Qostanaida ótken brifingte Ekonomikalyq tergeý departamentiniń basshysy Timýr Hasanov óńirdegi qarjy salasyndaǵy zań buzýshylyqtar men olardy boldyrmaý boiynsha qabyldanyp jatqan sharalar týraly baiandady,- dep habarlaidy Dalanews.kz
Onyń aitýynsha, biyl oblysta qarjy piramidalaryna qatysty 6 qylmystyq is tirkelgen. Keltirilgen shyǵyn 88 million teńgeden asqan. Alaida zardap shekken azamattarǵa qaitarylǵan qarajat kólemi nebári 18 million teńge. Uiymdastyrýshylardyń keibiri izdeýde, olardyń birqatary shetelge qashqan.
«Bul — tek sandar emes, adamdardyń úmiti men taǵdyry. Biz tergeýmen qatar aldyn alý sharalaryna basa mán beremiz», – dedi Timýr Hasanov.
Onyń aitýynsha, jyl basynda qarjylyq saýattylyqty arttyrýǵa arnalǵan stýdenttik forým ótip, 1 000-nan astam qatysýshy qamtylǵan. Sonymen qatar oblystaǵy 400-ge jýyq mektepte 51 myńnan astam oqýshyǵa qarjylyq qaýipsizdik taqyrybynda túsindirý jumystary júrgizilgen. Bul – respýblika boiynsha eń joǵary kórsetkish.
Brifing barysynda zańsyz mikrokredit uiymdary máselesi de kóterildi. Hasanovtyń aitýynsha, keibir kóleńkeli uiymdar litsenziiasyz jumys istep, halyqqa 120%-ǵa deiingi ósimmen nesie berip kelgen. Mysaly, bir zeinetker 13 million teńgege kelisip, qolyna tek 6 million alǵan. Onyń úii kepilge qoiylǵan. Qazirgi ýaqytta bul baǵytta birneshe is boiynsha tergeý jalǵasyp jatyr, 150 million teńgeden astam múlikke tyiym salynǵan.
Departament sondai-aq zańsyz nikotin ónimderine qarsy kúres júrgizip jatyr. Biyldyń ózinde 2 300-den astam elektrondy veip pen basqa da nikotin ónimderi tárkilengen. Birneshe qylmystyq is qozǵalyp, qoimalar men kólikterge tyiym salynǵan.
«Bul — tek zań buzýshylyqpen kúres emes. Bul – ulttyń densaýlyǵy úshin kúres. Ásirese balalardy qorǵaý – barlyǵymyzdyń ortaq mindetimiz», – dedi Hasanov.
Brifing sońynda ol departamenttiń basty maqsaty – tek kórsetkishter úshin jumys isteý emes, qoǵamnyń senimine ie bolý ekenin atap ótti.
«Bizdiń maqsat — sandardyń sońynan qýý emes. Bizdiń kúresimiz — halyqtyń senimi úshin. Zań — jai qaǵaz júzindegi talap emes, kúndelikti ómir súrý normasyna ainalýy tiis. Bul orta — qaýipsiz, ádiletti ári senimdi bolý úshin biz qoǵammen birge jumys isteýimiz kerek», – dedi Timýr Hasanov brifing sońynda.
