– ەلوردامىزدىڭ باستى قۇجاتى – باس جوسپار، ونى نەگىزگە الا وتىرىپ، ءبىز «نۇر-سۇلتان – جايلى قالا» ماستەر-جوسپارىن ازىرلەدىك. ەلوردا جاڭا عانا كوشكەن كەزدە قالادا شامامەن 260-270 مىڭ ادام بولدى. بۇگىندە حالىق سانى 1 ملن 200 مىڭ ادامدى قۇرايدى. وزدەرىڭىز بىلەتىندەي، باستاپقىدا باس جوسپاردا بۇل جەردە 800 مىڭ ادام ءومىر سۇرەدى دەپ بولجانعان ەدى. ءبىراق ۋربانيزاسيا پروسەسى قارقىندى دامىپ، ادامدار قولايلى جاعدايلار جاسالعان جەردە ءومىر سۇرگىسى كەلەدى. جىل سايىن ءبىز تۇرعىنداردىڭ 55-60 مىڭ ادامعا وسەتىنىن بايقاپ وتىرمىز. تيىسىنشە مەكتەپتەردى كوپتەپ سالۋىمىز كەرەك. مامىر ايىندا 7 مىڭ تۇلەك مەكتەپ ءبىتىردى، ال قىركۇيەكتە 14 مىڭ ءبىرىنشى سىنىپ وقۋشىسىن قابىلدادىق. ياعني، ءوسىم 3 ەسە ەكەنىن بايقاۋعا بولادى. دەمەك، ءبىز پەداگوگتاردى كوبىرەك دايىنداۋىمىز قاجەت، وقۋشى ورىندارىن كوبىرەك اشۋىمىز كەرەك، – دەپ اتاپ ءوتتى اكىم.
التاي كولگىنوۆ سونداي-اق، ەلوردانى دامىتۋدىڭ باس جوسپارى جاڭا جاعدايلاردى ەسكەرە وتىرىپ، ءاربىر 10 جىل سايىن تۇزەتىلىپ وتىراتىنىن اتاپ ءوتتى.
– 2010 جىلى باس جوسپاردى تۇزەتۋ كەزىندە 2030 جىلى ەلوردا حالقىنىڭ سانى 1 ملن 200 مىڭ ادامدى قۇرايدى دەپ بولجادىق. ءبىراق بۇل كورسەتكىشكە ءبىز 2020 جىلى قول جەتكىزدىك. ءقازىر ءبىز باس جوسپاردى قازىرگى جاعدايلار مەن جاڭا بولجامداردى ەسكەرە وتىرىپ تۇزەتۋدەمىز. ماسەلەن، 2030 جىلى 2 ملن حالىق بولادى دەپ بولجانىپ وتىر. بۇل ينجەنەرلىك، جول ينفراقۇرىلىمىنا قوسىمشا سالماق. ءقازىر ءبىز ترافيكتى جەڭىلدەتۋ ءۇشىن قوسىمشا كوپىرلەر سالىپ جاتىرمىز. بيىل كوپىردى جاڭا ۆوكزال جاعىنا وتكىزەمىز، ۇلى دالا كوشەسىن كەڭەيتەمىز، تاۋەلسىزدىك كوشەسىندەگى كوپىردىڭ قۇرىلىسىن باستايمىز، – دەپ ءتۇسىندىردى قالا باسشىسى.
ونىڭ ايتۋىنشا، بۇگىندە ەلوردانىڭ ءار اۋدانىندا 300 مىڭنان استام ادام تۇرادى. وسىعان بايلانىستى قالادا الەۋمەتتىك ينفراقۇرىلىم سالىنۋدا. ماسەلەن، 2019 جىلى نۇر-سۇلتاندا 6 مەكتەپ، 2020 جىلى 11 مەكتەپ سالىندى، وسى جىلدىڭ سوڭىنا دەيىن 15 مەكتەپ سالىنادى، ولاردىڭ باسىم بولىگى ءوز ەسىگىن ايقارا اشتى، بۇل 40 مىڭ جاڭا وقۋشى ورىندارىن قۇرۋعا مۇمكىندىك بەرەدى.
[video width="1920" height="1080" mp4="https://dalanews.kz/wp-content/uploads/2021/10/plan_6Amcf3gY.mp4"][/video]
ماستەر-جوسپار قولجەتىمدى تۇرعىن ءۇي قۇرىلىسىنىڭ ءوسۋىن دە كوزدەيدى. 2018 جىلى قالادا 1100 الەۋمەتتىك پاتەرگە ارنالعان تۇرعىن ءۇي سالىندى، 2019 جىلى – 2900 پاتەر، 2020 جىلى – 7 مىڭ پاتەر، 2021 جىلى بۇل ساندى 10 مىڭعا جەتكىزۋ جوسپارلانىپ وتىر.
– «نۇر-سۇلتان – جايلى قالا» ماستەر-جوسپارى قانداي؟ قالا ەڭ الدىمەن ادام ءۇشىن ىڭعايلى بولۋى كەرەك. حالىقتىڭ قاجەتتىلىگى، ونىڭ ىشىندە – قوعامدىق كەڭىستىكتەرگە، ۆەلوجولدارعا، جاياۋ جۇرگىنشىلەر ايماقتارىنا، قاراپايىم عانا ساياباقتارعا، سكۆەرلەرگە، الەۋمەتتىك جانە باسقا دا تىرشىلىك ەتۋ نىساندارىنا قاجەتتىلىك وسۋدە. قالا تۇراقتى، ساۋ جانە ەكولوگيالىق تازا بولۋى كەرەك. بۇل ماسەلەلەر ءبىزدى تولعاندىرادى، بۇل قادامداردى ۋاقىت تالابىنا ساي بولۋ ءۇشىن جاساپ جاتىرمىز، – دەپ اكىم ءسوزىن تۇيىندەدى.
