Aqmola oblysynda «Býrabai» ulttyq parkiniń aýmaǵyndaǵy jer telimderine qatysty úlken sot daýy bastaldy, dep habarlaidy Dalanews.kz.
Oblystyq jer resýrstaryn basqarý departamenti kásipker Maira Nurtýrinaǵa, Bolat Marjyqpaevqa jáne Býrabai aýdandyq jer qatynastary bólimine qatysty sotqa talap-aryz bergen. Sotqa shaǵym túsirýge erekshe qorǵalatyn tabiǵi aýmaqtaǵy jer telimderin zańsyz túrde jeke tulǵalarǵa berý máselesi sebep bolǵan.
Zań boiynsha, ulttyq parkter men erekshe qorǵalatyn tabiǵi aýmaqtar halyq menshiginde bolýy tiis jáne jeke menshikke berilmeidi. Mundai aýmaqty basqa sanatqa aýystyrý tek erekshe jaǵdailarda ǵana – Úkimettiń arnaiy sheshimimen jáne mindetti ekologiialyq saraptamadan keiin múmkin. Biraq bul joly atalǵan talaptar oryndalmaǵan.
Aýyl sharýashylyǵy vitse-ministri Erbol Tasjúrekovtyń aitýynsha, jer telimderin berý kezinde ekologiialyq saraptamanyń oń qorytyndysy men Úkimet sheshimi múldem joq.
«QR Azamattyq kodeksiniń 158-babyna sáikes, zań talaptaryna sai kelmeitin mámileler sot arqyly jaramsyz dep tanylady. Eger mámileniń maqsaty quqyqtyq tártipke ádeii qaishy kelse, sot bul kelisimderdi zańsyz dep tanýy tiis», – deidi vitse-ministr.
Jer daýyna qatysy bar Bolat Marjyqpaev – Aqmola oblysynyń burynǵy ákimi Ermek Marjyqpaevtyń týǵan baýyry bolýy múmkin degen aqparat bar. Ermek Marjyqpaev 2019–2023 jyldar aralyǵynda Aqmola oblysynyń ákimi qyzmetin atqarǵan, keiin Týrizm jáne sport ministri boldy. Qazir Premer-ministrdiń keńesshisi retinde qyzmet etip júr.
Ashyq derekkózderge súiensek, Bolat Marjyqpaev «Bereke-Býrabai» kompaniiasyna 2009–2015 jyldar aralyǵynda quryltaishy bolǵan. Bul kompaniiaǵa Býrabaida birneshe qonaqúi men sanatorii tiesili ekeni belgili. Atap aitsaq, «Grand Hotel Burabay», «Alem Pliýs», «Nýrsat», «Injý» qonaqúileri jáne «Bereke» sanatoriii.
Al 1995 jyldan 2008 jylǵa deiin bul kompaniiany Ermek Marjyqpaevtyń ózi basqarsa, 2015 jyldan bastap qazirgi ýaqytqa deiin onyń jubaiy basqaryp keledi.
Material Nege.kz portalynyń aqparaty negizinde ázirlendi.
