Premer-ministr Asqar Máminniń atap ótkenindei tótenshe jaǵdaida halyqqa qol ushyn sozatyn mamandardyń turǵyn-úi máselesin sheshý úshin jylyna qosymsha 9 mlrd. teńgege jýyq qarajat qajet.
Úkimet atalǵan sala mamandaryn baspanamen qamtýǵa basa nazar aýdaryp otyr.
“Tótenshe jaǵdai ministrliginiń málimeti boiynsha osy salada eńbek etetin 7,8 myń azamat úisiz júr, olardyń otbasylaryn qosa alǵanda bul 15 myń adamdy quraidy. Úkimet bul máseleni nazarynda ustaýda, qutqarýshylardyń talap-tilegine qulaq túrip, olardy baspanamen qamtýǵa bar kúshimizdi salamyz. Osy maqsatta respýblikalyq biýdjetten jylyna qosymsha 8,7 mlrd teńge bólý kózdelýde”, – dedi Asqar Mámin.
Aita ketelik, bul máseleni senatorlar sóz qylyp, Úkimet basshysynyń atyna saýal joldaǵan edi.
Máminniń atap ótkenindei tótenshe jaǵdai qyzmetkerlerin tolyqtai baspanamen qamtamasyz etý úshin qoldanystaǵy turǵyn-úi týraly zańǵa birqatar ózgerister engizý qajet. Ázir osy baǵytta memorgandar tarapynan tiisti is-sharalar júrgizilýde.
…
Dalanews.kz tilshisi osy máseleni Parlament minberinde kótergen senator Sergei Ershovqa habarlasyp, pikirin bilgen edi.
“Tótenshe jaǵdai mamandaryn turǵyn-úimen qamtamasyz etý múlde qarastyrylmaǵan. Sondyqtan atalǵan salada kadrlar turaqtamaidy, bul óz kezeginde sapa máselesine teris áser etetini aidan anyq.
Elimizde tótenshe jaǵdai salasynda ter tógip júrgen 19 myńǵa jýyq maman bar. Solardyń 40 paiyzy (7800 adam) baspanasyz, kóship-qonyp júr.
Órt sóndirýshiler men qutqarýshylarǵa mundai kózqaraspen qaraýymyz qatelik. Tótenshe jaǵdai oryn alsa, oqiǵa ornyna alǵashqy bolyp jetetin de osy azamattar. Endeshe olardy turǵyn-úimen qamtamasyz etýge bólinetin 8,7 mlrd igi maqsatqa jumsalady”, – deidi senator.
Onyń pikirinshe elimizdegi ózge memorgandarda mundai másele joq. Ishki ister salasy men antikorrýptsiialyq qyzmet mamandarynyń kópshiligi baspana máselesin oilap bas qatyrmaidy, tiisinshe bar ýaqytyn jumysqa arnaityn múmkindigi bar.
