Dalanews.kz osy maqsatta arnaiy jiyn ótkizgen "Elge qaitarý" qoǵamdyq qorynyń quryltaishylary Bolat Ábilov pen Orazaly Erjanovtyń talabyn tyńdap qaitqan-dy.
Túsingenimiz, Býtia bastaǵan belsendiler elimizdegi bai-manaptardyń aram jolmen tapqan aktivterin elge qaitarýǵa bilek sybana kirisken eken. "Mashkevichtiń Eýraziialyq toby 2017-2021 jyldary eldiń en bailyǵyn tespei soryp, qazaqtardy shyǵynǵa batyrdy", – deidi qor músheleri.
ERG-diń korporativti esebine qaraǵanda "Eýraziialyq top":
2017 jyly 2,09 mlrd dollar;
2018 jyly 1,913 mlrd dollar;
2019 jyly 1,538 mlrd dollar;
2020 jyly 2,23 mlrd dollar;
2021 jyly 4,210 mlrd dollar TAZA paida tapqan.
Ainalasy 5 jylda Mashkevichke tiesili Eýraziialyq top jiyn-terimi 11,774 mlrd dollardy qaltaǵa basqan.
Dál osy aralyqta (2017-2021 jyldary) Eýraziialyq top Qazaqstanǵa iaǵni, el biýdjetine tapqan tabysynyń 40%-yn divident retinde tóleýge mindettelgen. Maishekeniń osy kólemde Úkimetke dividend tóleýi kerektigin Qarjymin Nege aqparat portalyna joldaǵan hatynda da taiǵa tańba basqandai anyq jazyp, kórsetken.
Dalanews.kz-tiń esebinshe bul shamamen 4-5 mlrd dollardyń tóńiregindegi surapyl aqsha.
Endi myna paradoksqa nazar aýdaryńyz:
Jalpaq tilmen aitqanda Mashkevich Úkimetti "laqtyryp" ketken. Osy aralyqta Maishekeniń biýdjetke aýdarǵan aqshasy "mizer": bar bolǵany 365 mln dollar!
Týrasyn aitqanda, Eýraziialyq top memlekettiń qazynasyn qampaitýǵa tiisti milliardtardy qaltaǵa basqan.
Eń qyzyǵy, sol tustaǵy Úkimet te buǵan kóz juma qarap, Maishekeniń esep-shotynan aýdarylǵan jarymaǵan 365 mln-dy mise tutqan...
Bolat Ábilov "jabýly qazannyń qaqpaǵyn qaita ashyp kórmekke" bekinip otyr. Mashkevichtiń jemsaýynda ketken jurttyń aqshasyn qaitarý kerek deidi.
"Sol tustaǵy Úkimet músheleri Marat Beketaev, Baqyt Sultanov, Beibit Atamqulovtardyń salǵyrttyǵynan qazynamyz milliardtaǵan dollardan qaǵyldy", – deidi "Elge qaitarý" qoǵamdyq qorynyń quryltaishylary.
Býtianyń aýzymen aitylǵan taǵy bir inside:
Qańtarda, Qazaqstanda búlik bastalǵanyn qulaǵy shalǵan Mashkevich Eýropada tirkelgen enshiles kompaniiaǵa qaryz kerek degendi jeleý etip, eldegi 1,1 mlrd dollardy shetel asyryp jibergenin.
Qańtarda el qan-josa bolyp, qara jamylǵan sátte Maishekeniń kompaniiasy qazaqtyń jer asty bailyǵyn satyp tapqan qarajatty shetel asyrýdan qoly bosamaǵan.
Ábilovtyń málim etkenindei Qańtardyń qarsańynda Eýraziialyq top taǵy 500 mln dollardy shetelge shyǵarǵan. Osylaisha Mashkevichtiń kompaniiasy bir aidyń aralyǵynda 1,6 mlrd dollardy elden jylystatqan.
Sharaǵa qatysqan qarjyger Eskendir Beisembetov: "Qazaqstanda 1 mlrd dollarǵa 50 myń jumys ornyn ashýǵa bolady", – deidi.
Býtia bastaǵan belsendiler Mashkevichtiń izine túsip, shetel asqan aqshany qaitarýdy kózdep otyr.
Sondai-aq, qor belsendileri Toqaevtyń shettegi kapitaldy qaitarý týraly sheshim qoldaitynyn, biraq Úkimetbasy Smailovtyń sylbyrlyq tanytyp otyrǵanyn synǵa aldy.
