Bıshimbaevtyń advokattary qoǵamǵa qysym jasap, eks mınıstr aqtalyp shyǵa ma?

Kórkem Aldabergenova 23 aqp. 2024 11:41 5362

Eks mınıstr Qýandyq Bıshimbaevtyń advokaty Nazken Qusaıynovanyń suhbaty kúni keshe qoǵamda qyzý talqyǵa tústi. Suhbatta advokat Qýandyq Bıshimbaev marqum áıeli Saltanat Núkenovany óltirdim dep sanamaıtynyn aıtqan bolatyn. Sarapshylar men Saltanattyń aǵasy Aıtbek Amangeldi bul suhbatqa qatysty pikir bildirdi, - dep habarlaıdy Dalanews.kz.

Aıta keteıik, áıelin óltirdi degen kúdikke ilingen eks-mınıstr Qýandyq Bıshimbaevtyń advokattary «ElMedıaǵa» suhbat bergen bolatyn. Suhbatta advokat Nazken Qusaıynova Bıshimbaev  bul jaǵdaıdy qaıǵyly jaǵdaı dep baǵalap otyrǵanyn aıtty.

«Ol áıelin asa  aýyr qatygezdikpen óltirdi degendi moıyndamaıdy. Ol áli kúnge deıin mundaı jaıt bolǵanyna sene alar emes.

Ol Saltanatty áli kúnge deıin jaqsy kóredi. Ol áli kúnge deıin ony meıirimmen esine alady. Urdy, asa aýyr qatygezdikpen óltirdi degen bolǵan joq», - deıdi Nazken Qusaıynova.

Ol Saltanattyń aǵasy Qaırat Núkenov  aıtqandaı marqumnyń denesinde jaraqattar bolmaǵanyn aıtady.

«Iá, kóziniń asty kógergen shyǵar. Basy jarylǵan joq, ol mıyna qan quıylýdan qaıtys boldy. sýbdýraldy gematomadan. 1 aıdaı sozylmaly sýbdýraldy gematoma bolǵan.  Biraq bizdiń qorǵaýymyzdaǵy adam – Qýandyq Bıshimbaev gematoma paıda bolǵanyn bilmedi, saldarynan Saltanat qaıtys bolǵan. Ol bilgen joq. Saltanat saý bolǵan, olar aralasatyn, 8 qarashada keshki toǵyzdan tańǵa deıin sóılesip otyrǵan. Bári durys bolǵan. Iá, azdap ursysqan, biraq tóbelesken joq. Ol áli kúnge deıin Saltanattyń mert bolǵanyna senbeıdi, áli kúnge deıin jylap, ókinedi. Qatty shok jaǵdaıynda boldy. Biraq ózine taǵylǵan aıyptarmen kelispeıdi», - deıdi Nazken Qusaıynova.

Bloger Aıda Jeksen eks mınıstrdiń advokaty bergen suhbatty kórgenin jáne jıirkenishti sezimde otyrǵanyn jetkizdi.

«Bul suhbatqa deıin adamdar ádildik ornaıtynyna sense, qazir bul úmit oty sónip qalǵandaı. Eski Qazaqstan oralyp, bári kúshtiń, aqshanyń, qysym kórsetýdiń arqasynda sheshiletindeı kórinedi. Men muny (suhbatty) emosıonaldyq qysym dep baǵalaımyn. Sebebi kásibı advokattar bulaı istemes edi», - deıdi Aıda Jeksenova.

Saltanattyń aǵasy Aıtbek Amangeldi advokattar qoǵamda túrli blogerler, jýrnalıser  arqyly alqabıler sotyn daıyndap jatqanyn aıtady.

«Árıne onyń bári (suhbatta aıtylǵandar) jalǵan ekeni anyq. Keshe oqıǵa bolǵan jerdegi kamera kadrlaryn bóliskenimdi bilesizder. Biraq bul jantúrshigerlik kadrlardyń ber jaǵy ǵana. (...) Jantúrshigerlik kadrlardy biz de, olar da (advokattar) kórdi. Olar qazir nege ony teriske shyǵaryp jatqanyn bilmeımin, túkke paıdasyz dúnıe. Ol materıaldardy sýdıa sotta da kóredi. Olardyń qazirgi ustanymy – bul istiń negizi basqa nusqasy baryn kórsetý, Saltanat basqa nárseden qaıtys bolǵanyn kórsetý. Negizi sot-medısınalyq saraptama tolyq jasaldy, qosymsha saraptama jasaldy. Olardyń nusqasy boıynsha, Saltanatta qandaı da bir sozylmaly aýrý bolǵan nemese ol qulap túsken. Biraq ol qulap túsken bolsa sot-medısınalyq saraptamada belgi bolar edi, biraq ondaı eshteńe tirkelgen joq. Jalpy aıtqanda olar osy suhbat arqyly alqabıler sotyn daıyndap jatyr», - deıdi Aıtbek Amangeldi.

Eske salaıyq, atyshýly oqıǵa 2023 jylǵy 9 qarashada Astana meıramhanalarynyń birinde boldy. Saldarynan burynǵy ulttyq ekonomıka mınıstri Qýandyq Bıshimbaevtyń áıeli Saltanat Núkenova qaıtys boldy. Al eks-shendi qamaýda otyr.


Usynylǵan
Sońǵy jańalyqtar
x