Marqum Bolat Nazarbaevtyń uly Hanbolat Astanadaǵy sot sheshimimen buzylýǵa mindettelgen qurylys nysanyn aǵasy Danıar Kesikbaevqa syıǵa tartty, dep habarlaıdy Dalanews.kz Nege.Aqsha-ǵa silteme jasap.
Aıta ketelik, byltyrǵy jyldyń 20 aqpanda Ákimshilik quqyqbuzýshylyq jónindegi aýdanaralyq sot Bolat Nazarbaevtyń Maıra Qurmanǵalıevadan týǵan ulyna Astanadaǵy Táýelsizdik dańǵylynyń boıyndaǵy oıyn-saýyq ortalyǵyn zańsyz salǵany úshin 103 500 teńge aıyppul salǵan.
Hanbolat Nazarbaev bul ýchaskeni 2020 jyly aqpanda kámeletke tolýyna oraı syı retinde alǵan. Osylaısha buryn bul jerde ornalasqan qonaqúı keshenin buzyp, onyń ornyna saýda oıyn-saýyq ortalyǵyn qurylys ruqsatynsyz jáne aldyn-ala eskertýsiz júrgize bastaǵan.
Sot eks-prezıdenttiń (Nursultan Nazarbaevtyń — esk.) nemere inisine aıyppul tóletip qana qoımaı, zańsyz qurylysty buzýǵa mindettegen edi. Hanbolat Nazarbaev bul sheshimge qarsylyq bildirip, ǵımaratty buzbaýǵa ruqsat suraǵanymen, qalalyq sot onyń ótinishin qabyldamaǵan.
Jaqynda belgili bolǵandaı, Hanbolat Nazarbaev bul nysandy óz aǵasy Danıar Kesikbaevqa syıǵa tartqan. Aǵaıyndylar bir anadan týǵan, alaıda ákeleri bólek
Astana qalasynyń orta sapasy jáne baqylaý basqarmasynyń basshysy Ǵanı Tájıevtiń aıtýynsha, ǵımaratty májbúrlep buzý týraly qaýly QR Ádilet mınıstrliginiń Astana qalasyndaǵy Ádilet departamentine jiberilgen.
Departamenttiń málimetinshe, Hanbolat Nazarbaev bul nysandy Danıar Kesikbaevqa syıǵa tartý shartyn rásimdegen. Osyǵan baılanysty basqarma syıǵa tartý shartyn zańsyz dep taný týraly talap-aryz joldaǵan. Basqarma bul áreketti sot sheshimin oryndaýdan jaltarý dep sanap, ony zańsyz dep tanýdy talap etýde.
Dalanews-tyń paıymdaýynsha Hanbolat Nazarbaev menshik ıesin aýystyrý arqyly sot sheshimin oryndaýdy qıyndatý nemese ony soza túsýdi josparlap otyr. Syıǵa tartý shartyn jańa menshik ıesine baılanysty sot arqyly qaıta qaraý – prosesti sozýdyń yqtımal tásili.
Hanbolat Nazarbaev 22 jasynda birneshe kompanıanyń quryltaıshysy bolyp úlgergen. Olardyń qatarynda Newkazgroup development jáne Amanat-building qurylys fırmalary, Imexpharma farmasevtıkalyq kompanıasy jáne BN HAN invest group ınvestısıalyq fırmasy bar.