Pavlodar oblys ákimi toǵyzqumalaqshy Janat Qaımoldınge, erkin kúres sheberi Saıatbek Oqasovqa, kıkbokstan álem chempıony Nursultan Hasanovqa Mádenıet jáne sport mınıstrliginiń alǵys hatyn tabystady. «BI Group Ironman 70.3 Nur-Sultan» estafetasynyń jeńimpazdary Vasılıı Zvonarev, Aleksandr Kolonda jáne Pavel Gaskıı de estelik syılyqtarmen marapattaldy.
Bolat Baqaýov 2012 jyly Londonda ótken Olımpıada oıyndarynyń qatysýshysy Dáýlet Shabanbaıdy da quttyqtady. Bıyl Halyqaralyq Olımpıadalyq komıtettiń sheshimimen jerlesimiz Olımpıadanyń qola júldesin ıelegen bolatyn.
– Barshańyzǵa qoldaý kórsetkenderińiz úshin alǵys bildiremin. Men áli qatardan shyqqan joqpyn. Tokıo Olımpıadasyna barýdy josparlap otyrmyn, – dedi Dáýlet Shabanbaı.
Óńirde buqaralyq sportty damytý boıynsha aýqymdy jumystar júrgizilip jatyr. Bıyl «Sport sıtı» sport qalashyǵynda jabyq fýtbol manejynyń qurylysy aıaqtaldy. Olımpıadalyq standarttarǵa tolyqtaı saı keletin «Ertis» baseıni ashyldy.
– Keler jyly Tokıodaǵy Olımpıada oıyndaryna kóz tigemiz. Búginde 15 sportshymyz lısenzıa alý úshin «kúresip» jatyr. Olarǵa sáttilik tileımin. Olardan tek qana jeńis kútemiz, – dedi Bolat Baqaýov.
Olımpıadalyq sport túrleriniń ókilderi de oblys ákiminiń marapatyna ıe boldy. Olga Safronova, Kırıl Kazansev jáne Aleksandra Zalúbovskaıa sekildi dańqty sportshylarymyz oqý-jattyǵý jıyndarynda bolǵandyqtan, kezdesýge qatysa almady.
Ákim óz sózinde paraolımpıadashy sportshylardyń jetistikterine de toqtaldy. Olardyń qatarynda Georgıı Chetverıkovty erekshe ataýǵa bolady. Ol ústel tenısinen Qazaqstan Respýblıkasynyń halyqaralyq dárejedegi sport sheberi, 2019 jylǵy Búkilálemdik IWAS oıyndarynyń kúmis júldegeri. Sondaı-aq sadaq atýdan Qazaqstan Respýblıkasynyń halyqaralyq dárejedegi sport sheberi, paraolımpıadashylar arasyndaǵy 2019 jylǵy Azıa jáne Álem chempıonattarynyń qatysýshysy Aleksandr Medvedevti de bóle-jara atap ótken abzal.
