Qazaqstan Prezidenti Qasym-Jomart Toqaev Qytai Halyq Respýblikasynyń Tóraǵasy Si Tszinpinmen kelissóz júrgizdi, dep habarlaidy dalanews.kz.
Kezdesý qorytyndysy boiynsha eki el úkimetteri arasynda 2027-2030 jyldarǵa arnalǵan saýda-ekonomikalyq yntymaqtastyq baǵdarlamasy men jol kartasyna qol qoiyldy.
Kezdesý barysynda Memleket basshysy Dúniejúzilik jasandy intellekt konferentsiiasyna qatysýǵa shaqyrǵany úshin Si Tszinpinge alǵys aityp, forýmnyń Shanhai qalasynda ótýiniń simvoldyq máni bar ekenin atap ótti. Sondai-aq Qytai Kommýnistik partiiasynyń qurylǵanyna 105 jyl tolýymen quttyqtady.
«Qytaidyń halyqaralyq qaýymdastyq aldyndaǵy bedeli zor jáne onyń jetistikterin búkil álem moiyndaidy. Qazaqstan Qytaimen máńgilik ári strategiialyq seriktestikti jan-jaqty nyǵaita berýge qashanda múddeli», - dedi Qasym-Jomart Toqaev.
Prezidenttiń aitýynsha, búginde Qytai Qazaqstannyń eń iri saýda seriktesteriniń biri sanalady. Osy ýaqytqa deiin QHR elimizge 30 mlrd dollar investitsiia salǵan. Al ótken jyly ekijaqty taýar ainalymy 49 mlrd dollarǵa jetken. Qazir Qazaqstanda 8,5 myńnan astam qytailyq kompaniia jumys isteidi.
Memleket basshysy ónerkásip, energetika, gaz-himiia, mashina jasaý jáne aýyl sharýashylyǵy salalarynda birlesken jobalar júzege asyrylyp jatqanyn atap ótti.
Sonymen qatar Qasym-Jomart Toqaev mádeni-gýmanitarlyq bailanystardyń da qarqyndy damyp kele jatqanyna toqtaldy.
«Byltyr Qazaqstanǵa 1 millionnan astam Qytai azamaty saparlap keldi. Eki el astanalarynda mádeni ortalyqtar ashyldy. Elimizde Lý Ban sheberhanalary tabysty jumys isteýde. Bul - qos halyqtyń arasynda qalyptasqan dostyq pen ózara senimniń taǵy bir aiǵaǵy», - dedi Prezident.
Kelissóz barysynda taraptar halyqaralyq uiymdar aiasyndaǵy ózara is-qimyldy da talqylady. Prezident BUU, ShYU, AÓSShK jáne «Ortalyq Aziia - Qytai» formaty aiasyndaǵy yntymaqtastyqtyń joǵary deńgeiin atap ótti.
Óz kezeginde Si Tszinpin Qazaqstan Prezidentiniń júrgizip otyrǵan saiasatyna joǵary baǵa berdi.
«Birlesken kúsh-jigerdiń arqasynda Qytai men Qazaqstannyń máńgi ári jan-jaqty strategiialyq seriktestigi joǵary deńgeige jetti. Ózara yqpaldastyqty damytýdyń áleýeti óte zor. Qazaqstan Prezidenti Qytaimen dostyq saiasat júrgizip otyr. Bul halyqtarymyzdyń múddesine sai keledi», - dedi Qytai Halyq Respýblikasynyń Tóraǵasy.
Sondai-aq Si Tszinpin Qasym-Jomart Toqaevty jańa Konstitýtsiianyń qabyldanýymen quttyqtap, aldaǵy Quryltai sailaýyna sáttilik tiledi.
Kelissózder aiaqtalǵannan keiin Qazaqstan Respýblikasy Úkimeti men Qytai Halyq Respýblikasy Úkimeti arasynda 2027-2030 jyldarǵa arnalǵan saýda-ekonomikalyq yntymaqtastyq baǵdarlamasy men jol kartasyna qol qoiyldy.
