-Eshqaida ketpeimin, búgin osy jerde qalamyn. Sizdermen birge bolamyn. Bir shai osy aýyldan-aq tabylatyn shyǵar. Máseleni birge sheshemiz,-dedi ákim.
Aýdan basshylyǵy túsindirý jumystaryn durys júrgizbegendikten keshe Zaisan aýdanynyń Saryterek, Ainabulaq aýyldarynda karantindik aimaq qurmaýdy talap etken turǵyndar kóshege jinalyp, óz narazylyqtaryn bildirgen bolatyn.
Osyǵan bailanysty Danial Ahmetov búgin tań ata jedel Zaisanǵa ushyp bardy. Halyqpen arnaiy kezdesip, ózi túsindirý jumystaryn júrgizdi.
«Ol jaqta ózimizdiń stýdentterimiz bar. Erteń olar kelse, qazaq eliniń balasynyń jolyn qalai jabamyz? Oilaný kerek. Ana jerge shekaraǵa kelip tursa, qazaq eli onyń jolyn, iaǵni shekarany japsa, ne bolady? Biz óz azamatymyzdy elge kirgizýimiz kerek ǵoi» dedi oblys ákimi Danial Ahmetov.
Aitýynsha, elge kirgen jolaýshylardyń qyzýy tekseriledi jáne birden 14 kún karantinge jatqyzylady. Ákim sondai-aq birde-bir shetel azamatynyń shekaradan ótpegenin basa aitty.
Jergilikti belsendi Erkebulan Zaǵyparov kesheden beri Saryterek aýylynda, jalpy Zaisan aýdanynda eshqandai túsindirý jumystary júrgizilmegenin aityp shaǵyndy.
Halyq túski saǵat 12-de oblys ákiminiń kezdesýin jáne shekaranyń jabylýyn surady.
Budan keiin oblys ákimi Zaisan qalasyndaǵy kolledjge baryp, osynda jinalǵan jurtshylyqqa karantindik aimaqtyń qurylmaitynyn basa aitty. Al kórshi elden keletin bes Qazaqstan azamatynyń 14 kún meditsinalyq baqylaýda bolatynyn jetkizdi. Jolaýshylar eshkimmen bailanysqa túspei, tolyqtai oqshaýlanady. Al shekaradan ótken adamda qandaida bir aýrý belgileri baiqalsa ol birden oblys ortalyǵyna arnaiy jabdyqtalǵan kólikpen jetkiziledi.
Jalpy aýdandyq ortalyq aýrýhananyń juqpaly aýrýlar bólimshesi kornavirýsqa qarsy turýǵa tolyqtai daiyn. Munda arnaiy boks daiyndalǵan. Oǵan kirip-shyǵatyn esik te bólek. Barlyq qural-jabdyqtar men qajetti dárilik preparattar jetkizilgen, dep sendiredi aýdandyq bilik ókilderi.
