«سق-فارماسيا» جارعىداعى تالاپقا جۇرە قاراعان
«سق-فارماسيا» كومپانياسىنىڭ وزىنە جۇكتەلگەن مىندەتتى دۇرىس اتقارماي وتىرعانىن قايىرعالي قونايەۆ تا كوپتەن بەرى ايتىپ جۇرگەنىن بىلەمىز.
ول ءوزىنىڭ فەيسبۋكتاعى جازباسىندا «سق-فارماسيا» كومپانياسى ءوزىنىڭ جارعىسىندا دارى-دارمەكتى تىكەلەي وندىرۋشىلەردىڭ زاۋىتىنان ساتىپ الۋ كەرەك دەگەن مۇلدە ورىندامايتىنىن ايتىپتى.
– «سق-فارماسيا» حالىق مۇددەسىن كوزدەيتىن بۇل تالاپتى ەشقاشان پايدالانعان ەمەس، – دەپ وكپە-رەنىشىن ءبىلدىرىپ، بۇلايشا پايىمداۋىنا نە سەبەپ بولعانىن بىلايشا تاپسىرلەيدى بالالار دارىگەرى.
بىلىكتى دارىگەر «سق-فارماسيا» بۇكىل الەم ءقاۋىپسىز ءارى ءتيىمدى سانايتىن دارى-دارمەكتەردى ەلگە اكەلمەيتىنىن ايتا كەلە، كومپانيا ساپالى ءتۇپنۇسقا دارىلەردىڭ انالوگ دارىلەردى اكەلىپ، قازاقستان حالقىنىڭ دەنساۋلىعىن كۇيتتەپ... جۇرگەنىن اشىپ ايتىپتى.
ساپالى ءدارىنىڭ بالاماسىن قىمباتقا ساتىپ العان
قايىرعالي قونايەۆتىڭ ايتۋىنشا، «سق-فارماسيا» ءتۇپنۇسقا دارىلەردىڭ بالاماسىن، ياعني، ءالسىز ءتۇرىن قىمبات باعاعا ساتىپ الىپ، مەملەكەت قاراجاسىن جەلگە ۇشىرۋمەن اينالىسقان. ەندى قايىرعالي قونايەۆتىڭ جازباسىنداعى ناقتى مالىمەتتەرگە توقتالساق،
– كومپانيانىڭ قاتەرلى ىسىككە قارسى قىمبات دارىلەردى ساتىپ الۋىنان ءبىراز بىلىقتى بايقاۋعا بولادى. اشىق دەرەككوزدەرىندە الماتى ونكولوگيالىق ديسپانسەرى 2022 جىلدىڭ 2 ساۋىرىندە «وتاندىق ءوندىرۋشى» سانالاتىن قاراعاندى فارماسيەۆتيكالىق كەشەنى مەكەمەسىمەن 111،2 ملن تەڭگەگە شارت جاساسادى.
ءبىر قىزىعى، ءدال وسى قاتەرلى ىسىككە قارسى شەتەلدىڭ ساپالى ءدارىسىن ەلىمىزگە جەتكىزۋشى (رەسمي ديستريبيۋتور) «اق نيەت» دەگەن كومپانيا اتالعان مەمساتۋعا قاتىسىپ، اتالعان ءدارىنى 89،4 ملن تەڭگەگە ساتىپ الۋدى ۇسىنعان.
ال «سق-فارماسيا» كومپانياسى ەلىمىزدىڭ «مەملەكەتتىك ساتىپ الۋ» زاڭىنداعى وتاندىق ءونىم وندىرۋشىلەرگە باسىمدىق بەرۋ ماسەلەسىن باسشىلىققا الىپ، نازاربايەۆتاردىڭ قۇداسى قايرات بورانبايەۆتىڭ كاسىپورىنى سانالاتىن قاراعاندى فارماسيەۆتيكالىق كەشەنىنەن انالوگ پرەپاراتتاردى قىمبات باعاعا ساتىپ العان، – دەيدى بىلىكتى مامان.
سول سياقتى ىسىككە قارسى شۆەيساريالىق «اۆاستين» پرەپاراتىنىڭ ءتۇپنۇسقاسىن ەلىمىزگە جەتكىزۋشى 16 مل فلاكونىن 287 320 تەڭگەدەن، 4 مل فلاكونىن 74 400 تەڭگەدەن، ال امەريكاندىق ءدال وسىنداي ىسىككە قارسى «گەرسەپتين» دەگەن 440 مگ ءتۇپنۇسقا ءدارىنىڭ فلاكونىن 245 000 تەڭگەدەن جەتكىزىپ بەرمەكشى بولعاندا، «سق-فارماسيا» كومپانياسى تاعى دا «وتاندىق ءوندىرۋشىنى قولداۋ» ماسەلەسىن العا تارتىپ، قاراعاندى فارماسيەۆتيكالىق كەشەنى وندىرگەن دار-دارمەكتى قىمبات باعادا ساتىپ العان.
ايتالىق، شۆەيساريالىق «اۆاستين» ءدارىسىنىڭ بالاماسى سانالاتىن بورانبايەۆتىڭ كاسىپورىنى وندىرەتىن «بيەۆاسيزۋمابنىڭ» 16 مل ءار فلاكونىن 332 448 تەڭگەدەن («اۆاستيننەن» 45 128 تەڭگەگە قىمبات)، 4 مل فلاكونىن 88 251 تەڭگەدەن ساتىپ الىپ، وتاندىق وندىرىسكە «قولداۋ» كورسەتىپتى.
تاعى دا ايتا تۇسسەك، قاراعاندى فارماسيەۆتيكالىق كەشەنى «تراستۋزۋماب 440 مگ» ساۋدا بەلگىسىمەن شىعاراتىن ىسىككە قاراسى ءدارىنى 358 920 تەڭگەدەن ساتىپ الىپ، ءار دارىگە 113 920 تەڭگەدەن (امەريكاندىق «گەرسەپتين 440 مگ» پرەپارات 245 000 تەڭگە بولعان) ارتىق قارجى تولەگەن.
وتاندىق ءونىم دەپ ورىستىڭ ءدارىسىن ساتقان
ەڭ قىزىعى، «سق-فارماسيا» كومپانياسى وتاندىق ءونىم دەپ جۇرگەن پرەپاراتتاردى قاراعاندى فارماسيەۆتيكالىق كەشەنى رەسەيدىڭ «بيوكاد» دەگەن كومپانياسىنان ساتىپ الىپ، ونى ىشكى نارىققا وزدەرى وندىرگەن «وتاندىق ءونىم» رەتىندە ساۋدالاپ كەلگەن.
وسىدان كەيىن بۇل مەكەمەنىڭ دارى-دارمەكتەرىن «وتاندىق ءونىم» دەپ قالاي ايتۋعا بولادى. قايرات بورانبايەۆتىڭ بۇل افەراسىن «سق-فارماسيا» كومپانياسىنىڭ باسشىسى ەرحات ەسقالييەۆ بىلمەدى دەگەنگە كىم سەنەدى؟ قاراپايىم بالالار دارىگەرى قونايەۆتىڭ بىلگەن دۇنيەسىن ەسقالييەۆتىڭ بىلمەي قالدى دەگەنگە بەس جاسار بالا دا سەنبەس.
كۇنى كەشە عانا جاڭا قازاقستان قايرات بورانبايەۆتىڭ بىلىقتارىن سۋ بەتىنە شىعارعانىن بىلەمىز. الداعى ۋاقىتتا بورانبايەۆتى بايىتۋعا ۇلەس قوسىپ، ونىڭ بىلىعىنا قاتىسقان ەسقالييەۆ تە زاڭ الدىندا جاۋاپ بەرۋى كەرەك!
