Қостанайда өткен брифингте Экономикалық тергеу департаментінің басшысы Тимур Хасанов өңірдегі қаржы саласындағы заң бұзушылықтар мен оларды болдырмау бойынша қабылданып жатқан шаралар туралы баяндады,- деп хабарлайды Dalanews.kz

Оның айтуынша, биыл облыста қаржы пирамидаларына қатысты 6 қылмыстық іс тіркелген. Келтірілген шығын 88 миллион теңгеден асқан. Алайда зардап шеккен азаматтарға қайтарылған қаражат көлемі небәрі 18 миллион теңге. Ұйымдастырушылардың кейбірі іздеуде, олардың бірқатары шетелге қашқан.

«Бұл — тек сандар емес, адамдардың үміті мен тағдыры. Біз тергеумен қатар алдын алу шараларына баса мән береміз», – деді Тимур Хасанов.

Оның айтуынша, жыл басында қаржылық сауаттылықты арттыруға арналған студенттік форум өтіп, 1 000-нан астам қатысушы қамтылған. Сонымен қатар облыстағы 400-ге жуық мектепте 51 мыңнан астам оқушыға қаржылық қауіпсіздік тақырыбында түсіндіру жұмыстары жүргізілген. Бұл – республика бойынша ең жоғары көрсеткіш.

Брифинг барысында заңсыз микрокредит ұйымдары мәселесі де көтерілді. Хасановтың айтуынша, кейбір көлеңкелі ұйымдар лицензиясыз жұмыс істеп, халыққа 120%-ға дейінгі өсіммен несие беріп келген. Мысалы, бір зейнеткер 13 миллион теңгеге келісіп, қолына тек 6 миллион алған. Оның үйі кепілге қойылған. Қазіргі уақытта бұл бағытта бірнеше іс бойынша тергеу жалғасып жатыр, 150 миллион теңгеден астам мүлікке тыйым салынған.

Департамент сондай-ақ заңсыз никотин өнімдеріне қарсы күрес жүргізіп жатыр. Биылдың өзінде 2 300-ден астам электронды вейп пен басқа да никотин өнімдері тәркіленген. Бірнеше қылмыстық іс қозғалып, қоймалар мен көліктерге тыйым салынған.

«Бұл — тек заң бұзушылықпен күрес емес. Бұл – ұлттың денсаулығы үшін күрес. Әсіресе балаларды қорғау – барлығымыздың ортақ міндетіміз», – деді Хасанов.

Брифинг соңында ол департаменттің басты мақсаты – тек көрсеткіштер үшін жұмыс істеу емес, қоғамның сеніміне ие болу екенін атап өтті.

«Біздің мақсат — сандардың соңынан қуу емес. Біздің күресіміз — халықтың сенімі үшін. Заң — жай қағаз жүзіндегі талап емес, күнделікті өмір сүру нормасына айналуы тиіс. Бұл орта — қауіпсіз, әділетті әрі сенімді болу үшін біз қоғаммен бірге жұмыс істеуіміз керек», – деді Тимур Хасанов брифинг соңында.