Óskemen shaharynyń bolashaǵy zor aýdandarynyń birinde kezekte turǵan kópbalaly, halyqtyń áleýmettik osal toptary sanatyna jatatyndar, jetimder baspanaly boldy.
– Dál osy jerde biz únemi aityp otyratyn standarttar saqtalǵan. Biz qurylystyń qalai durys júrgizilgenin kórip otyrmyz. Úi – baqyttyń negizi! Deni saý jáne baqytty balalar osy keremet úilerde óssin. Sizderdi quttyqtaimyn, qymbatty jerlester! – dedi Danial Ahmetov páter kiltterin tapsyrý barysynda.
"Nurly jol" shaǵyn aýdanyndaǵy 9 qabatty eki turǵyn úi, jalǵa beriletin turǵyn úi baǵyty boiynsha salyndy. 144 páterdiń jalpy aýdany 9 741,36 m2 quraidy.
Jyl sońyna deiin 600 oryndyq mektep, hokkei modýli salynyp, balabaqsha qurylysy bastalmaq. Aýlalarda balalar men sport alańdary paida bolmaq. – Men bul oqiǵany 8 jyl kúttim, endi búgingi tańda bizdiń elimiz ben oblys basshylyǵyna baspanaly bolǵandardyń atynan alǵysymdy bildirgim keledi, – dedi kópbalaly ana Elena Kýhareva.
Úilerdiń qurylysy 2020 jyldyń kókteminde bastaldy. Merdigerlik uiym "Service SMÝ" JShS. Sharttar boiynsha jalpy soma 2,2 mlrd teńgeden asty. Bul rette respýblikalyq biýdjet qarajatynan 1,4 mlrd teńge bólingeni. Jergilikti biýdjetten sýbsidiialaý – shamamen 866 mln teńgeni quraidy.
Aǵymdaǵy jyly 190 mlrd. teńgege 952 myń sharshy metr turǵyn úi salynýda. Jyl sońyna deiin 350 myń sharshy metr paidalanýǵa berilmek. Onyń ishinde aǵymdaǵy jyldyń 4 aiy boiynsha – 66 myń sharshy metr, ósimi 107% qurap otyr.
