Májilis depýtaty Juldyz Súleımenova búdjettik mekemelerdegi tehnıkalyq qyzmetkerlerdiń — eden jýýshy, santehnık, elektrık, aýla sypyrýshy sıaqty jumysshylardyń eńbegin ádil baǵalap, jalaqysyn arttyrýǵa baǵyttalǵan biryńǵaı júıe engizý qajet ekenin atap ótti, dep habarlaıdy Dalanews.kz.

Depýtat premer-mınıstrdiń orynbasary Tamara Dúısenovaǵa depýtattyq saýal joldap, mańyzdy máseleni kóterdi.

Aıtýynsha, sońǵy jyldary azamattyq qyzmetkerlerdiń eńbekaqysy jyl saıyn orta eseppen 20%-ǵa ósip keledi. Alaıda bul ósim óńirler men aýdandarda birkelki emes, tipti bir qaladaǵy mekemeler arasynda da aıyrmashylyq bar. Bul jaǵdaı tehnıkalyq qyzmetkerler arasynda túsinispeýshilik týǵyzýda.

Osy tusta, depýtat jalaqynyń ádiletti bólinýin qamtamasyz etý úshin biryńǵaı júıe engizý qajet ekenin atap ótti. 

Sonymen qatar ol jóndeý jumystary úshin qosymsha tólem qarastyrylmaıtynyn da qosty. Onyń aıtýynsha, bul maqsatqa búdjetten qarajat bólingenimen, qarapaıym jumysshylarǵa qosymsha mindet júkteledi.

“Bul – eńbek zańnamasyna qaıshy. Eger búdjette qarajat qarastyrylǵan bolsa, tehnıkalyq qyzmetkerlerge jóndeý jumystary úshin tıisti tólem tólenýi tıis”, – dedi ol.

Onyń sózinshe, keı jumystarǵa qosymsha aqy tólenbeıdi.

"Taǵy bir ózekti másele – hlor qoldanatyn jumystar úshin qosymsha aqy tólenbeıdi. Bul máselege qatysty naqty sheshim qabyldanbaǵan. Sol sebepti ony jedel qarastyrý qajet", - dep qosty ol. 

Úkimet Dúnıejúzilik bankpen birlesip, azamattyq qyzmetkerlerdiń eńbekaqy júıesin jetildirý jumystaryn júrgizip jatyr. Alaıda bul ózgerister tehnıkalyq personalǵa qalaı áser etetini áli belgisiz.

“Aqparattyń jetispeýi jumysshylar arasynda túsinispeýshilik týǵyzady. Jalaqyny arttyrý tetigi ashyq túsindirilip, biryńǵaı eńbekaqy júıesi engizilýi kerek”, – dep atap ótti depýtat.

Sonymen qatar ol tehnıkalyq qyzmetkerlerdiń aýyr eńbegin eskere otyryp, jalaqyny arttyrý ádistemesine eńbek ótili, jumys júktemesi jáne atqarylatyn jumystyń kúrdeligi sıaqty faktorlar engizilýi tıis ekenin aıtty.