2023 jyldyń sońyna qarai Ulttyq qorda jalpy ishki ónimniń 30,8 paiyzyna teń qarajat qana qalady. 25 tamyzda ótken úkimet otyrysy kezinde ulttyq bank tóraǵasy Erbolat Dosaev osyndai boljam aitty.
Seisenbi kúngi otyrysta 20 jyl buryn keler urpaqqa "azyq bolady" dep qurylǵan Ulttyq qordan taǵy qansha qarajat alynatyny týraly málimet aityldy. 2021 jyly kepildendirilgen transfert kólemi – 2,7 trln teńge, 2022 jyly – 2,4 trln, 2023 jyly – 2,2 trln teńgeni quramaq.
"Úsh jylǵa arnalǵan respýblikalyq biýdjet memlekettik biýdjet tapshylyǵy men Ulttyq qordan bólinetin transfert kólemin edáýir arttyrýdy qarastyrady. Soǵan bailanysty boljam boiynsha 2023 jyldyń sońyna taman Ulttyq qor qarajaty "odan ári jumsaýǵa kelmeitin qaldyqqa" iaǵni, jalpy ishki ónimniń 30 paiyzyna jaqyndap, 30,8 paiyzyn quramaq. Osyǵan orai 2021 jyly kontrtsikldik biýdjet erejesiniń engizilýin eskere otyryp, Ulttyq qordyń jinaqtaý fýnktsiiasyn saqtaý jáne munai tapshylyǵyn azaitý úshin sharalar qabyldaý qajet bolady" dedi Dosaev.
Qazaqstan biligi shikizat satýdan túsetin qarjydan quralǵan Ulttyq qor resýrsyn únemdep jumsaý týraly birneshe ret aitqan.
Transfert kólemin azaitý qajettigi aitylǵanmen qordan qarajat áli de alynyp jatyr. Biyl úkimet bastapqyda 2,7 trln teńge kóleminde transfert jasaýdy josparlaǵan edi, keiinirek onyń kólemi taǵy 2 trillionǵa kóbeidi. Mundai sheshim koronavirýs indetine bailanysty elde karantin jariialanyp, saýda jasaityn jáne qyzmet kórsetetin kásiporyndar jumysy toqtap, memlekettiń áleýmettik mindettemeleri kóbeigen shaqta qabyldanǵan edi. Buǵan qosa, negizgi tabys kózi munai baǵasy kúrt quldilaǵan. Bilik biyl respýblikalyq biýdjet turaqtylyǵyna Ulttyq qor transfertiniń arqasynda qol jetkizgenin moiyndaǵan.
Ulttyq bank málimetinshe, Ulttyq qor aktivi shilde aiynda 58,2 mlrd dollardy quraǵan. Jyl basynan beri 5,7 paiyzǵa azaiǵan.
2014 jyly munai baǵasy salystyrmaly túrde qymbat bolyp turǵan kezde Ulttyq qorǵa 77,2 mlrd dollar jinalǵan edi.
