Áieli Saltanat Núkenovany óltirdi degen kúdikpen qamaýǵa alynǵan burynǵy ulttyq ekonomka ministri Qýandyq Bishimbaevtiń isi 26 aqpan kúni Astananyń qylmystyq ister jónindegi mamandandyrylǵan aýdanaralyq sotyna túsken bolatyn. Osy tusta kópshilik tarapynan "Sot Bishimbaevqa keshirim berýi múmkin be?", "Bishimbaevty aqtaý naýqanyna" bailanysty is qalai jalǵasyn tappaq?" degen suraqtar jii qoiylatyn boldy. Al kóptiń kókeiinde júrgen bul oiǵa QR Prezidentiniń janyndaǵy Ulttyq qoǵamdyq senim keńes múshesi, quqyq qorǵaýshy, zańger Aigúl Orynbek óz pikirin bildirdi, dep habarlaidy Dalanews.kz.
Qýandyq Bishimbaevqa Qylmystyq kodekstiń eki birdei babymen, iaǵni "Azaptaý" jáne "Asa qatygezdikpen jasalǵan kisi óltirý" baptarymen is qozǵalǵan.
Sonymen qatar dál osy is boiynsha "Gastrotsentr" ortalyǵynyń direktory, ári eks-ministrdiń baýyryna qylmysty jasyrdy degen aiyp taǵylyp otyr.
Qoǵamnyń qyzý talqysyna túsken isti sýdia Aijan Qulbaeva júrgizetini belgili boldy.
Sottyń qai tarapty aqtap shyǵatyny ázirge belgisiz. Alaida BAQ betterinde jariialanǵan aqparttar kópshilikti sarsańǵa salyp, eki oily etip qoiǵany ras.
Sebebi qazirgi tańda "Bishimbaevty aqtaý naýqany" belsendi túrde júrip jatyr. Al kúdiktiniń ákesi Ýálihan Bishimbaevtyń tarapynan jasalyp jatqan mundai áreket eks-sheneýniktiń jazadan jaltarýyna nemese qandai da bir jeńildik alýyna kómekteser me eken?! Bul máselege bailanysty zańger Aigúl Orynbek Dalanews.kz agenttiginiń tilshisi joldaǵan saýalǵa jaýap bere otyryp, óz pikirin ortaǵa saldy. Onyń aitýynsha, rezonans týdyrǵan atalmysh is tikelei Prezidenttiń baqylaýynda bolǵandyqtan, kúdiktiniń jazadan qutylýy múmkin emes.
"Biz quqyqtyq memlekette ómir súremiz. Rezonans týdyrǵan is tipti qoǵam men Prezidentimizdiń tikelei qadaǵalaýynda. Sondyqtan sot ádil úkim shyǵarady dep oilaimyn. Óz balasyn aqtaý maqsatynda jasap jatqan naýqandy durys dep eseptemeimin. Ata zańy bar elde - zań bárinen joǵary bolýy kerek jáne onyń oryndalýyn talap etip otyrmyz. Aýyr qylmys oryn alǵan jaittarda ataq, abyroi degen ról oinamaidy. Qylmys oryn aldy, endi oǵan jazasyn sot beredi", - deidi zańger.
Sonymen qatar ol Bishimbaevtyń advokattary Nazken Qusaiynova men Leila Ramazanovanyń aiyptalýshy tarapty aqtap jatqan áreketine bailanysty jeke baǵasyn berdi. Buǵan deiin qorǵaýshylary kúdiktiniń ýájin aityp, onyń kinásin moiyndamaitynyn jáne Núkenovanyń "sýbdýraldy gematomadan" qaitys bolǵanyn alǵa tartqan edi.
"Birinshiden, gematoma jaidan-jai paida bola salmaidy. Uryp-soǵyp jatqan áreketterin jeliden kórdik. Buǵan sarapshylar naqty óz qorytyndysyn shyǵarady dep oilaimyn. Nazarǵa alatyn derek, bul oqiǵada adam ólimi boldy, ony jasyrýǵa oqtalý da - qylmys. Óz jeke basyn qorǵap, qylmystan qashyp qutylamyn dep, óz týys-jaqyndaryn da bul qylmysqa aralastyryp, qylmysker atandyrǵany - tym ókinishti. Bishimbaevtyń jazasyn jeńildetetin nemese aýyrlatatyn mán-jailar da zań aiasynda anyqtalyp jáne tolyqqandy dáleldenip, sot úkiminde tolyq qamtylýy kerek", - deidi Aigúl Orynbek.
Aitýynsha bul is naqty dáiekter men dálelderge bailanysty qaralýy qajet.
"Taǵy da shegelegim keledi, bul iste aqparattyq shabýyl nemese BAQ tarapynan jariialanyp tarap jatqan túrli materialdardyń áseri emes, naqty bultartpas aiǵaq dálelderge súiený qajet ekenin eskergen jón. Sondyqtan, alyp qashpa áńgime nemese aiyptalýshy tarap advokattarynyń ýáji emes, naqty tergeý áreketteri kórsetken málimetterge sengen durys. Árine, men bul iske alańdaýshylyq tanytyp otyrǵan jurtshylyqty jaqsy túsinemin, sebebi qazirgi kezde halyqtyń sottarǵa degen senimi qalmaǵan. Bizde bári satylady dep oilaidy, sondai uǵym qalyptasqan. Biraq, ýaiymdaýdyń, alańdaýdyń qajet joq. Sebebi, bul isti Prezidenttiń ózi baqylaýynda ustap otyr. Sizderge aitarym, sottyń úkimi zańdy jáne ádil bolatynyna seneiik", - dep sózin qorytyndylady zańger.
Eske salaiyq, byltyr Qýandyq Bishimbaev áieli Saltanat Núkenovany "qatigezdikpen óltirdi" degen kúdikpen qamaýǵa alynǵan edi. Oqiǵa 2023 jyly 9 qarashada Astana qalasyndaǵy BAU meiramhanasynda bolǵan.
