"Biz Abai oblysyndaǵy jaǵdaidy óz kózimizben kórip, baqylaý úshin barǵan edik. Túnde qaityp keldik. Órt aýyzdyqtaldy, toqtatyldy dep aita almaimyz. Ol jerge tehnikalyq kómek kóp qajet. Jeldiń toqtamaýy men jańbyrdyń bolmaýy syndy tabiǵi faktorlar da qatty áser etip jatyr. Tek AMANAT partiiasy ǵana emes, jergilikti halyqtyń belsendiligi, kóshirilgen halyqqa kómek kórsetý syndy is-áreketter retke keltirilgen. Barlyǵy qalypty jospar boiynsha jumys istep jatyr", – dedi Rinat Zaiyov.
Depýtat ataǵandai, basty problema – otty aýyzdyqtap toqtatý.
"Osy jaǵynan kelgende suraq óte kóp. Qalai toqtatady? Qashan toqtatady? Qazirdiń ózinde "Semei ormany" rezervatynyń 10 paiyzyna deiingi aýmaǵy órtenip jatyr. Keshe biz barǵan Talitsa degen aýylǵa biz ketken soń túnde ot barǵan. Bulaq degen aýyldy tútin jailaǵan soń adamdardy kóshirgen. Qazirgi ahýaly osyndai bolyp otyr", – dedi Rinat Zaiytov.
Sonymen qatar depýtat Samat Nurtaza óńirdegi jaǵdai áli de kúrdeli ekenin aitty.
"Tehnika ishinara jetispedi. Meniń oiymsha, órt aimaǵynda tehnika kóbirek bolýy kerek edi. Jalpy TJM basshylyǵyn aýystyrý burynnan qajet boldy. Basshylyqty aýysqannan keiin oń nátije bolady degenge sengim keledi, óitkeni orman úlken jáne 3-4-aq tikushaq ushady. Bul óte az.
Biz órt bolǵan jerge jettik, sonda boldyq. Ormannan kelgen adamdardyń kiimderinen tipti tútindi de baiqaýǵa bolady. Olar kúiip qalmas úshin ormanǵa kiimderin ylǵaldap kiredi. Iaǵni bul – aýyr jumys, olar – naǵyz batyrlar. Olardyń jalaqysy-110 myń teńge. Tipti muny aitýdyń ózi uiat. Osy problemalyq máselelerdiń barlyǵy kóteriledi. Sársenbide plenarlyq otyrysta biz bul máseleni kóteremiz dep oilaimyn", – dep atap ótti depýtat.
Samat Nurtazamen birge TJ ornynda basqa depýtattar da bolǵan.
“Biz kolledj jataqhanasynda bolǵan adamdarǵa bardyq. Olar ózderiniń maly, baqshalary, úileri úshin alańdady. IIM, árine, jaqsy jumys istedi. Olar tonaý bolmas úshin aýyldy qorshap aldy. Biz sol bos qalǵan aýylǵa bardyq. Politseiler tikelei tizbekte tur", – dep atap ótti Samat Nurtaza.
Aita keteiik, Abai oblysyndaǵy alapat órt kezinde 14 adam qaza tapty.
Derekkóz: Stan.kz
