Quqyq qorǵaý organdary qoldan kelgenshe jumys atqaryp jatsa da, jaóspirimder arasyndaǵy qylmys joiylar emes. Biraz ýaqyt buryn Baizaq aýdanynda bolǵan qaiǵyly oqiǵadan qoǵam sabaq alatyn kúnniń aýyly alys sekildi.
Oblys ákimdigi janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi komissiianyń otyrysynda óńirdegi jasóspirimder máselesi jan jaqty zerdelengen. Birneshe aýdan ákiminiń orynbasary men Taraz qalasy ákiminiń orynbasary baiandama jasaǵan jiynda birqatar másele saralandy. Jasóspirimder arasyndaǵy quqyq buzýshylyqty joiý boiynsha atqarylyp jatqan jumystar tyńdaldy.
Halyq tyǵyz ornalasqandyqtan oblys ortalyǵy Taraz qalasyndaǵy derekterge den qoiǵandy jón kórdik. Taraz qalasy ákiminiń orynbasary Qairat Ismail keltirgen derekke júginsek, 9 ai qorytyndysy boiynsha qala aýmaǵynda kámeletke tolmaǵandardyń qatysýymen 37 qylmys jasalǵan. Salystyrmaly túrde kórsetkish 5,1 paiyzǵa tómendegenimen, jaóspirimder arasyndaǵy quqyq búzýshylyqtyń otyzdan asyp jyǵylǵany kimdi de bolsa oilandyrsa kerek-ti.
«Osy 37 qylmysty 37 jasóspirim jasaǵan bolsa, sonyń ishinde: mektep oqýshylarymen -18 qylmys, kolledj bilimgerlerimen -16 qylmys jasalǵan. 2024 jyl 9 ai qorytyndysy boiynsha kámeletke tolmaǵandarǵa qatysty jasalǵan – 53 qylmys tirkelgen (2023 -54) 1 derekke nemese – 1,9 % tómendegen», deidi qala ákiminiń orynbasary.
Jalpy oblys boiynsha basshysy joq mektepter az emes. Jyl basyndaǵy derekke sensek, 59 mektep direktorsyz qalǵan bolatyn. Al jańa oqý jyly bastalar shaqta oblys tyq bilim basqarmasynyń basshysy Raýan Sadyrqulov kórsetkishtiń 17-ge azaiǵanyn aitqan edi.
«Basqarmaǵa basshy bolyp kelgenimde 59 oryn bos bolatyn. Tórtinshi sáýirden beri tórt márte konkýrs uiymdastyrdyq. Nátijesinde, 17 mektep direktory taǵaiyndaldy. Direktorsyz qalǵan bilim oshaqtarynyń sanyn bastaýysh mektepter arttyryp otyr. Ol jerde direktor emes, ádisker dep atalady. Jalaqysynda 10 myń teńge ǵana aiyrmashylyq bolǵandyqtan, mamandar ol qyzmetke qyzyǵýshylyq tanytpaidy. Konkýrstyń basym kópshiligi osylarǵa uiymdastyrylyp jatyr. Jaqynda besinshi márte konkýrs jariialadyq. Onyń nátijesi besinshi qyrkúiek kúni shyǵady», degen basqarma basshysynyń sózi jadymyzda.
Qysqasy, jańa oqý jyly aldynda 42 mektep direktorynyń orny bos bolǵan. Bir-eki aidyń bederinde bul kórsetkish aitarlyqtai azaia qoimaǵan shyǵar. Kim bilsin... Olai deýimizdiń sebebi de joq emes. Birneshe aida 17 direktor taǵaiyndalsa, 1-2 aida qansha direktor taǵaiyndalatynyn boljaýdyń ózi qiyn...
Árine, mekteptiń búkil máselesine direktor jaýap beredi. Oblystyq «Aq jol» gazetinde jariialanǵan derekke sensek, Taraz qalalyq bilim bólimi tarapynan balalar tóbelesi úshin №21 mektep direktoryna sógis berilipti. Sonymen qatar, №2 jáne №35 mektep direktorlary qyzmetinen bosatylypty. Al komissiia otyrysynda keltirilgen derekte qaladaǵy mektepterde oqityn balalardyń qatysýymen 18 qylmys jasalypty. Árine, az emes.
Joǵaryda jergilikti basylymda jariialanǵan maqalada birneshe mektep direktorynyń qandai jaza arqalaǵany týraly derek keltirdik. Áitkenmen, óńirde direktor defitsit bolyp turǵanyn da umytpaǵan jón. Jalpy jasóspirimder qylmysyna qatysty ondaǵan derekter tirkelip jatqanyna qaramastan, direktorlar tutylyp, bilim bóliminiń basshylary jazadan qutylyp ketip jatady. Bunyń syry nede? Qalada tirkelgen derekter úshin qalalyq bilim bólimi qanshalyqty jaýapty? Bul máselege jergilikti atqaminerler bir jaýap berer degen oidamyz.
Árine, jasópirimder arasyndaǵy qylmyspen qoǵam bop kúreskende ǵana oń nátije shyǵýy múmkin. Birinshi kezekte ata-ananyń jaýapkershiligi zor ekeni aitpasa da túsinikti. Áitse de, naqty máselege kelgende direktorlar ǵana jaza arqalap jatatyny tańdai qaqtyrmai qoimaidy. Álde óńirlerdegi máselelerge Memleket basshysy nazar aýdarǵanda ǵana jaǵdai ózgere me? Birer jyl buryn Tarazdaǵy mektep dárethanasynyń daýy Prezidenttiń qulaǵyne jetip, Memleket basshysynyń pármenimen qala ákimi oryntaǵyn bosatyp edi. Mektep basshylaryn jazalai berýdiń sońy taǵy bir tragediiaǵa aparmasa deimiz.
