"Keshe túnde Qordaidaǵy Ma San Chi aýylynda (dunǵandar qonystanǵan) úiler órtenip, dúnie-múlik búlindi. Keibireýler Qordaidaǵy janjaldyń dunǵan men politseidiń arasyndaǵy qaqtyǵystan bastalǵanyn aitýda. Alaida bul ereges janjaldyń basy emes, jalǵasy bolǵany endigi jerde naqty anyqtalyp otyr.
"Politseiler ózderiniń jaǵasynan alǵan dunǵandardy quryqtamaq bolǵan degen aqparat bar. Sebebi álgiler kólik jolynda qazaqtyń seksenniń seńgirine shyqqan aqsaqaly men onyń eki balasyn sabap tastaǵan.
Aqsaqaldy baltamen, onyń uldaryn armatýramen urǵan delinedi. Qazir úsheýi de aýrýhanada jatyr. Munyń arty úlken ultaralyq janjalǵa ulasty.
Dunǵannyń jap-jas jigitteri qazaq aqsaqalyna qalai ǵana qol kóterdi? Ultaralyq uiymshyldyq degen memlekettik maqtaýly saiasaty qaida? Assambleia depýtattary ai qarap otyr ma? Olar osy eldiń tilin de bilmeidi, osy túrimen parlamentte otyr!
Kúni keshe bireýler dombyramyzdy jerge urǵan edi, olardy keshirim surattyryp bosata saldy, endi bireýler separatizmniń uryǵyn seýip júr, olar da jazalanǵan joq. Bilik áreket etpese, halyq ózi qozǵalady. Al halyqty toqtata almaisyzdar.
Aqsaqalǵa qol kótergenderdi jáne politsiianyń jaǵasyna jarmasqandardy tezdetip anyqtaý kerek. Barlyq kiná solardyń moinynda. Al Assambleiany taratý qajet. Bul uiymnyń túkke keregi joq", – deidi Muhtar Taijan
Óz kezeginde Aqparat jáne qoǵamdyq damý ministri Dáýren Abaev "aqsaqaldy baltamen urǵan" degen aqparatty joqqa shyǵardy.
"Bul aqparat shyndyqqa janaspaidy", – dedi ministr.
Degenmen Abaev Qordaidaǵy janjaldyń tutanýyna dál osy jaǵdaidyń sebepshi bolýy múmkin ekenin aitty
"Iá, mundai boljam bar. Bul turmystyq janjal. Dál qazir muny anyqtaý ústindemiz", – dedi vedomstvo basshysy.
Ishki ister ministri Erlan Turǵymbaevtyń málimetinshe Qordaidaǵy janjalǵa barlyǵy 300-ge tarta adam qatysqan, 40-tan asa adam jaraqat alǵan, 8 adam qaitys boldy. Eki politsei oq jaraqatyn aldy.
Memleket basshysy Qasym-Jomart Toqaev Qordaidaǵy daýǵa arandatýshylar aralasyp, ony óz paidasyna asyrmaq bolǵan dep málimdedi.
Sýretter myna siltemeden alyndy:
https://www.facebook.com/permalink.php?story_fbid=794901177680809&id=100014828018297
