بيشىمبايەۆتىڭ ادۆوكاتتارى قوعامعا قىسىم جاساپ، ەكس مينيستر اقتالىپ شىعا ما؟

كوركەم الدابەرگەنوۆا 23 اقپ. 2024 11:41 5359

ەكس مينيستر قۋاندىق بيشىمبايەۆتىڭ ادۆوكاتى نازكەن قۇسايىنوۆانىڭ سۇحباتى كۇنى كەشە قوعامدا قىزۋ تالقىعا ءتۇستى. سۇحباتتا ادۆوكات قۋاندىق بيشىمبايەۆ مارقۇم ايەلى سالتانات نۇكەنوۆانى ءولتىردىم دەپ سانامايتىنىن ايتقان بولاتىن. ساراپشىلار مەن سالتاناتتىڭ اعاسى ايتبەك امانگەلدى بۇل سۇحباتقا قاتىستى پىكىر ءبىلدىردى، - دەپ حابارلايدى Dalanews.kz.

ايتا كەتەيىك، ايەلىن ءولتىردى دەگەن كۇدىككە ىلىنگەن ەكس-مينيستر قۋاندىق بيشىمبايەۆتىڭ ادۆوكاتتارى «ەلمەدياعا» سۇحبات بەرگەن بولاتىن. سۇحباتتا ادۆوكات نازكەن قۇسايىنوۆا بيشىمبايەۆ  بۇل جاعدايدى قايعىلى جاعداي دەپ باعالاپ وتىرعانىن ايتتى.

«ول ايەلىن اسا  اۋىر قاتىگەزدىكپەن ءولتىردى دەگەندى مويىندامايدى. ول ءالى كۇنگە دەيىن مۇنداي جايت بولعانىنا سەنە الار ەمەس.

ول سالتاناتتى ءالى كۇنگە دەيىن جاقسى كورەدى. ول ءالى كۇنگە دەيىن ونى مەيىرىممەن ەسىنە الادى. ۇردى، اسا اۋىر قاتىگەزدىكپەن ءولتىردى دەگەن بولعان جوق»، - دەيدى نازكەن قۇسايىنوۆا.

ول سالتاناتتىڭ اعاسى قايرات نۇكەنوۆ  ايتقانداي مارقۇمنىڭ دەنەسىندە جاراقاتتار بولماعانىن ايتادى.

«ءيا، كوزىنىڭ استى كوگەرگەن شىعار. باسى جارىلعان جوق، ول ميىنا قان قۇيىلۋدان قايتىس بولدى. سۋبدۋرالدى گەماتومادان. 1 ايداي سوزىلمالى سۋبدۋرالدى گەماتوما بولعان.  ءبىراق ءبىزدىڭ قورعاۋىمىزداعى ادام – قۋاندىق بيشىمبايەۆ گەماتوما پايدا بولعانىن بىلمەدى، سالدارىنان سالتانات قايتىس بولعان. ول بىلگەن جوق. سالتانات ساۋ بولعان، ولار ارالاساتىن، 8 قاراشادا كەشكى توعىزدان تاڭعا دەيىن سويلەسىپ وتىرعان. ءبارى دۇرىس بولعان. ءيا، ازداپ ۇرسىسقان، ءبىراق توبەلەسكەن جوق. ول ءالى كۇنگە دەيىن سالتاناتتىڭ مەرت بولعانىنا سەنبەيدى، ءالى كۇنگە دەيىن جىلاپ، وكىنەدى. قاتتى شوك جاعدايىندا بولدى. ءبىراق وزىنە تاعىلعان ايىپتارمەن كەلىسپەيدى»، - دەيدى نازكەن قۇسايىنوۆا.

بلوگەر ايدا جەكسەن ەكس ءمينيستردىڭ ادۆوكاتى بەرگەن سۇحباتتى كورگەنىن جانە جيىركەنىشتى سەزىمدە وتىرعانىن جەتكىزدى.

«بۇل سۇحباتقا دەيىن ادامدار ادىلدىك ورنايتىنىنا سەنسە، ءقازىر بۇل ءۇمىت وتى ءسونىپ قالعانداي. ەسكى قازاقستان ورالىپ، ءبارى كۇشتىڭ، اقشانىڭ، قىسىم كورسەتۋدىڭ ارقاسىندا شەشىلەتىندەي كورىنەدى. مەن مۇنى (سۇحباتتى) ەموسيونالدىق قىسىم دەپ باعالايمىن. سەبەبى كاسىبي ادۆوكاتتار بۇلاي ىستەمەس ەدى»، - دەيدى ايدا جەكسەنوۆا.

سالتاناتتىڭ اعاسى ايتبەك امانگەلدى ادۆوكاتتار قوعامدا ءتۇرلى بلوگەرلەر، جۋرناليستەر  ارقىلى القابيلەر سوتىن دايىنداپ جاتقانىن ايتادى.

«ارينە ونىڭ ءبارى (سۇحباتتا ايتىلعاندار) جالعان ەكەنى انىق. كەشە وقيعا بولعان جەردەگى كامەرا كادرلارىن بولىسكەنىمدى بىلەسىزدەر. ءبىراق بۇل جانتۇرشىگەرلىك كادرلاردىڭ بەر جاعى عانا. (...) جانتۇرشىگەرلىك كادرلاردى ءبىز دە، ولار دا (ادۆوكاتتار) كوردى. ولار ءقازىر نەگە ونى تەرىسكە شىعارىپ جاتقانىن بىلمەيمىن، تۇككە پايداسىز دۇنيە. ول ماتەريالداردى سۋديا سوتتا دا كورەدى. ولاردىڭ قازىرگى ۇستانىمى – بۇل ءىستىڭ نەگىزى باسقا نۇسقاسى بارىن كورسەتۋ، سالتانات باسقا نارسەدەن قايتىس بولعانىن كورسەتۋ. نەگىزى سوت-مەديسينالىق ساراپتاما تولىق جاسالدى، قوسىمشا ساراپتاما جاسالدى. ولاردىڭ نۇسقاسى بويىنشا، سالتاناتتا قانداي دا ءبىر سوزىلمالى اۋرۋ بولعان نەمەسە ول قۇلاپ تۇسكەن. ءبىراق ول قۇلاپ تۇسكەن بولسا سوت-مەديسينالىق ساراپتامادا بەلگى بولار ەدى، ءبىراق ونداي ەشتەڭە تىركەلگەن جوق. جالپى ايتقاندا ولار وسى سۇحبات ارقىلى القابيلەر سوتىن دايىنداپ جاتىر»، - دەيدى ايتبەك امانگەلدى.

ەسكە سالايىق، اتىشۋلى وقيعا 2023 جىلعى 9 قاراشادا استانا مەيرامحانالارىنىڭ بىرىندە بولدى. سالدارىنان بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ ايەلى سالتانات نۇكەنوۆا قايتىس بولدى. ال ەكس-شەندى قاماۋدا وتىر.


ۇسىنىلعان
سوڭعى جاڭالىقتار
x