerkásibiniń birinshi vıse-mınıstri Qanysh Tóleýshın Úkimet otyrysynda sıfrlandyrý zeınetaqyny rásimdeý rásimin qalaı jeńildete alatynyn aıtty, dep habarlaıdy Dalanews.kz.

Qanysh Tóleýshın elimizde zeınetaqyny elektrondyq formatta rásimdeý jobasynyń pılottyq rejımde iske asyrylyp jatqanyn jetkizdi.

"Buǵan deıin zeınetaqy taǵaıyndaý prosesi azamattardyń jeke qatysýyn talap etip, tólemderdi alý úshin birqatar qujattardy jınap, eńbek ótilin rastaý qajet bolatyn. Sonymen qatar, derekterdi qaǵaz júzinde óńdeý ýaqytty alyp, kezekter týdyratyn ári zeınetaqyny qolmen esepteý kezinde qatelikterge jol berý qaýpin arttyratyn. Búginde pılottyq rejımde túbegeıli jańa tásil engizildi. Jasy boıynsha skorıng negizinde júıe zeınetaqy isin avtomatty túrde qalyptastyrady, eńbek ótili týraly málimetterdi tekseredi jáne azamat tarapynan ótinish túspesten tólemderdi belsendi túrde taǵaıyndaıdy", – deıdi vıse-mınıstr.

Onyń aıtýynsha, mundaı tásil qyzmet kórsetý merzimin 10-nan 1 kúnge deıin qysqartýǵa, rásimdik qadamdar sanyn 6-dan 1-ge deıin azaıtýǵa jáne azamattar úshin prosesti aıtarlyqtaı jeńildetýge múmkindik beredi. Osyǵan baılanysty ol Eńbek jáne halyqty áleýmettik qorǵaý mınıstrligine jobany masshtabtaýdy qarastyrýdy usynady.