Almatylyq "Qaırat" fýtbol klýbynyń shabýylshysy Dastan Sátpaev qazanda ótetin 2026 jylǵy álem chempıonatynyń irikteý machtarynda Qazaqstan quramasyna kómektese almaıdy, dep habarlaıdy Dalanews.kz.
Málimetke súıensek, jas forvard ulttyq quramanyń oqý-jattyǵý jıynyna kelmegen. Sebebi - jaraqat.
Aıta keteıik, 5 qazanda Dastan Sátpaev Kásipqoı fýtbol lıgasynyń keıinge shegerilgen oıynynda taldyqorǵandyq "Jetisýǵa" qarsy tolyq 90 mınýt oınaǵan edi (esep - 5:0).
Buǵan deıin Qazaqstan quramasynyń bas bapkeriniń mindetin ýaqytsha atqarýshy Talǵat Baısýfınov Lıhtenshteınmen (10 qazan) jáne Soltústik Makedonıamen (13 qazan) ótetin machtarǵa shaqyrylǵan oıynshylardyń sońǵy tizimin jarıalaǵan edi.
