Britandyq avtorlardyń kitaptary qazaq tilinde jaryq kórdi
Onlain rejimde ótken tanystyrylymǵa Qazaqstan Respýblikasynyń Birikken Ulybritaniia Koroldigi men Soltústik Irlandiiadaǵy Tótenshe jáne Ókiletti elshisi Erlan Ydyrysov qatysyp, Qazaqstan tarihy men halqynyń ómirine qatysty osy kitaptyń el Táýelsizdiginiń 30 jyldyǵy qarsańynda aýdarylyp, basylyp shyǵýynyń máni zor ekenin atap ótti.
– Mundai sharalar táýelsiz eki el arasyndaǵy rýhani bailanysty odan ári nyǵaitýǵa yqpal etetin bastama dep bilemin. Qos jinaq derekkóz retinde qazaq oqyrmandaryna mańyzy eleýli, ári qyzyqty shyǵarma bolady dep oilaimyn, – dedi Erlan Ydyrysov.
Kezdesýde «Tomas, Liýsi jáne Alataý» kitabynyń avtory Djon Meisen Stiýart óz áserin jetkizdi.
– Saparymda men Qazaqstannyń ózime jaqyndyǵyn sezindim. Sondyqtan shyǵarmamnyń kópshilik qaýymǵa keń taralatynyna qýanyshtymyn. Osy saltanatty sharany paidalana otyryp, barsha qazaqstandyqtardy Táýelsizdik kúnimen quttyqtaimyn! – dedi britandyq avtor.
Eske salsaq, Djon Massi Stiýarttyń «Tomas, Liýsi jáne Alataý» kitaby HIH ǵasyrdaǵy qazaq halqynyń turmys-saltyn, mádenietin, tabiǵatynyń tamashasyn beinelep jazǵan saiahatshylardyń kúndelikteri negizinde jazylǵan. Munda, ásirese kieli sý sanalatyn Tamshybulaq jaily erekshe tolǵanyspen aitylady. Tabiǵat ásemdigi saiahatshylar Tomas pen Liýsidi tańǵaldyrǵany sondai Alataýdyń eteginde dúniege kelgen uldaryna Alataý Tamshybulaq dep at qoiǵan.
Beinebailanysta «Uly Dala saiahatshylary» kitabynyń avtory Nik Filding te sóz alyp, rizashylyǵyn jetkizdi.
– Birinshi kezekte kitabymdy aýdarýǵa niet tanytqandaryńyzǵa jáne ony basyp shyǵaryp, tanystyryp jatqandaryńyzǵa shyn júrekten qýanyshtymyn. Qazaqstanǵa jasaǵan saparym áli esimde. Ondaǵy halyqtyń qonaqjailyǵy esimde saqtalyp qaldy. Sizderdiń eldiń halqy, dástúr-salty maǵan úlken áser etti, – dedi Nik Filding.
Shara barysynda oblys ákiminiń orynbasary Batyrjan Baijumanov:
– «Rýhani jańǵyrý» baǵdarlamasynyń «100 jańa oqýlyq» jobasy – Qazaqstannyń aqyl-oi men bilimge umtylǵan, áleýmettik jaǵynan jaýapkershiligi mol jastardy qalyptastyrýǵa baǵyttalǵan tyń bastama. Sonyń arqasynda biz tarihi muralarymdy saqtaýǵa, jastarǵa rýhani tárbie berýge baǵyttalǵan jobany qolǵa alyp, aýdaryp basyp otyrmyz, – dedi.
Buǵan deiin 2016 jyly Tomas Atkinsonnyń urpaqtary Qazaqstanǵa kelip, ertedegi oqiǵalardyń tynysyn sezinip, ata-babalary júrgen joldarmen júrip ótti. Keiin Atkinsondardyń saiahaty týraly eki kitap – Djon Massi Stiýarttyń «Tomas, Liýsi jáne Alataý: Atkinsondardyń Sibirde jáne Shyǵys Qazaqstanda basynan keshkenderi» jáne Nik Fildingtiń «Uly Dalanyń ońtústigine: Tomas jáne Liýsi Atkinsondardyń Shyǵys Qazaqstanǵa saparlary» kitaptary jazyldy.
