2023 jylǵy 1 naýryzdan bastap Qazaqstan Respýblikasynda jeke tulǵalardyń bankrottyq institýty iske qosyldy. Osy kezeńnen bastap búginge deiin bankrottyq rásimin qoldanýǵa 270 myńnan astam ótinish kelip túsken, dep habarlaidy Dalanews.kz.
"Onyń ishinde 262 myń ótinish sottan tys bankrottyq rásimi aiasynda berilgen. Alaida, 193 myń ótinish (73%) boiynsha kiris ólshemsharttaryna sáikes kelmeý faktileri anyqtalyp, nátijesinde ótinishter qanaǵattandyrylmaǵan. Negizgi sebepter — ótinish berýshiniń menshiginde múliktiń bolýy, bereshek somasy men tólem jasalmaǵan merzimniń talaptarǵa sáikes kelmeýi, sondai-aq kreditormen bereshekti retteý rásiminiń bolmaýy", dep túsindiredi Memlekettik kirister departamenti.
Quzyrly vedmstvo qoljetimdilikti arttyrýǵa baǵyttalǵan zańnamalyq ózgerister engizilgenin aitady. Máselen, sottan tys bankrottyq rásimin jeńildetý maqsatynda 2024 jylǵy 19 maýsymda jáne 2025 jylǵy 30 maýsymda zańnamaǵa ózgerister engizildi.
Birinshi kezeńdegi ózgerister:
- bereshekti retteý týraly qujattardy qosa berý talaby alynyp tastaldy;
- kreditor men bereshek somasy týraly málimetterdi kórsetý talaby joiyldy — bul aqparat endi tikelei kredittik biýrolardan suratylady;
- sottan tys bankrottyq rásimine qatysatyn kreditorlardyń tizbesi keńeitildi.
2025 jylǵy 1 shildedegi iske asyrý nátijeleri
Buǵan deiin bas tartylǵan azamattardyń arasynan 6 795 adam sebepterin joiǵannan keiin 3 ai ótken soń ótinishti qaita tapsyryp, bankrot dep tanyldy.
Búgingi tańda 34 600 azamat resmi túrde bankrot dep tanyldy, onyń ishinde:
- 2 031 adam – ataýly áleýmettik kómek alýshylar,
- 10 451 adam – 5 jyldan astam merzimde qaryzdaryn ótemegender.
Sot tártibimen bankrottyq jáne tólem qabilettiligin qalpyna keltirý aiasynda:
- kelip túsken 10 000 ótinishtiń ishinen 225 azamat bankrot dep tanyldy;
- 181 azamat tólem qabilettiligin qalpyna keltirý rásiminen ótýde.
"Zań aiasynda óz múmkindigin paidalanǵan 34 myńnan astam azamat shamadan tys bereshek júktemesinen arylyp, ekonomikalyq belsendi ómirge qaita oraldy", delingen habarlamada.
Olardyń ishinde:
- 1 248 azamat jeke kásipker retinde tirkeldi,
- 2024 jylǵa arnalǵan salyq eseptiligine sáikes, olardyń jiyntyq tabysy 202,8 mln teńgeni, eseptelgen salyq somasy – 16 mln teńgeni qurady.
Bul derekter jeke kásipker retinde tirkelgen azamattardy ǵana qamtidy.
