اقمولا وبلىسىندا «بۋراباي» ۇلتتىق پاركىنىڭ اۋماعىنداعى جەر تەلىمدەرىنە قاتىستى ۇلكەن سوت داۋى باستالدى، دەپ حابارلايدى Dalanews.kz. 

وبلىستىق جەر رەسۋرستارىن باسقارۋ دەپارتامەنتى كاسىپكەر مايرا نۇرتۋريناعا، بولات مارجىقپايەۆقا جانە بۋراباي اۋداندىق جەر قاتىناستارى بولىمىنە قاتىستى سوتقا تالاپ-ارىز بەرگەن. سوتقا شاعىم تۇسىرۋگە ەرەكشە قورعالاتىن تابيعي اۋماقتاعى جەر تەلىمدەرىن زاڭسىز تۇردە جەكە تۇلعالارعا بەرۋ ماسەلەسى سەبەپ بولعان.

زاڭ بويىنشا، ۇلتتىق پاركتەر مەن ەرەكشە قورعالاتىن تابيعي اۋماقتار حالىق مەنشىگىندە بولۋى ءتيىس جانە جەكە مەنشىككە بەرىلمەيدى. مۇنداي اۋماقتى باسقا ساناتقا اۋىستىرۋ تەك ەرەكشە جاعدايلاردا عانا – ۇكىمەتتىڭ ارنايى شەشىمىمەن جانە مىندەتتى ەكولوگيالىق ساراپتامادان كەيىن مۇمكىن. ءبىراق بۇل جولى اتالعان تالاپتار ورىندالماعان.

اۋىل شارۋاشىلىعى ۆيسە-مينيسترى ەربول تاسجۇرەكوۆتىڭ ايتۋىنشا، جەر تەلىمدەرىن بەرۋ كەزىندە ەكولوگيالىق ساراپتامانىڭ وڭ قورىتىندىسى مەن ۇكىمەت شەشىمى مۇلدەم جوق.

«ق ر ازاماتتىق كودەكسىنىڭ 158-بابىنا سايكەس، زاڭ تالاپتارىنا ساي كەلمەيتىن مامىلەلەر سوت ارقىلى جارامسىز دەپ تانىلادى. ەگەر مامىلەنىڭ ماقساتى قۇقىقتىق تارتىپكە ادەيى قايشى كەلسە، سوت بۇل كەلىسىمدەردى زاڭسىز دەپ تانۋى ءتيىس»، – دەيدى ۆيسە-مينيستر.

جەر داۋىنا قاتىسى بار بولات مارجىقپايەۆ – اقمولا وبلىسىنىڭ بۇرىنعى اكىمى ەرمەك مارجىقپايەۆتىڭ تۋعان باۋىرى بولۋى مۇمكىن دەگەن اقپارات بار. ەرمەك مارجىقپايەۆ 2019–2023 جىلدار ارالىعىندا اقمولا وبلىسىنىڭ اكىمى قىزمەتىن اتقارعان، كەيىن تۋريزم جانە سپورت ءمينيسترى بولدى. ءقازىر پرەمەر-مينيستردىڭ كەڭەسشىسى رەتىندە قىزمەت ەتىپ ءجۇر.

اشىق دەرەككوزدەرگە سۇيەنسەك، بولات مارجىقپايەۆ «بەرەكە-بۋراباي» كومپانياسىنا 2009–2015 جىلدار ارالىعىندا قۇرىلتايشى بولعان. بۇل كومپانياعا بۋرابايدا بىرنەشە ءقوناقۇي مەن ساناتوريي تيەسىلى ەكەنى بەلگىلى. اتاپ ايتساق، «Grand Hotel Burabay»، «الەم پليۋس»، «نۋرسات»، «ءىنجۋ» قوناقۇيلەرى جانە «بەرەكە» ءساناتورييى.

ال 1995 جىلدان 2008 جىلعا دەيىن بۇل كومپانيانى ەرمەك مارجىقپايەۆتىڭ ءوزى باسقارسا، 2015 جىلدان باستاپ قازىرگى ۋاقىتقا دەيىن ونىڭ جۇبايى باسقارىپ كەلەدى.

ماتەريال Nege.kz پورتالىنىڭ اقپاراتى نەگىزىندە ازىرلەندى.