Májilis depýtaty Edil Jańbyrshin men Elnur Beisenbaev Memleket basshysynyń Úkimettiń keńeitilgen otyrysynda aitqan málimdemelerine qatysty oiyn aitty, dep habarlaidy Dalanews.kz.
Jańbyrshin elde jaǵdai jyl saiyn qiyndap jatqanyn, atqarýshy bilik krizisti aýyzdyqtai almai jatqanyn aitty.
"Prezident búgin Úkimettiń keńeitilgen otyrysynda jáne osyǵan deiingi Joldaýlary men ótkizgen jinalystarynda elimizdi damytý jóninde talai tapsyrmalar berdi, utymdy usynystar aitty.
Biraq elde ekonomikalyq jáne áleýmettik jaǵdai ózi aitqandai máz emes. Ony halyq ta, bilikte bilip otyr. Jaǵdai jyl saiyn qiyndaýda, atqarýshy bilik krizisti aýyzdyqtai almaýda. Sebebi Professor Preobrajenskii aitqandai "Razrýha v golovah" bolyp tur. Bári kadr saiasatynyń álsizdiginen. Jańasha oilai almaityn, shablondy-standartpen jumys jasaityn, oligopoliianyń aitqanyn shyǵa almai solardyń soiylyn soǵatyn, jaýapkershilikti moinyna almai tapsyrmalardy basqa bireýge ysyrýǵa beiim, eshqandai aitarlyqtai nátije kórsetpei bilikte otyrǵan, ásirese kópten beri kele jatqan kadrlardy aýystyrmai eshteńe ózgermeidi.
Memleket basshysy "Bizge, eń aldymen, bilikti jáne el múddesin oilaityn otanshyl kadrlar kerek. Dál osyndai mamandardy taýyp, olardy basshylyq laýazymdarǵa taǵaiyndaimyz", - dedi. Óte durys sheshim. Sonymen qatar, ol kadrlarǵa jumys jasaý úshin saiasat pen ekonomikada erkindik berilip jáne ár túrli "toptardyń" tarapynan qysym jasalmaýy kerek. Bir sózben aitqanda elde úlken ózgerister jasaǵymyz kelse, MYQTY KADRLAR bilikke kelýi kerek. Olarsyz jobanyń bári joba kúiinde qala beredi!", deidi depýtat.
Al Elnur Beisenbaevtyń sózinshe, Toqaev keshegi úkimet otyrysynda naqty mindetterdi júktedi.
"Memleket basshysy Qasym-Jomart Toqaev Úkimettiń keńeitilgen otyrysyna qatysyp, atqarýshy bilikke, zań shyǵarýshy organǵa jáne quqyq qorǵaý salasyna naqty tapsyrma berdi. Mindetti áleýmettik meditsinalyq saqtandyrý júiesin reformalaýdy jalǵastyrý kerek. Sonymen qatar birqatar zańnamalyq shara qabyldaý qajet. Úkimet Parlamentpen birge mindetti áleýmettik meditsinalyq saqtandyrý júiesin jetildirý týraly zań jobasyn jedel pysyqtaýy kerek. Qujat osy sessiianyń sońyna deiin qabyldanýǵa tiis.
Qazaqstan naryǵyna geologiialyq barlaýmen ainalysatyn iri sheteldik kompaniialar keldi. Jer qoinaýyn paidalaný quqyǵyn ashyq ári qarapaiym tártippen bóletin Biryńǵai platforma iske qosyldy. Parlament sessiiasynyń sońyna deiin bul jumystyń zańnamalyq negizin qamtamasyz etý kerek. Úkimet pen Parlament ekinshi iadrolyq stansany qai aimaqta salý qajet ekeni jóninde maǵan usynys berýi kerek. Biraq atap ótkim keledi: elimizge iadrolyq qýat kerek, onsyz Qazaqstan keleshekte oidaǵydai dami almaidy. Qýat degenimiz – búkil ekonomikanyń damýy degen sóz. Ekinshiden, qýat jetkilikti bolsa, barlyq aimaqtar gúldenip, órkendei túsedi, halyqtyń turmysy jaqsarady. Bul – aidan anyq", deidi Beisenbaev.
Eske salaiyq, Memleket basshysy Qasym-Jomart Toqaevtyń tóraǵalyǵymen 28 qańtarda Qazaqstan Respýblikasy Úkimetiniń keńeitilgen otyrysy ótti.
Otyrys barysynda elimizdiń byltyrǵy áleýmettik-ekonomikalyq damýynyń qorytyndylary shyǵarylyp, Úkimettiń aldaǵy kezeńge arnalǵan negizgi mindetteri aiqyndaldy.
Sonymen qatar, premer-ministr Oljas Bektenov, Ulttyq bank tóraǵasy Timýr Súleimenov jáne birqatar óńirdiń ákimderi baiandama jasady.
