پرەمەر-مينيستر اسقار ءماميننىڭ اتاپ وتكەنىندەي توتەنشە جاعدايدا حالىققا قول ۇشىن سوزاتىن مامانداردىڭ ءتۇرعىن-ۇي ماسەلەسىن شەشۋ ءۇشىن جىلىنا قوسىمشا 9 ملرد. تەڭگەگە جۋىق قاراجات قاجەت.
ۇكىمەت اتالعان سالا ماماندارىن باسپانامەن قامتۋعا باسا نازار اۋدارىپ وتىر.
“توتەنشە جاعداي مينيسترلىگىنىڭ مالىمەتى بويىنشا وسى سالادا ەڭبەك ەتەتىن 7،8 مىڭ ازامات ءۇيسىز ءجۇر، ولاردىڭ وتباسىلارىن قوسا العاندا بۇل 15 مىڭ ادامدى قۇرايدى. ۇكىمەت بۇل ماسەلەنى نازارىندا ۇستاۋدا، قۇتقارۋشىلاردىڭ تالاپ-تىلەگىنە قۇلاق ءتۇرىپ، ولاردى باسپانامەن قامتۋعا بار كۇشىمىزدى سالامىز. وسى ماقساتتا رەسپۋبليكالىق بيۋدجەتتەن جىلىنا قوسىمشا 8،7 ملرد تەڭگە ءبولۋ كوزدەلۋدە”، – دەدى اسقار ءمامين.
ايتا كەتەلىك، بۇل ماسەلەنى سەناتورلار ءسوز قىلىپ، ۇكىمەت باسشىسىنىڭ اتىنا ساۋال جولداعان ەدى.
ءماميننىڭ اتاپ وتكەنىندەي توتەنشە جاعداي قىزمەتكەرلەرىن تولىقتاي باسپانامەن قامتاماسىز ەتۋ ءۇشىن قولدانىستاعى ءتۇرعىن-ۇي تۋرالى زاڭعا ءبىرقاتار وزگەرىستەر ەنگىزۋ قاجەت. ءازىر وسى باعىتتا مەمورگاندار تاراپىنان ءتيىستى ءىس-شارالار جۇرگىزىلۋدە.
…
Dalanews.kz ءتىلشىسى وسى ماسەلەنى پارلامەنت مىنبەرىندە كوتەرگەن سەناتور سەرگەي ەرشوۆقا حابارلاسىپ، پىكىرىن بىلگەن ەدى.
“توتەنشە جاعداي ماماندارىن تۇرعىن-ۇيمەن قامتاماسىز ەتۋ مۇلدە قاراستىرىلماعان. سوندىقتان اتالعان سالادا كادرلار تۇراقتامايدى، بۇل ءوز كەزەگىندە ساپا ماسەلەسىنە تەرىس اسەر ەتەتىنى ايدان انىق.
ەلىمىزدە توتەنشە جاعداي سالاسىندا تەر توگىپ جۇرگەن 19 مىڭعا جۋىق مامان بار. سولاردىڭ 40 پايىزى (7800 ادام) باسپاناسىز، كوشىپ-قونىپ ءجۇر.
ءورت سوندىرۋشىلەر مەن قۇتقارۋشىلارعا مۇنداي كوزقاراسپەن قاراۋىمىز قاتەلىك. توتەنشە جاعداي ورىن السا، وقيعا ورنىنا العاشقى بولىپ جەتەتىن دە وسى ازاماتتار. ەندەشە ولاردى تۇرعىن-ۇيمەن قامتاماسىز ەتۋگە بولىنەتىن 8،7 ملرد يگى ماقساتقا جۇمسالادى”، – دەيدى سەناتور.
ونىڭ پىكىرىنشە ەلىمىزدەگى وزگە مەمورگانداردا مۇنداي ماسەلە جوق. ىشكى ىستەر سالاسى مەن انتيكوررۋپسيالىق قىزمەت ماماندارىنىڭ كوپشىلىگى باسپانا ماسەلەسىن ويلاپ باس قاتىرمايدى، تيىسىنشە بار ۋاقىتىن جۇمىسقا ارنايتىن مۇمكىندىگى بار.
