جۋىردا اقتوبەدەگى مەشىتتە قوعامدا قىزۋ تالقىلانعان جايت بولدى. اقتوبە تۇرعىنى ەمانۋەللا ناۋرىزبايەۆا وسى جايىندا اشىق سۇحبات بەرىپ، شىن مانىندە وقيعا قالاي بولعانىن ايتتى، دەپ حابارلايدى Dalanews.kz.

قالا تۇرعىنىنىڭ سوزىنشە، سول كۇنى اۋا رايى بۇزىلىپ، قاتتى جاڭبىر جاۋىپ كەتكەن. نوسەر جاۋىن باسىلعانىن كۇتكەن بويجەتكەن مەشىتتە توسىن جايتقا تاپ بولعان.

"15 جاسىمنان باستاپ ەپيلەپسيامەن اۋىرامىن. مەشىتتىڭ الدى كافەل، قۇلاپ قالارمىن دەپ ەسىك الدىندا تۇرا تۇرايىن دەگەن ويعا كەلدىم. تۇرعان كەزدە قاسىما ەر كىسى كەلە باستادى. اق كيىنگەن ەر ادام الدىما قاراي جىلجي باستادى. جاڭبىر توقتاۋىن كۇتىپ تۇرعان شىعار دەپ ءمان بەرگەن جوقپىن. ەسىك الدىندا تۇرعان كەزدە ماعان "ادەمى قىز ەكەنسىڭ، ءتوسىڭ ادەمى" دەدى. سودان كەيىن ەكى اياعىمنىڭ ورتاسىنا كوز جۇگىرتىپ، "ۋاقىتشا نەكەگە قالاي قارايسىڭ؟" دەدى. شىعايىن دەگەن ويمەن اياعىمدى باسقان كەزدە، قولىمەن ەسىكتى جاۋىپ، "بۇل جەردەن شىقپايسىڭ، سۇراعىما جاۋاپ العان جوقپىن" دەدى. ءوزىمنىڭ ومىرىمە قورىققاننان كەيىن قولىمدا دالەلىم بولسىن دەگەن نيەتپەن تەلەفونىمنىڭ كامەراسىن تەز قوسىپ، بولعان جايتتى جازا باستادىم"، - دەدى ول Massaget.kz پورتالىنا بەرگەن سۇحباتىندا.

ەمانۋەللا ناۋرىزبايەۆانىڭ سوزىنشە، بولعان جايتتىڭ ءبارىن يمام دا بىلەدى، مەشىتتەگى ەر ادامدار دا كورگەن. ول بىرەۋى دە جانىنا كەلىپ، كومەكتەسپەگەنىن جەتكىزدى.

"پوليسياعا بارىپ، ارىزىمدى ايتقان كەزدە "ول كىسىنىڭ ەسى دۇرىس ەمەس، سەنىڭ ىستەيتىن ءىسىڭ - ۇندەمەي كەتىپ قالۋ" دەپ ايتقان بولاتىن. يمامعا بارعان كەزدە دە سولاي ايتقان بولاتىن. ءتىپتى يمامعا كىرە باستاعان كەزدە ول كىسى ماعان سىيلاستىق تانىتپادى. كومەك سۇراپ باردىم. مەن بارعان مەشىتتىڭ باس يمامى دورەكى سويلەستى"، - دەدى ول.

سونداي-اق، قىزدىڭ ايتۋىنشا، اڭگىمە بارىسىندا يمام جابىرلەنۋشى ۆيدەوعا، ديكتافونعا جازىپ تۇر ما دەپ كۇدىكتەنىپ تەكسەرگەن.

"كابينەتىنە كىرگىزىپ، "بۇل كىسىنىڭ سارى كارتوچكاسى بار. بۇل كىسى - اۋرۋ ادام. اۋزىنا نە كەلەدى، سونى ايتادى. ەشتەڭە ىستەي المايمىز" دەدى. "اۋرۋ بولسا، نەگە اۋرۋحاناعا جاتقىزبايسىزدار نەمەسە ارتىق كەتىپ جاتسا، سوت الدىندا ىستەگەن ىسىنە جاۋاپ بەرسىن" دەدىم. "جوق، بۇل - ءبىزدىڭ برات، اعالارىمىزدىڭ ءبىرى، ەر ادامعا ولاي جاساي المايمىز" دەدى"، - دەدى ەمانۋەللا ناۋرىزبايەۆا سۇحبات بارىسىندا.

كەيىن جاعداي ۋشىعىپ، قوعام دۇرلىككەن سوڭ پوليسەيلەردىڭ ءوزى حابارلاسقان كورىنەدى. اقتوبە تۇرعىنى بارلىق جاعدايدى بايانداپ، ارىز جازعان. ول كوپشىلىككە باس اماندىعى ءۇشىن ۇنەمى كامەرا الىپ جۇرۋگە كەڭەس بەردى. ويتكەنى، قىزدىڭ ايتۋىنشا، سوتتا مەشىتتەگى بەينەباقىلاۋ كامەراسى كورسەتىلمەگەن.

ەمانۋەللا ناۋرىزبايەۆا وسى وقيعادان كەيىن وزىنە قىسىم كورسەتكەندەر بولعانىن دا جاسىرمادى.

"ۇيىمە دەيىن كەلىپ، قوقان-لوقى جاساپ، كىشكەنتاي اتىلاتىن زاتتاردى تەرەزەمە لاقتىرىپ اتتى. "ءبىز سەنى ولتىرەمىز، سەنى باۋىزدايمىز. ءبىزدىڭ براتتى جاماندايتىنداي سەن كىمسىڭ؟! ءبىز ءۇشىن قىزدىڭ ەڭ باستى پارىزى - بالا تۋىپ، ەكى اياعىنىڭ ورتاسىن اشۋ" دەدى. ونى ءۇيىمنىڭ الدىندا تۇرعان ءبىر توپ ەر ادام ايتتى. بۇكىل اۋدان ەستىدى. ەكى كولىك كەلىپ، ىشىنەن سەگىز بالا شىعىپ، دالادا جۇرگەنى، قولىندا پىشاق بولعانى دا قولىمدا (دالەلدەرى - ەسك.) بار. ءبارىن جەلىگە سالدىم. ەكى-ۇش كۇن بويى تاڭعى ساعات التىعا دەيىن مەنى كۇتىپ ءجۇردى"، - دەدى ول سۇحبات بارىسىندا.

بۇعان دەيىن قانداي جاعداي بولدى؟

ەسكە سالايىق، بۇعان دەيىن "نۇر-عاسىر" مەشىتىندە بولعان وقيعا بويىنشا سوت وتىرىسى 29 شىلدەدە وتكەنى، ناتيجەسىندە ايىپتالۋشى 5 تاۋلىككە قاماۋعا الىنعانى حابارلاندى.

23 جاستاعى ەممانۋەللا ناۋرىزبايەۆانىڭ ايتۋىنشا، تەرگەۋ بارىسىندا وزىنە تيىسكەن ەر ادام بۇرىن دا ءتارتىپ بۇزعانى انىقتالعان، ول بۇزاقىلىق جاساعانى ءۇشىن سوتتى بولعان. وعان قوسا 2025 جىلى قاڭتاردا تاعى ءبىر ادامعا مەشىتتە ءتيىسىپ، جاۋاپكەرشىلىككە تارتىلعان.

قمدب ۇستانىمى قانداي؟

وقيعادان كەيىن بىرنەشە كۇن وتكەن سوڭ عانا قمدب مالىمدەمە جاسادى.

"اقتوبەدەگى مەشىتتە قىز بالاعا دورەكى ءسوز ايتىپ، ادەپسىزدىك تانىتقان ەر ادامنىڭ ارەكەتىن قازاقستان مۇسىلماندارى ءدىني باسقارماسى ۇزىلدى-كەسىلدى ايىپتايدى. مۇنداي ارەكەتتەر يسلام قۇندىلىقتارىنا عانا ەمەس، جالپى ادامزاتتىڭ مورالدىق-ەتيكالىق قاعيدالارىنا قايشى"، – دەپ جازىلعان قمدب مالىمدەمەسىندە.