Qazaqstan Úkimeti Kashagan jobasy boiynsha ekologiialyq daýǵa bailanysty resmi málimdeme jasap, North Caspian Operating Company (NCOC) kompaniiasyna salynǵan ekologiialyq aiyppuldyń zańdy ekenin jáne ony oryndaý mindetti ekenin málimdedi, dep habarlaidy dalanews.kz.
Ádilet ministrliginiń habarlaýynsha, Qazaqstan halyqaralyq quqyq qaǵidattaryn ustanyp, sheteldik investitsiialardy qorǵaý jónindegi halyqaralyq mindettemelerin adal oryndaidy. Sonymen birge memleket ekologiialyq zańnamanyń saqtalýyn qamtamasyz etý jónindegi egemen quqyǵyn júzege asyryp keledi.
Málimdemede NCOC kompaniiasyna salynǵan aiyppul Qazaqstannyń ekologiialyq zańnamasyn, naqtyraq aitqanda kúkirt saqtaý kólemine qoiylatyn talaptardy buzǵany úshin taǵaiyndalǵany aitylǵan.
«Ekologiialyq aiyppuldyń zańdylyǵy men negizdiligi Qazaqstan Respýblikasy sottarynyń sheshimderimen rastaldy», - delingen habarlamada.
Úkimettiń málimetinshe, 2026 jylǵy 19 maýsymda Atyraý oblystyq soty tómengi satydaǵy sottyń sheshimin kúshinde qaldyrǵan. Sot sheshimi zańdy kúshine engen jáne 20 shildege deiin erikti túrde oryndalýy tiis. Odan keiin NCOC pen onyń merdigerlerine májbúrlep oryndatý sharalary, sonyń ishinde óndiriletin somanyń 10 paiyzy kólemindegi atqarýshylyq sanktsiia qoldanylýy múmkin.
Sonymen qatar Qazaqstan tarapy NCOC kompaniiasynyń BUU-nyń halyqaralyq saýda quqyǵy jónindegi komissiiasy (UNCITRAL) aiasyndaǵy aralyq arbitrajdyq qamtamasyz etý sharasyna qatysty málimdemesin negizsiz dep atady.
Úkimet túsindirýinshe, UNCITRAL arbitrajy investitsiialyq emes, kommertsiialyq arbitraj bolyp tabylady jáne onyń ókilettigi memlekettiń ekologiialyq zańnamany qoldaný sekildi egemen ókilettikterine taralmaidy.
Sondai-aq sheteldik kommertsiialyq arbitrajdyń qamtamasyz etý sharalary Qazaqstan aýmaǵynda avtomatty túrde zańdy kúshine enbeitini atap ótildi. Olar Qazaqstan sottary arqyly ǵana tanylyp, oryndalýy múmkin.
Málimdemede ekologiialyq zańnamany oryndaý qorshaǵan ortany, halyqtyń densaýlyǵyn jáne qoǵamdyq múddeni qorǵaýǵa baǵyttalǵany, sondyqtan bul saladaǵy memlekettik ókilettikter kommertsiialyq arbitraj sheshimderimen shektelmeitini aitylǵan.
«Sheteldik kommertsiialyq arbitrajdyń qamtamasyz etý sharasy Qazaqstan zańnamasynyń imperativtik normalarynan joǵary turmaidy jáne ekologiialyq aiyppuldy óndirip alý týraly zańdy kúshine engen sot aktisiniń oryndalýyna kedergi keltirmeidi», - dep málimdedi Úkimet.
Sonymen qatar Qazaqstan barlyq áreketti «Atqarýshylyq is júrgizý jáne sot oryndaýshylarynyń mártebesi týraly» zańǵa sáikes júzege asyratynyn jetkizdi.
Budan bólek, Úkimet NCOC-tyń baspasóz habarlamasynda UNCITRAL arbitrajyndaǵy áli aiaqtalmaǵan protsestiń mańyzdy málimetteri jariialanǵanyna alańdaýshylyq bildirdi.
«Arbitrajdyq talqylaýdyń mundai málimetterin jariia etý halyqaralyq arbitrajdyń qupiialylyq qaǵidatyna sáikes kelmeidi jáne istiń tiisti túrde qaralýyna yqpal etpeidi», - delingen resmi málimdemede.
