– Elordamyzdyń basty qujaty – bas jospar, ony negizge ala otyryp, biz «Nur-Sultan – jaily qala» master-josparyn ázirledik. Elorda jańa ǵana kóshken kezde qalada shamamen 260-270 myń adam boldy. Búginde halyq sany 1 mln 200 myń adamdy quraidy. Ózderińiz biletindei, bastapqyda bas josparda bul jerde 800 myń adam ómir súredi dep boljanǵan edi. Biraq ýrbanizatsiia protsesi qarqyndy damyp, adamdar qolaily jaǵdailar jasalǵan jerde ómir súrgisi keledi. Jyl saiyn biz turǵyndardyń 55-60 myń adamǵa ósetinin baiqap otyrmyz. Tiisinshe mektepterdi kóptep salýymyz kerek. Mamyr aiynda 7 myń túlek mektep bitirdi, al qyrkúiekte 14 myń birinshi synyp oqýshysyn qabyldadyq. Iaǵni, ósim 3 ese ekenin baiqaýǵa bolady. Demek, biz pedagogtardy kóbirek daiyndaýymyz qajet, oqýshy oryndaryn kóbirek ashýymyz kerek, – dep atap ótti ákim.
Altai Kólginov sondai-aq, elordany damytýdyń bas jospary jańa jaǵdailardy eskere otyryp, árbir 10 jyl saiyn túzetilip otyratynyn atap ótti.
– 2010 jyly bas jospardy túzetý kezinde 2030 jyly elorda halqynyń sany 1 mln 200 myń adamdy quraidy dep boljadyq. Biraq bul kórsetkishke biz 2020 jyly qol jetkizdik. Qazir biz bas jospardy qazirgi jaǵdailar men jańa boljamdardy eskere otyryp túzetýdemiz. Máselen, 2030 jyly 2 mln halyq bolady dep boljanyp otyr. Bul injenerlik, jol infraqurylymyna qosymsha salmaq. Qazir biz trafikti jeńildetý úshin qosymsha kópirler salyp jatyrmyz. Biyl kópirdi jańa vokzal jaǵyna ótkizemiz, Uly dala kóshesin keńeitemiz, Táýelsizdik kóshesindegi kópirdiń qurylysyn bastaimyz, – dep túsindirdi qala basshysy.
Onyń aitýynsha, búginde elordanyń ár aýdanynda 300 myńnan astam adam turady. Osyǵan bailanysty qalada áleýmettik infraqurylym salynýda. Máselen, 2019 jyly Nur-Sultanda 6 mektep, 2020 jyly 11 mektep salyndy, osy jyldyń sońyna deiin 15 mektep salynady, olardyń basym bóligi óz esigin aiqara ashty, bul 40 myń jańa oqýshy oryndaryn qurýǵa múmkindik beredi.
[video width="1920" height="1080" mp4="https://dalanews.kz/wp-content/uploads/2021/10/plan_6Amcf3gY.mp4"][/video]
Master-jospar qoljetimdi turǵyn úi qurylysynyń ósýin de kózdeidi. 2018 jyly qalada 1100 áleýmettik páterge arnalǵan turǵyn úi salyndy, 2019 jyly – 2900 páter, 2020 jyly – 7 myń páter, 2021 jyly bul sandy 10 myńǵa jetkizý josparlanyp otyr.
– «Nur-Sultan – jaily qala» master-jospary qandai? Qala eń aldymen adam úshin yńǵaily bolýy kerek. Halyqtyń qajettiligi, onyń ishinde – qoǵamdyq keńistikterge, velojoldarǵa, jaiaý júrginshiler aimaqtaryna, qarapaiym ǵana saiabaqtarǵa, skverlerge, əleýmettik jáne basqa da tirshilik etý nysandaryna qajettilik ósýde. Qala turaqty, saý jáne ekologiialyq taza bolýy kerek. Bul máseleler bizdi tolǵandyrady, bul qadamdardy ýaqyt talabyna sai bolý úshin jasap jatyrmyz, – dep ákim sózin túiindedi.
