سەيسەنبى كۇنگى وتىرىستا 20 جىل بۇرىن كەلەر ۇرپاققا "ازىق بولادى" دەپ قۇرىلعان ۇلتتىق قوردان تاعى قانشا قاراجات الىناتىنى تۋرالى مالىمەت ايتىلدى. 2021 جىلى كەپىلدەندىرىلگەن ترانسفەرت كولەمى – 2،7 ترلن تەڭگە، 2022 جىلى – 2،4 ترلن، 2023 جىلى – 2،2 ترلن تەڭگەنى قۇراماق.
"ءۇش جىلعا ارنالعان رەسپۋبليكالىق بيۋدجەت مەملەكەتتىك بيۋدجەت تاپشىلىعى مەن ۇلتتىق قوردان بولىنەتىن ترانسفەرت كولەمىن ەداۋىر ارتتىرۋدى قاراستىرادى. سوعان بايلانىستى بولجام بويىنشا 2023 جىلدىڭ سوڭىنا تامان ۇلتتىق قور قاراجاتى "ودان ءارى جۇمساۋعا كەلمەيتىن قالدىققا" ياعني، جالپى ىشكى ءونىمنىڭ 30 پايىزىنا جاقىنداپ، 30،8 پايىزىن قۇراماق. وسىعان وراي 2021 جىلى كونترسيكلدىك بيۋدجەت ەرەجەسىنىڭ ەنگىزىلۋىن ەسكەرە وتىرىپ، ۇلتتىق قوردىڭ جيناقتاۋ فۋنكسياسىن ساقتاۋ جانە مۇناي تاپشىلىعىن ازايتۋ ءۇشىن شارالار قابىلداۋ قاجەت بولادى" دەدى دوسايەۆ.
قازاقستان بيلىگى شيكىزات ساتۋدان تۇسەتىن قارجىدان قۇرالعان ۇلتتىق قور رەسۋرسىن ۇنەمدەپ جۇمساۋ تۋرالى بىرنەشە رەت ايتقان.
ترانسفەرت كولەمىن ازايتۋ قاجەتتىگى ايتىلعانمەن قوردان قاراجات ءالى دە الىنىپ جاتىر. بيىل ۇكىمەت باستاپقىدا 2،7 ترلن تەڭگە كولەمىندە ترانسفەرت جاساۋدى جوسپارلاعان ەدى، كەيىنىرەك ونىڭ كولەمى تاعى 2 تريلليونعا كوبەيدى. مۇنداي شەشىم كوروناۆيرۋس ىندەتىنە بايلانىستى ەلدە كارانتين جاريالانىپ، ساۋدا جاسايتىن جانە قىزمەت كورسەتەتىن كاسىپورىندار جۇمىسى توقتاپ، مەملەكەتتىڭ الەۋمەتتىك مىندەتتەمەلەرى كوبەيگەن شاقتا قابىلدانعان ەدى. بۇعان قوسا، نەگىزگى تابىس كوزى مۇناي باعاسى كۇرت قۇلديلاعان. بيلىك بيىل رەسپۋبليكالىق بيۋدجەت تۇراقتىلىعىنا ۇلتتىق قور ترانسفەرتىنىڭ ارقاسىندا قول جەتكىزگەنىن مويىنداعان.
ۇلتتىق بانك مالىمەتىنشە، ۇلتتىق قور اكتيۆى شىلدە ايىندا 58،2 ملرد دوللاردى قۇراعان. جىل باسىنان بەرى 5،7 پايىزعا ازايعان.
2014 جىلى مۇناي باعاسى سالىستىرمالى تۇردە قىمبات بولىپ تۇرعان كەزدە ۇلتتىق قورعا 77،2 ملرد دوللار جينالعان ەدى.
