Ázir keseldiń kesirinen aýrýhanaǵa jatqyzylǵandar úiine qaita bastaǵan. Degenmen emdeý mekemelerinde em qabyldap jatqandar áli bar. Qytaidan kelgen bul naýqastar úshinshi ret arnaiy zertteýden ótkizilmek.
Dúniejúzilik densaýlyq saqtaý uiymynyń standartyna sai elimizdegi mamandar koronavirýsti anyqtaityn testti qoldanysqa engizip, tiimdiligin baiqaýda.
Reseilikterdiń testimen zertteýler sáikes kelgen. Alaida Densaýlyq saqtaý ministrliginiń áli de kúdigi basym. Sol sebepti, Qytaidan keletin testerdi kútip otyrǵandary belgili boldy.
Al koronavirýsty aiǵaqtap beretin test ministr Eljan Birtanovtiń aitýynsha, arzan emes. Sondyqtan, ony kim kóringenge jasai berýge de bolmaidy. Tekserilý úshin aýrýdyń belgileri baiqalýy tiis.
– Atalǵan zertteý adamda aýrý belgisi anyqtalǵanda ǵana jasalady. Dene qyzýy, jótelý syndy belgiler adamdardyń 99 paiyzynda kádimgi tumaý bolyp shyǵýda.
Qytaidan kelgen adamdy tolyq tekserýden ótkize berýge negiz joq.
Koronavirýsqa shaldyqqan adamdy tez arada tekserip, bes-alty saǵat ishinde diagnozyn anyqtaýǵa bolady. Biz 18 million halyqqa analiz jasai almaimyz. Qajettilik te joq, – dep Eljan Birtanov óz oiyn ortaǵa saldy.
Virýstyń órshýine bailanysty Qazaqstan Qytaimen aradaǵy barlyq qatynasqa shekteý qoiǵany belgiil. Degenmen áýejai, avto jáne temirjol vokzaldarynda jolaýshylar áli de tekserilýde.
Máselen, Resei jáne Qyrǵyzstanmen aradaǵy keden beketterinde sanitarlar júr. Elimizdiń bas dárigeri kórshi eldermen shekaralardy eshqandai kúsheitilgen sanitarlyq rejimge kóshirýdiń qajeti joq dep sanaidy.
– Eýraziialyq odaq shartyna sáikes, Qazaqstan Qyrǵyzstanmen jáne Reseimen shekarany baqylamaidy. Bul elder jaǵdaiy qolaisyz elderge jatpaidy. Ol jerde kedendik jáne shekaralyq baqylaý jumys isteidi. Biz odaq aiasynda biryńǵai kedendik aimaq bolǵandyqtan, shekarada kúsheitilgen sanitarlyq baqylaý engizýdiń qajeti joq, – dedi ministr.
6-shy qańtardan beri Qytaidan elimizge 30 myńnan astam adam kelgen. Onyń 29 myńy – qazaqstandyqtar. Búginde statsionarlarda 33 naýqas jatyr. Olardan koronavirýstyń belgisi anyqtalmasa da, dárigerler em-dom jasaýdy jalǵastyrýda.
– Qazir 33 adam aýrýhanada qaldy. Al 61 adam statsionardan shyǵaryldy. Kún saiyn aýrýhanadan shyqqandardyń sany artýda. Barlyq aýrýhanadan alynǵan synamalar qosymsha baqylaný úshin Almatydaǵy Ulttyq ǵylymi erekshe juqpaly aýrýlar ortalyǵyna jiberiledi, – deidi QR Densaýlyq saqtaý ministrliginiń resmi ókili Dias Ahmetshárip.
Al elordaǵa arnaiy áýe bortymen Ýhannan jetkizilgen stýdentter infektsiiaǵa qarsy kópsalaly aýrýhanada jatyr. Karantinde jatqandardyń jaǵdaiy jaqsy. Bárine jeke zattary men telefondary sanitarlyq óńdeýden ótkizilip, berilgen.
Ministr Birtanov jalpy koronavirýs indetinen shoshynǵan jurtty dúrlikpei, sabyr etýge shaqyrdy. Elimizde aýrýdyń tirkelmegenin aitqan ol keselge qarsy turýǵa saqadai-sai ekenin tilge tiek etti.
