ىشكى ىستەر مينيسترلىگىنە، كوشى-قون پوليسياسىنا، جامبىل وبلىستىق پروكۋراتۋراسىنا، قورداي اۋداندىق پروكۋراتۋراسىنا پودشيبياكينادا رەسەي ازاماتتىعىنىڭ بار-جوقتىعى تۋرالى سۇراۋ سالعان بولاتىنبىز.
ىشكى ىستەر مينيسترلىگى بىزگە جازعان حاتىندا شىعارىپ سالما جاۋاپپەن عانا قۇتىلعانداي بولدى.
ياعني قوس ازاماتتىقتىڭ بولۋ-بولماۋى بىرەۋدىڭ جەكە باسىنىڭ ماسەلەسى ەكەن. ونى ءۇشىنشى جاققا جاريالاۋ زاڭ بويىنشا تىيىم سالىناتىن قۇقىقتىق قۇپيا كورىنەدى.
سوندىقتان، ءبىزدىڭ حاتىمىزعا ودان ارتىق جاۋاپ بەرە المايتىندارىن جازىپتى. قىسقاسى، تاتيانا پودشيبياكينادا قوس ازاماتتىقتىڭ بار-جوقتىعى تۋرالى مالىمەت بەرمەدى.
وسى اپتادا قورداي اۋداندىق پروكۋراتۋراسىنان جاۋاپ حات كەلدى.
حاتتىڭ مازمۇنىنان تۇسىنگەنىمىزدەي، تاتيانا پودشيبياكينا 2003-2012 جىلدارى ەكى مارتە قورداي اۋداندىق ءماسليحاتىنىڭ دەپۋتاتى بولىپتى. ال ونىڭ قوس ازاماتتىعىنا قاتىستى ماسەلە بويىنشا كورشى رەسەي فەدەراسياسىنا حات جازىلعانىن، ءبىراق ول جاقتان ءالى جاۋاپ كەلمەگەنىن ايتىلعان.
بۇل دا شىعارىپ سالما سىلتاۋ. ايتپەسە، ءدال ءقازىر تىلدەي قاعاز الۋ سونشالىق قيىن شارۋا بولىپ پا؟
كورشى رەسەيمەن ءدال ءقازىر اراقاتىناسىمىز جامان ەمەس. ەكى مەملەكەت اراسىندا ەشقانداي ساياسي كەلىسپەۋشىلىكتەر جوقتىڭ قاسى. استانا مەن ماسكەۋ اراسىندا كۇنىنە قانشاما حات-حابار بولىپ جاتاتىنى ءسىز بەن بىزگە قۇپيا بولار. ءبىراق موبيليزاسيادان قاشقان ەكى ميلليونعا جۋىق ورىسقا ۋاقىتشا وتان بولىپ وتىرعانىمىز ءۇشىن بولسا دا، كرەمل جاقتان قۇجات سۇرۋ قيىندىق تۋدىرماس ەدى. بۇل دا سىلتاۋ.
ال سىلتاۋ سەبەپ بولمايدى. سوندىقتان، تاتيانا حانىمنىڭ قوس ازاماتتىعى تۋرالى اقپاراتتىڭ انىق-قانىعىن ءبىلۋ ءۇشىن قۇزىرلى مەكەمەلەردەن ءالى دە ناقتى جاۋاپ كۇتەمىز!
ەكىنشى حات ەڭبەك جانە حالىقتى الەۋمەتتىك قورعاۋ مينيسترلىگىنەن كەلىپتى.
زاڭ تىلىمەن جازىلعان حاتتىڭ ەڭ سوڭعى سويلەمىنەن عانا بىزگە قاتىستى جاۋاپتى تاپتىق. "ىشكى ىستەر مينيسترلىگىنە بارىڭىزدار" دەگەن ەمەۋرىندى ارەڭ تۇسىندىك. ءبىر مەكەمە ەكىنشىسىنە، ەكىنشىسى ۇشىنشىسىنە سىلتەگەن سىرعىتپا جاۋاپتار عانا. باسقا تۇك جوق. ال بىزگە تاتيانا پودشيبياكينانىڭ قوس ازاماتتىعى تۋرالى ناقتى مالىمەت كەرەك!
مۇنداي سىرعىتپا جاۋاپتار ءبىزدى قاناعاتتاندىرمايدى. ءبىر پودشيبياكينا تۋرالى اقپارات مۇنشالىق قۇپيا بولسا، جۇزدەگەن، مىڭداعان "تاتيانالار" تۋرالى سۇراۋدىڭ ءوزى ۇيات!
سوندا مەملەكەت باسشىسىنىڭ قوس ازاماتتىق تۋرالى تاپسىرماسى وسىلاي سىرعىتپا سىلتاۋلارمەن جاۋاپسىز قالا ما؟ ءبىز ەندى مۇنىڭ «قۇپياسىن» قاي مينيسترلىكتەن نەمەسە قاي مەكەمەدەن سۇرايمىز؟
https://dalanews.kz/del-qazir/82235-ishki-ister-ministrligi-qos-azamattyg
https://dalanews.kz/del-qazir/81920-qordaydyng-deputatynda-qos-azamattyq
