«SQ-Farmatsiia» Jarǵydaǵy talapqa júre qaraǵan
«SQ-Farmatsiia» kompaniiasynyń ózine júktelgen mindetti durys atqarmai otyrǵanyn Qaiyrǵali Qonaev ta kópten beri aityp júrgenin bilemiz.
Ol óziniń Feisbýktaǵy jazbasynda «SQ-Farmatsiia» kompaniiasy óziniń Jarǵysynda dári-dármekti tikelei óndirýshilerdiń zaýytynan satyp alý kerek degen múlde oryndamaitynyn aitypty.
– «SQ-Farmatsiia» halyq múddesin kózdeitin bul talapty eshqashan paidalanǵan emes, – dep ókpe-renishin bildirip, bulaisha paiymdaýyna ne sebep bolǵanyn bylaisha tápsirleidi balalar dárigeri.
Bilikti dáriger «SQ-Farmatsiia» búkil álem qaýipsiz ári tiimdi sanaityn dári-dármekterdi elge ákelmeitinin aita kele, kompaniia sapaly túpnusqa dárilerdiń analog dárilerdi ákelip, Qazaqstan halqynyń densaýlyǵyn kúittep... júrgenin ashyp aitypty.
Sapaly dáriniń balamasyn qymbatqa satyp alǵan
Qaiyrǵali Qonaevtyń aitýynsha, «SQ-Farmatsiia» túpnusqa dárilerdiń balamasyn, iaǵni, álsiz túrin qymbat baǵaǵa satyp alyp, memleket qarajasyn jelge ushyrýmen ainalysqan. Endi Qaiyrǵali Qonaevtyń jazbasyndaǵy naqty málimetterge toqtalsaq,
– Kompaniianyń qaterli isikke qarsy qymbat dárilerdi satyp alýynan biraz bylyqty baiqaýǵa bolady. Ashyq derekkózderinde Almaty onkologiialyq dispanseri 2022 jyldyń 2 sáýirinde «otandyq óndirýshi» sanalatyn Qaraǵandy farmatsevtikalyq kesheni mekemesimen 111,2 mln teńgege shart jasasady.
Bir qyzyǵy, dál osy qaterli isikke qarsy sheteldiń sapaly dárisin elimizge jetkizýshi (resmi distribiýtor) «Aq niet» degen kompaniia atalǵan memsatýǵa qatysyp, atalǵan dárini 89,4 mln teńgege satyp alýdy usynǵan.
Al «SQ-Farmatsiia» kompaniiasy elimizdiń «Memlekettik satyp alý» zańyndaǵy otandyq ónim óndirýshilerge basymdyq berý máselesin basshylyqqa alyp, Nazarbaevtardyń qudasy Qairat Boranbaevtyń kásiporyny sanalatyn Qaraǵandy farmatsevtikalyq kesheninen analog preparattardy qymbat baǵaǵa satyp alǵan, – deidi bilikti maman.
Sol siiaqty isikke qarsy shveitsariialyq «Avastin» preparatynyń túpnusqasyn elimizge jetkizýshi 16 ml flakonyn 287 320 teńgeden, 4 ml flakonyn 74 400 teńgeden, al amerikandyq dál osyndai isikke qarsy «Gertseptin» degen 440 mg túpnusqa dáriniń flakonyn 245 000 teńgeden jetkizip bermekshi bolǵanda, «SQ-Farmatsiia» kompaniiasy taǵy da «otandyq óndirýshini qoldaý» máselesin alǵa tartyp, Qaraǵandy farmatsevtikalyq kesheni óndirgen dár-dármekti qymbat baǵada satyp alǵan.
Aitalyq, shveitsariialyq «Avastin» dárisiniń balamasy sanalatyn Boranbaevtyń kásiporyny óndiretin «Bevatsizýmabnyń» 16 ml ár flakonyn 332 448 teńgeden («Avastinnen» 45 128 teńgege qymbat), 4 ml flakonyn 88 251 teńgeden satyp alyp, otandyq óndiriske «qoldaý» kórsetipti.
Taǵy da aita tússek, Qaraǵandy farmatsevtikalyq kesheni «Trastýzýmab 440 mg» saýda belgisimen shyǵaratyn isikke qarasy dárini 358 920 teńgeden satyp alyp, ár dárige 113 920 teńgeden (amerikandyq «Gertseptin 440 mg» preparat 245 000 teńge bolǵan) artyq qarjy tólegen.
Otandyq ónim dep orystyń dárisin satqan
Eń qyzyǵy, «SQ-Farmatsiia» kompaniiasy otandyq ónim dep júrgen preparattardy Qaraǵandy farmatsevtikalyq kesheni Reseidiń «Biokad» degen kompaniiasynan satyp alyp, ony ishki naryqqa ózderi óndirgen «otandyq ónim» retinde saýdalap kelgen.
Osydan keiin bul mekemeniń dári-dármekterin «otandyq ónim» dep qalai aitýǵa bolady. Qairat Boranbaevtyń bul aferasyn «SQ-Farmatsiia» kompaniiasynyń basshysy Erhat Esqaliev bilmedi degenge kim senedi? Qarapaiym balalar dárigeri Qonaevtyń bilgen dúniesin Esqalievtyń bilmei qaldy degenge bes jasar bala da senbes.
Kúni keshe ǵana Jańa Qazaqstan Qairat Boranbaevtyń bylyqtaryn sý betine shyǵarǵanyn bilemiz. Aldaǵy ýaqytta Boranbaevty baiytýǵa úles qosyp, onyń bylyǵyna qatysqan Esqaliev te zań aldynda jaýap berýi kerek!
