Qazaqstandyq salyqshylar halyqty fiskaldyq chek talap etýge qyzyqtyratyn tyń tásil oilap tapty. Usaq jáne shaǵyn biznes sýbektilerinen saýda jasaǵan azamattarǵa chektegi somanyń eki paiyzy qaitarylmaq. Qazirdiń ózinde Salyq komitetiniń bul pilottyq jobasy óz tiimdiligin kórsetip úlgerdi, dep habarlaidy Dalanews.kz.
Memlekettik kirister komitetiniń arnaiy salyq rejimderin basqarý basshysy Erqanat Shynbergenniń aitýynsha, tyń tájiribe Semei jáne Aqkól qalalarynda synalyp, nátijesi kóńil kónshitken.
Joba sharty qarapaiym ǵana: satyp alýshy shaǵyn nemese mikrobiznes ókilinen alǵan túbirtegin arnaiy júiege tirkeidi de, taýar nemese qyzmet qunynyń eki paiyzyn keri qaitaryp alady.
2024 jyly bul bastamaǵa 18 myńnan astam azamat qatysyp, jalpy sany 244 myńnan asa chek tirkelgen. Tutynýshylarǵa keri qaitarylǵan qarajat kólemi 76 million teńgeni qurady. Jobanyń basty jetistigi – chekterdi talap etý arqyly kóleńkeli saýda ainalymy kóleminiń tómendeýi. Onlain kassalar arqyly jasalǵan tólem somasy 231%-ǵa ósse, fiskaldyq chekter sany 357%-ǵa kóbeigen.
"Osy arqyly azamattardyń chek suraý mádenieti qalyptasyp jatyr. Túbirtek berýden bas tartatyn kásipkerler de joq emes. Mundai jaǵdaida halyq salyq organdaryna shaǵym túsire alady. Chek talap etý – árbir azamattyń zańdy quqyǵy", – deidi Erqanat Shynbergen.
Komitet ókilderi jobanyń sátti iske asqanyna qarap, ony eldiń basqa óńirlerine de engizý kerek dep sanaidy. Eger bastama búkil respýblika boiynsha júzege assa, biýdjetke túsetin salyq kólemi ulǵaiyp, halyqtyń qarjylyq saýaty da birshama arta túspek.
