Ishki ister ministrligine, Kóshi-qon politsiiasyna, Jambyl oblystyq prokýratýrasyna, Qordai aýdandyq prokýratýrasyna Podshibiakinada Resei azamattyǵynyń bar-joqtyǵy týraly suraý salǵan bolatynbyz.
Ishki ister ministrligi bizge jazǵan hatynda shyǵaryp salma jaýappen ǵana qutylǵandai boldy.
Iaǵni qos azamattyqtyń bolý-bolmaýy bireýdiń jeke basynyń máselesi eken. Ony úshinshi jaqqa jariialaý zań boiynsha tyiym salynatyn quqyqtyq qupiia kórinedi.
Sondyqtan, bizdiń hatymyzǵa odan artyq jaýap bere almaityndaryn jazypty. Qysqasy, Tatiana Podshibiakinada qos azamattyqtyń bar-joqtyǵy týraly málimet bermedi.
Osy aptada Qordai aýdandyq prokýratýrasynan jaýap hat keldi.
Hattyń mazmunynan túsingenimizdei, Tatiana Podshibiakina 2003-2012 jyldary eki márte Qordai aýdandyq máslihatynyń depýtaty bolypty. Al onyń qos azamattyǵyna qatysty másele boiynsha kórshi Resei Federatsiiasyna hat jazylǵanyn, biraq ol jaqtan áli jaýap kelmegenin aitylǵan.
Bul da shyǵaryp salma syltaý. Áitpese, dál qazir tildei qaǵaz alý sonshalyq qiyn sharýa bolyp pa?
Kórshi Reseimen dál qazir araqatynasymyz jaman emes. Eki memleket arasynda eshqandai saiasi kelispeýshilikter joqtyń qasy. Astana men Máskeý arasynda kúnine qanshama hat-habar bolyp jatatyny siz ben bizge qupiia bolar. Biraq mobilizatsiiadan qashqan eki millionǵa jýyq orysqa ýaqytsha otan bolyp otyrǵanymyz úshin bolsa da, Kreml jaqtan qujat surý qiyndyq týdyrmas edi. Bul da syltaý.
Al syltaý sebep bolmaidy. Sondyqtan, Tatiana hanymnyń qos azamattyǵy týraly aqparattyń anyq-qanyǵyn bilý úshin quzyrly mekemelerden áli de naqty jaýap kútemiz!
Ekinshi hat eńbek jáne halyqty áleýmettik qorǵaý ministrliginen kelipti.
Zań tilimen jazylǵan hattyń eń sońǵy sóileminen ǵana bizge qatysty jaýapty taptyq. "Ishki ister ministrligine baryńyzdar" degen emeýrindi áreń túsindik. Bir mekeme ekinshisine, ekinshisi úshinshisine siltegen syrǵytpa jaýaptar ǵana. Basqa túk joq. Al bizge Tatiana Podshibiakinanyń qos azamattyǵy týraly naqty málimet kerek!
Mundai syrǵytpa jaýaptar bizdi qanaǵattandyrmaidy. Bir Podshibiakina týraly aqparat munshalyq qupiia bolsa, júzdegen, myńdaǵan "tatianalar" týraly suraýdyń ózi uiat!
Sonda Memleket basshysynyń qos azamattyq týraly tapsyrmasy osylai syrǵytpa syltaýlarmen jaýapsyz qala ma? Biz endi munyń «qupiiasyn» qai ministrlikten nemese qai mekemeden suraimyz?
https://dalanews.kz/del-qazir/82235-ishki-ister-ministrligi-qos-azamattyg
https://dalanews.kz/del-qazir/81920-qordaydyng-deputatynda-qos-azamattyq
