Májilis depýtaty Dáýlet Muqaev Kaspi bankiniń qyzmetine qatysty pikir bildirip, áleýmettik jelide úlken talqy týdyrdy, dep habarlaidy Dalanews.kz.
Depýtat Threads jelisinde jazǵan jazbasynda Kaspi.kz bankin sarańdyq tanytyp otyr dep aiyptady. Onyń aitýynsha, bank arqyly jasalatyn tólemder úshin beriletin keshbek óte az – bar bolǵany 0,25%. Sonymen qatar bank jyl saiynǵy qyzmet kórsetý úshin 1 995 teńge alady jáne basqa bankke aqsha aýdarǵanda komissiia ustaidy.
“Kaspi-de 12 millionnan astam tutynýshy bar. Eger árqaisysynan osyndai tólemder alynsa, qanshalyqty tabys túsetinin eseptei berińizder. Bul bank naǵyz monopolistke ainaldy. Bilgenin isteidi,” – dep jazdy Muqaev.
Bloger keibir bankterdiń klientterge tiimdirek usynystar jasap jatqanyn atap ótti. Onyń aitýynsha, keibir bankter orta eseppen 5-10% keshbek usynsa, arnaiy aktsiialar kezinde bul kórsetkish 30%-ǵa deiin jetedi.
“100 myń teńge jumsasańyz, shamamen 10-12 myń teńge keshbek retinde qaityp keledi. Onymen telefon tarifin, internet qyzmetin tólep tastaýǵa bolady. Al Kaspi-de mundai somadan bar bolǵany 250 teńge bonýs jinalady,” – deidi ol.
Muqaev basqa bankterde qyzmet kórsetý aqysy 0 teńge, aýdarymdar úshin komissiia joq, tipti keibir bankterdiń kartalarymen qoǵamdyq kólikte tegin júrýge bolatynyn aitady.
“Kaspi qoldanýǵa yńǵaily shyǵar, biraq aqshany únemdeý turǵysynan tiimsiz. Sondyqtan jańa jylda bank aýystyratyn kez kelgen siiaqty,” – dep túiindedi bloger.
