ايەلى سالتانات نۇكەنوۆانى ءولتىردى دەگەن كۇدىكپەن قاماۋعا الىنعان بۇرىنعى ۇلتتىق ەكونومكا ءمينيسترى قۋاندىق بيشىمبايەۆتىڭ ءىسى 26 اقپان كۇنى استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا تۇسكەن بولاتىن. وسى تۇستا كوپشىلىك تاراپىنان "سوت بيشىمبايەۆقا كەشىرىم بەرۋى مۇمكىن بە؟"، "بيشىمبايەۆتى اقتاۋ ناۋقانىنا" بايلانىستى ءىس قالاي جالعاسىن تاپپاق؟" دەگەن سۇراقتار ءجيى قويىلاتىن بولدى. ال كوپتىڭ كوكەيىندە جۇرگەن بۇل ويعا ق ر پرەزيدەنتىنىڭ جانىنداعى ۇلتتىق قوعامدىق سەنىم كەڭەس مۇشەسى، قۇقىق قورعاۋشى، زاڭگەر ايگۇل ورىنبەك ءوز پىكىرىن ءبىلدىردى، دەپ حابارلايدى Dalanews.kz.
قۋاندىق بيشىمبايەۆقا قىلمىستىق كودەكستىڭ ەكى بىردەي بابىمەن، ياعني "ازاپتاۋ" جانە "اسا قاتىگەزدىكپەن جاسالعان كىسى ءولتىرۋ" باپتارىمەن ءىس قوزعالعان.
سونىمەن قاتار ءدال وسى ءىس بويىنشا "گاستروسەنتر" ورتالىعىنىڭ ديرەكتورى، ءارى ەكس-مينيستردىڭ باۋىرىنا قىلمىستى جاسىردى دەگەن ايىپ تاعىلىپ وتىر.
قوعامنىڭ قىزۋ تالقىسىنا تۇسكەن ءىستى سۋديا ايجان قۇلبايەۆا جۇرگىزەتىنى بەلگىلى بولدى.
سوتتىڭ قاي تاراپتى اقتاپ شىعاتىنى ازىرگە بەلگىسىز. الايدا ب ا ق بەتتەرىندە جاريالانعان اقپارتتار كوپشىلىكتى سارساڭعا سالىپ، ەكى ويلى ەتىپ قويعانى راس.
سەبەبى قازىرگى تاڭدا "بيشىمبايەۆتى اقتاۋ ناۋقانى" بەلسەندى تۇردە ءجۇرىپ جاتىر. ال كۇدىكتىنىڭ اكەسى ءۋاليحان بيشىمبايەۆتىڭ تاراپىنان جاسالىپ جاتقان مۇنداي ارەكەت ەكس-شەنەۋنىكتىڭ جازادان جالتارۋىنا نەمەسە قانداي دا ءبىر جەڭىلدىك الۋىنا كومەكتەسەر مە ەكەن؟! بۇل ماسەلەگە بايلانىستى زاڭگەر ايگۇل ورىنبەك Dalanews.kz اگەنتتىگىنىڭ ءتىلشىسى جولداعان ساۋالعا جاۋاپ بەرە وتىرىپ، ءوز پىكىرىن ورتاعا سالدى. ونىڭ ايتۋىنشا، رەزونانس تۋدىرعان اتالمىش ءىس تىكەلەي پرەزيدەنتتىڭ باقىلاۋىندا بولعاندىقتان، كۇدىكتىنىڭ جازادان قۇتىلۋى مۇمكىن ەمەس.
"ءبىز قۇقىقتىق مەملەكەتتە ءومىر سۇرەمىز. رەزونانس تۋدىرعان ءىس ءتىپتى قوعام مەن پرەزيدەنتىمىزدىڭ تىكەلەي قاداعالاۋىندا. سوندىقتان سوت ءادىل ۇكىم شىعارادى دەپ ويلايمىن. ءوز بالاسىن اقتاۋ ماقساتىندا جاساپ جاتقان ناۋقاندى دۇرىس دەپ ەسەپتەمەيمىن. اتا زاڭى بار ەلدە - زاڭ بارىنەن جوعارى بولۋى كەرەك جانە ونىڭ ورىندالۋىن تالاپ ەتىپ وتىرمىز. اۋىر قىلمىس ورىن العان جايتتاردا اتاق، ابىروي دەگەن ءرول وينامايدى. قىلمىس ورىن الدى، ەندى وعان جازاسىن سوت بەرەدى"، - دەيدى زاڭگەر.
سونىمەن قاتار ول بيشىمبايەۆتىڭ ادۆوكاتتارى نازكەن قۇسايىنوۆا مەن لەيلا رامازانوۆانىڭ ايىپتالۋشى تاراپتى اقتاپ جاتقان ارەكەتىنە بايلانىستى جەكە باعاسىن بەردى. بۇعان دەيىن قورعاۋشىلارى كۇدىكتىنىڭ ءۋاجىن ايتىپ، ونىڭ كىناسىن مويىندامايتىنىن جانە نۇكەنوۆانىڭ "سۋبدۋرالدى گەماتومادان" قايتىس بولعانىن العا تارتقان ەدى.
"بىرىنشىدەن، گەماتوما جايدان-جاي پايدا بولا سالمايدى. ۇرىپ-سوعىپ جاتقان ارەكەتتەرىن جەلىدەن كوردىك. بۇعان ساراپشىلار ناقتى ءوز قورىتىندىسىن شىعارادى دەپ ويلايمىن. نازارعا الاتىن دەرەك، بۇل وقيعادا ادام ءولىمى بولدى، ونى جاسىرۋعا وقتالۋ دا - قىلمىس. ءوز جەكە باسىن قورعاپ، قىلمىستان قاشىپ قۇتىلامىن دەپ، ءوز تۋىس-جاقىندارىن دا بۇل قىلمىسقا ارالاستىرىپ، قىلمىسكەر اتاندىرعانى - تىم وكىنىشتى. بيشىمبايەۆتىڭ جازاسىن جەڭىلدەتەتىن نەمەسە اۋىرلاتاتىن ءمان-جايلار دا زاڭ اياسىندا انىقتالىپ جانە تولىققاندى دالەلدەنىپ، سوت ۇكىمىندە تولىق قامتىلۋى كەرەك"، - دەيدى ايگۇل ورىنبەك.
ايتۋىنشا بۇل ءىس ناقتى دايەكتەر مەن دالەلدەرگە بايلانىستى قارالۋى قاجەت.
"تاعى دا شەگەلەگىم كەلەدى، بۇل ىستە اقپاراتتىق شابۋىل نەمەسە ب ا ق تاراپىنان جاريالانىپ تاراپ جاتقان ءتۇرلى ماتەريالداردىڭ اسەرى ەمەس، ناقتى بۇلتارتپاس ايعاق دالەلدەرگە سۇيەنۋ قاجەت ەكەنىن ەسكەرگەن ءجون. سوندىقتان، الىپ قاشپا اڭگىمە نەمەسە ايىپتالۋشى تاراپ ادۆوكاتتارىنىڭ ءۋاجى ەمەس، ناقتى تەرگەۋ ارەكەتتەرى كورسەتكەن مالىمەتتەرگە سەنگەن دۇرىس. ارينە، مەن بۇل ىسكە الاڭداۋشىلىق تانىتىپ وتىرعان جۇرتشىلىقتى جاقسى تۇسىنەمىن، سەبەبى قازىرگى كەزدە حالىقتىڭ سوتتارعا دەگەن سەنىمى قالماعان. بىزدە ءبارى ساتىلادى دەپ ويلايدى، سونداي ۇعىم قالىپتاسقان. ءبىراق، ۋايىمداۋدىڭ، الاڭداۋدىڭ قاجەت جوق. سەبەبى، بۇل ءىستى پرەزيدەنتتىڭ ءوزى باقىلاۋىندا ۇستاپ وتىر. سىزدەرگە ايتارىم، سوتتىڭ ۇكىمى زاڭدى جانە ءادىل بولاتىنىنا سەنەيىك"، - دەپ ءسوزىن قورىتىندىلادى زاڭگەر.
ەسكە سالايىق، بىلتىر قۋاندىق بيشىمبايەۆ ايەلى سالتانات نۇكەنوۆانى "قاتىگەزدىكپەن ءولتىردى" دەگەن كۇدىكپەن قاماۋعا الىنعان ەدى. وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولعان.
