Jýyrda Aqtóbedegi meshitte qoǵamda qyzý talqylanǵan jait boldy. Aqtóbe turǵyny Emanýella Naýryzbaeva osy jaiynda ashyq suhbat berip, shyn máninde oqiǵa qalai bolǵanyn aitty, dep habarlaidy Dalanews.kz.
Qala turǵynynyń sózinshe, sol kúni aýa raiy buzylyp, qatty jańbyr jaýyp ketken. Nóser jaýyn basylǵanyn kútken boijetken meshitte tosyn jaitqa tap bolǵan.
"15 jasymnan bastap epilepsiiamen aýyramyn. Meshittiń aldy kafel, qulap qalarmyn dep esik aldynda tura turaiyn degen oiǵa keldim. Turǵan kezde qasyma er kisi kele bastady. Aq kiingen er adam aldyma qarai jylji bastady. Jańbyr toqtaýyn kútip turǵan shyǵar dep mán bergen joqpyn. Esik aldynda turǵan kezde maǵan "ádemi qyz ekensiń, tósiń ádemi" dedi. Sodan keiin eki aiaǵymnyń ortasyna kóz júgirtip, "ýaqytsha nekege qalai qaraisyń?" dedi. Shyǵaiyn degen oimen aiaǵymdy basqan kezde, qolymen esikti jaýyp, "bul jerden shyqpaisyń, suraǵyma jaýap alǵan joqpyn" dedi. Ózimniń ómirime qoryqqannan keiin qolymda dálelim bolsyn degen nietpen telefonymnyń kamerasyn tez qosyp, bolǵan jaitty jaza bastadym", - dedi ol Massaget.kz portalyna bergen suhbatynda.
Emanýella Naýryzbaevanyń sózinshe, bolǵan jaittyń bárin imam da biledi, meshittegi er adamdar da kórgen. Ol bireýi de janyna kelip, kómektespegenin jetkizdi.
"Politsiiaǵa baryp, aryzymdy aitqan kezde "ol kisiniń esi durys emes, seniń isteitin isiń - úndemei ketip qalý" dep aitqan bolatyn. Imamǵa barǵan kezde de solai aitqan bolatyn. Tipti imamǵa kire bastaǵan kezde ol kisi maǵan syilastyq tanytpady. Kómek surap bardym. Men barǵan meshittiń bas imamy dóreki sóilesti", - dedi ol.
Sondai-aq, qyzdyń aitýynsha, áńgime barysynda imam jábirlenýshi videoǵa, diktafonǵa jazyp tur ma dep kúdiktenip teksergen.
"Kabinetine kirgizip, "bul kisiniń sary kartochkasy bar. Bul kisi - aýrý adam. Aýzyna ne keledi, sony aitady. Eshteńe istei almaimyz" dedi. "Aýrý bolsa, nege aýrýhanaǵa jatqyzbaisyzdar nemese artyq ketip jatsa, sot aldynda istegen isine jaýap bersin" dedim. "Joq, bul - bizdiń brat, aǵalarymyzdyń biri, er adamǵa olai jasai almaimyz" dedi", - dedi Emanýella Naýryzbaeva suhbat barysynda.
Keiin jaǵdai ýshyǵyp, qoǵam dúrlikken soń politseilerdiń ózi habarlasqan kórinedi. Aqtóbe turǵyny barlyq jaǵdaidy baiandap, aryz jazǵan. Ol kópshilikke bas amandyǵy úshin únemi kamera alyp júrýge keńes berdi. Óitkeni, qyzdyń aitýynsha, sotta meshittegi beinebaqylaý kamerasy kórsetilmegen.
Emanýella Naýryzbaeva osy oqiǵadan keiin ózine qysym kórsetkender bolǵanyn da jasyrmady.
"Úiime deiin kelip, qoqan-loqy jasap, kishkentai atylatyn zattardy terezeme laqtyryp atty. "Biz seni óltiremiz, seni baýyzdaimyz. Bizdiń bratty jamandaityndai sen kimsiń?! Biz úshin qyzdyń eń basty paryzy - bala týyp, eki aiaǵynyń ortasyn ashý" dedi. Ony úiimniń aldynda turǵan bir top er adam aitty. Búkil aýdan estidi. Eki kólik kelip, ishinen segiz bala shyǵyp, dalada júrgeni, qolynda pyshaq bolǵany da qolymda (dálelderi - esk.) bar. Bárin jelige saldym. Eki-úsh kún boiy tańǵy saǵat altyǵa deiin meni kútip júrdi", - dedi ol suhbat barysynda.
Buǵan deiin qandai jaǵdai boldy?
Eske salaiyq, buǵan deiin "Nur-Ǵasyr" meshitinde bolǵan oqiǵa boiynsha sot otyrysy 29 shildede ótkeni, nátijesinde aiyptalýshy 5 táýlikke qamaýǵa alynǵany habarlandy.
23 jastaǵy Emmanýella Naýryzbaevanyń aitýynsha, tergeý barysynda ózine tiisken er adam buryn da tártip buzǵany anyqtalǵan, ol buzaqylyq jasaǵany úshin sotty bolǵan. Oǵan qosa 2025 jyly qańtarda taǵy bir adamǵa meshitte tiisip, jaýapkershilikke tartylǵan.
QMDB ustanymy qandai?
Oqiǵadan keiin birneshe kún ótken soń ǵana QMDB málimdeme jasady.
"Aqtóbedegi meshitte qyz balaǵa dóreki sóz aityp, ádepsizdik tanytqan er adamnyń áreketin Qazaqstan musylmandary dini basqarmasy úzildi-kesildi aiyptaidy. Mundai áreketter islam qundylyqtaryna ǵana emes, jalpy adamzattyń moraldyq-etikalyq qaǵidalaryna qaishy", – dep jazylǵan QMDB málimdemesinde.
