Áleýmettik osal toptarǵa jatatyn tulǵalar birjolǵy zeinetaqy tólemderi túrinde salyq salynatyn tabysqa standartty salyq shegerimderin qoldanýǵa quqyly. Olardyń kópshiligi turǵyn úige jáne (nemese) emdelýge aqsha alǵan kezde jeke tabys salyǵyn birden qosa tólegen. Bul arada keibir qazaqstandyqtarǵa qaitarylýy tiis salyq túri osy jaily bolyp otyr, dep habarlaidy Dalanews.kz.
"2024 jylǵy 1 qańtardan bastap mundai tulǵalardyń birjoly zeinetaqy tólemi túrindegi salyq salynatyn tabysyna standartty salyq shegerimderi (882 AEK sheginde) qoldanylady. Bul qordan aqsha alǵan kúnnen bastap úsh jyl ishinde jeke tabys salyǵyn qaita esepteý men óteýdi qoldaný úshin BJZQ-ǵa tiisti ótinishpen jáne rastaityn qujattarmen júgine alatynyn bildiredi. Alaida, birjolǵy zeinetaqy tólemin 2021-2022 jyldary alǵan adamdar ártúrli sebeptermen bul múmkindikti paidalana almady. Endi QR Salyq kodeksine ózgerister men tolyqtyrýlardyń qabyldanýyna bailanysty 2025 jylǵy 15 shildeden bastap jeke tulǵalardyń osyndai ótinishteri úshin belgilengen talap qoiý merzimi 3 jyldan 5 jylǵa deiin ulǵaityldy", delingen BJZQ habarlamasynda.
Demek, bul arada áńgime 2021-2023 jyldary birjolǵy zeinetaqy jinaqtaryn alyp, olar boiynsha JTS tólegender jaily bolyp otyr. Onyń kólemi, ádette alynǵan somanyń 10%-yn quraidy.
JTS qaitarý quqyǵyn kim paidalana alady?
JTS qaitarýǵa quqyǵy bar jeke tulǵalardyń tizbesi qoldanystaǵy Salyq kodeksinde aiqyndalǵan. Olar:
- birinshi, ekinshi nemese úshinshi toptaǵy múgedekter,
- múgedek balalardyń ata-analarynyń nemese qamqorshylarynyń biri,
- bala asyrap alýshylardyń biri, jetim balalardyń asyrap alýshy ata-analary,
- soǵys ardagerleri jáne basqa sanattar.
Mundai azamattardyń tolyq tizbesi Salyq kodeksiniń 346-babynda kórsetilgen.
Qaida júginý kerek?
Birjolǵy zeinetaqy tólemi boiynsha salyq salynatyn tabysty aiqyndaý kezinde standartty salyq shegerimderi qoldanylmaǵan zeinetaqy tólemderin alýshylar, olardy qoldaný quqyǵy bolǵan jaǵdaida, kiristerdi qaita esepteý jáne JTS óteý úshin standartty salyq shegerimderin qoldanýǵa ótinishpen jáne rastaityn qujattarmen BJZQ-nyń jaqyn jerdegi filialyna shuǵyl túrde júginýi qajet.
Standartty salyq shegerimi qoldanylǵannan keiin, buǵan deiin JTS ustalǵan bolsa, ol alýshynyń jeke zeinetaqy shotyna qaitarylady. Eger JTS tóleý keiinge qaldyrylǵan bolsa, onda ai saiynǵy zeinetaqy tólemderin alǵan kezde ony tóleýge qatysty mindetteme alynyp tastalady.
"Eger birjolǵy zeinetaqy tólemin paidalanǵan bolsańyz, biraq salyq shegerimderine qatysty quqyǵyńyz bar ekenin osyǵan deiin bilmeseńiz, endi jaǵdaidy túzetýge múmkindik bar. Eń bastysy - keshiktirmei tiisti orynǵa habarlasý. Eger siz 2021 jyly tólem alsańyz, onda 2026 jyldyń ortasyna deiin, al tólem 2022 jyly alynsa, 2027 jylǵa deiin ótinish berýge bolady. Biryńǵai zeinetaqy tólemi alynǵan kúnnen bastap bes jyldyq merzim eskeriledi", - deidi qor mamandary.
Atalǵan ózgerister 2025 jylǵy 31 jeltoqsanǵa deiin (qosa alǵanda) qoldanysta bolady, óitkeni 2026 jylǵy 1 qańtardan bastap Qazaqstan Respýblikasynyń jańa Salyq kodeksi kúshine enedi.
Aita ketsek, BJZQ-dan beriletin zeinetaqy tólemderi QR Salyq kodeksine sáikes 10% mólsherleme boiynsha jeke tabys salyǵy (JTS) salynatyn kiriske jatady. JTS mindetti zeinetaqy jarnalary (MZJ), mindetti kásiptik zeinetaqy jarnalary (MKZJ), erikti zeinetaqy jarnalary (EZJ) esebinen qalyptastyrylǵan zeinetaqy tólemderiniń barlyq túrleri boiynsha jiyntyq túrde ustalady. Osy Erejeler turǵyn úi jaǵdailaryn jaqsartý jáne (nemese) emdelýge aqy tóleý maqsatynda BJZQ-dan birjolǵy zeinetaqy tólemderine (BJT) de qatysty.
Birjolǵy zeinetaqy tólemi (BJT) – Qazaqstan Respýblikasynyń Áleýmettik kodeksinde belgilengen tártippen turǵyn úi jaǵdailaryn jaqsartý jáne (nemese) emdelýge aqy tóleý maqsatynda salymshy (zeinetaqy tólemderin alýshy) BJZQ-dan alatyn mindetti zeinetaqy jarnalary esebinen (al 01.07.2023j. deiin mindetti kásiptik zeinetaqy jarnalary esebinen de) qalyptastyrylǵan zeinetaqy jinaqtarynyń somasy.
