Qazaqstanda zeinetaqy qarajatyn basqaratyn jańa jekemenshik kompaniia paida boldy. Biryńǵai jinaqtaýshy zeinetaqy qory (BJZQ) Tansar Capital kompaniiasymen aktivterdi senimgerlik basqarý jóninde kelisimge keldi. Osylaisha, bul kompaniia Alatau City Invest, Halyk Global Markets, BCC Invest, Halyk Finance jáne «Sentras Sekiýritiz» qatarynda naryqtaǵy altynshy oiynshy boldy, dep habarlaidy Dalanews.kz "Bank.kz"-ke silteme jasap.
Kelisimge 2026 jylǵy 26 naýryzda qol qoiylǵan. Qujat zeinetaqy aktivteri kastodian-banktegi qor shottaryna túskennen keiin kúshine enedi jáne merzimi shektelmegen. BJZQ málimetinshe, kompaniia barlyq zań talaptaryna sai keledi jáne Qarjy naryǵyn retteý jáne damytý agenttiginiń litsenziiasyn alǵan.
Tansar Capital 1995 jyldan beri jumys isteidi. Buryn ol CAIFC Investment Group dep atalǵan, 2022 jyldyń qazan aiynda qaita tirkelgennen keiin qazirgi ataýyn alǵan. Kompaniia ieleriniń arasynda Ulttyq banktiń burynǵy tóraǵa orynbasary Erjan Aǵibaev pen KASE-niń eks-basshysy Esjan Birtanov bar.
Qor ókilderi jańa basqarýshy retteýshi talaptarynyń bárin oryndaǵannan keiin ǵana zeinetaqy aktivterin basqarýǵa ruqsat alǵanyn atap ótti. Naryqtaǵy qatysýshylar sanynyń artýy zeinetaqy jinaqtarynyń bir bóligin jekemenshik kompaniialarǵa berý tájiribesiniń jalǵasyp jatqanyn kórsetedi.
