وسكەمەن شاھارىنىڭ بولاشاعى زور اۋداندارىنىڭ بىرىندە كەزەكتە تۇرعان كوپبالالى، حالىقتىڭ الەۋمەتتىك وسال توپتارى ساناتىنا جاتاتىندار، جەتىمدەر باسپانالى بولدى.
– ءدال وسى جەردە ءبىز ۇنەمى ايتىپ وتىراتىن ستاندارتتار ساقتالعان. ءبىز قۇرىلىستىڭ قالاي دۇرىس جۇرگىزىلگەنىن كورىپ وتىرمىز. ءۇي – باقىتتىڭ نەگىزى! دەنى ساۋ جانە باقىتتى بالالار وسى كەرەمەت ۇيلەردە ءوسسىن. سىزدەردى قۇتتىقتايمىن، قىمباتتى جەرلەستەر! – دەدى دانيال احمەتوۆ پاتەر كىلتتەرىن تاپسىرۋ بارىسىندا.
"نۇرلى جول" شاعىن اۋدانىنداعى 9 قاباتتى ەكى تۇرعىن ءۇي، جالعا بەرىلەتىن تۇرعىن ءۇي باعىتى بويىنشا سالىندى. 144 پاتەردىڭ جالپى اۋدانى 9 741،36 م2 قۇرايدى.
شاعىن اۋداندا بارلىعى 43 كوپقاباتتى ءۇي سالىنادى. قاجەتتى الەۋمەتتىك ينفراقۇرىلىم جوسپارلانعان.
جىل سوڭىنا دەيىن 600 ورىندىق مەكتەپ، حوككەي ءمودۋلى سالىنىپ، بالاباقشا قۇرىلىسى باستالماق. اۋلالاردا بالالار مەن سپورت الاڭدارى پايدا بولماق. – مەن بۇل وقيعانى 8 جىل كۇتتىم، ەندى بۇگىنگى تاڭدا ءبىزدىڭ ەلىمىز بەن وبلىس باسشىلىعىنا باسپانالى بولعانداردىڭ اتىنان العىسىمدى بىلدىرگىم كەلەدى، – دەدى كوپبالالى انا ەلەنا كۋحاريەۆا.
ۇيلەردىڭ قۇرىلىسى 2020 جىلدىڭ كوكتەمىندە باستالدى. مەردىگەرلىك ۇيىم "Service سمۋ" ج ش س. شارتتار بويىنشا جالپى سوما 2،2 ملرد تەڭگەدەن استى. بۇل رەتتە رەسپۋبليكالىق بيۋدجەت قاراجاتىنان 1،4 ملرد تەڭگە بولىنگەنى. جەرگىلىكتى بيۋدجەتتەن سۋبسيديالاۋ – شامامەن 866 ملن تەڭگەنى قۇرايدى.
ايتا كەتەيىك، ءتورت جىلدىڭ ىشىندە وبلىس ورتالىعىندا مەملەكەتتىك تۇرعىن ءۇي قورىنان 857 كەزەكتە تۇرعاندار جاڭا پاتەر الدى، ونىڭ ىشىندە 321 كوپبالالى وتباسى، جەتىمدەر قاتارىنان 208 جاس، حالىقتىڭ الەۋمەتتىك وسال توپتارىنان 140 ادام.
اعىمداعى جىلى 190 ملرد. تەڭگەگە 952 مىڭ شارشى مەتر تۇرعىن ءۇي سالىنۋدا. جىل سوڭىنا دەيىن 350 مىڭ شارشى مەتر پايدالانۋعا بەرىلمەك. ونىڭ ىشىندە اعىمداعى جىلدىڭ 4 ايى بويىنشا – 66 مىڭ شارشى مەتر، ءوسىمى 107% قۇراپ وتىر.
