QR Prezidenti Qasym-Jomart Toqaevtyń tóraǵalyǵymen Úkimettiń keńeitilgen otyrysy ótken bolatyn. Atalǵan jiynda Memleket basshysy birqatar tapsyrmalar berip, mindetter júktegen edi. Túrkistanda oblys ákimi Darhan Satybaldy Prezident tapsyrmasynyń oryndalýy boiynsha apparattyq jiyn ótkizdi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Memleket basshysynyń tóraǵalyǵymen ótken otyrysta Qazaqstannyń 2023 jylǵy áleýmettik-ekonomikalyq damýy qorytyndylanyp, aldaǵy kezeńniń negizgi mindetteri aiqyndaldy.
Keńeitilgen otyrysta Prezidentimiz Túrkistan óńirindegi qurǵaqshylyq pen sý tapshylyǵy máselesin sheshýde sý únemdeý tehnologiiasyn keń aýqymda engizýdi tapsyrdy.
Bul baǵytta sýdy kóp qajet etetin daqyldardy azaityp, qurǵaqshylyqqa tózimdi daqyldardy kóbeitýdiń qajettiligine toqtaldy. Árine, bul – búgingi kún tártibinde turǵan negizgi máseleniń biri. Memleket basshysynyń tapsyrmalaryn sapaly oryndaýǵa bar kúshimizdi salamyz, – degen Túrkistan oblysy ákimi osy maqsatta Túrkistan oblysynyń arnaiy is-shara jospary bekitiletinin atap ótti.
Oblystaǵy 832 eldi mekenniń 739-y aýyz sýmen qamtylǵan. Onyń ishinde qalalarda – 99,8%, aýyldyq eldi mekenderde – 97% quraidy. 2024 jyly 47 nysannyń qurylysyna biýdjetten 13,3 mlrd teńge bólindi. Sonyń ishinde, biyl 37 nysan aiaqtalady, qalǵan 10 nysan 2025 jylǵa ótpeli. Nátijesinde 24 eldi meken aýyz sýmen qamtylady, 13 eldi mekenniń tozyǵy jetken sý qubyrlary qaita jańartylady.
Oblys eldi mekenderin 100% aýyz sýmen qamtamasyz etý maqsatynda, «Túrkistan oblysy boiynsha aýyz sýmen qamtamasyz etýdiń 2023-2025 jyldarǵa arnalǵan is-shara jospary» bekitildi. Josparǵa sáikes, oblystaǵy 93 eldi mekendi (53,3 myń halyq) aýyz sýmen qamtamasyz etý josparlanýda. Óńir basshysy sýarmaly sýdyń jaiyn da jiti qadaǵalaýdy tapsyrdy. Túrkistan oblysynyń aýyl sharýashylyǵy respýblikada erekshe oryn alady. Klimattyń ornalasý, jumys kúshi turǵysynda oblys agaralyq salany damytýǵa elimizdegi eń qolaily óńir bolǵandyqtan, aýyl sharýashylyǵy jalpy óniminiń 13,3 %-y oblysqa tiesili bolyp otyr.
Sonymen qatar investitsiia tartý, jumys oryndaryn ashý óńirdiń basty baǵyty ekeni belgili. Ótken jyldyń qorytyndysymen óńir ekonomikasyna 972 mlrd teńge investitsiia tartylyp, aldyńǵy kezeńmen salystyrǵanda 126,1%-ǵa artty. Ósim dinamikasy boiynsha elimiz boiynsha úzdik úshtikter qatarynda.
Úkimetpen bekitilgen jospar artyǵymen oryndaldy. Sondai-aq byltyr Túrkistan oblysynda 126,9 mlrd. teńgege 56 investitsiialyq joba iske qosyldy. Aldaǵy úsh jylda agroónerkásip, mashina jasaý, bilim jáne densaýlyq, ónerkásip jáne qurylys, týrizm men energetika salalaryn qamtý josparlanýda.
Oblys ákimi «Jaily mektep» pilottyq jobasyna qatysty Prezident júktegen tapsyrmany jergilikti jerde oryndaý úshin jumyla jumys isteý qajettigin aitty. Óńirde osy jobany júzege asyrý boiynsha arnaiy shtab qurylyp, jospar bekitilgen.
Jýyrda Darhan Satybaldy jaily mektepterdiń qurylysy men jabdyqtaýyna jaýapty kompaniialardyń basyn qosyp, aýqymdy jiyn ótkizbek. Másele turaqty baqylaýǵa alynǵan. Óńirde osy joba aiasynda 63 mektep salynady.
Biyl Túrkistan qalasy túrki áleminiń týristik astanasy atanyp otyr. Bul sheshim túrkitildes elderdiń týrizm baǵytyndaǵy qarym-qatynasyn nyǵaitýǵa airyqsha serpin beretinin tilge tiek etken oblys ákimi sala basshylaryna birqatar mindetter júktedi. Týrizm baǵytynda invest jobalar arttyrýdy tapsyrdy. Sonymen qatar aldaǵy ýaqytta Túrkistan oblysynda tarihi-tanymdyq týrizminen bólek, emdik-saýyqtyrý jáne ekologiialyq týrizm baǵyty da jandanbaq.
