ءازىر كەسەلدىڭ كەسىرىنەن اۋرۋحاناعا جاتقىزىلعاندار ۇيىنە قايتا باستاعان. دەگەنمەن ەمدەۋ مەكەمەلەرىندە ەم قابىلداپ جاتقاندار ءالى بار. قىتايدان كەلگەن بۇل ناۋقاستار ءۇشىنشى رەت ارنايى زەرتتەۋدەن وتكىزىلمەك.
دۇنيەجۇزىلىك دەنساۋلىق ساقتاۋ ۇيىمىنىڭ ستاندارتىنا ساي ەلىمىزدەگى ماماندار كوروناۆيرۋستى انىقتايتىن تەستتى قولدانىسقا ەنگىزىپ، تيىمدىلىگىن بايقاۋدا.
رەسەيلىكتەردىڭ تەستىمەن زەرتتەۋلەر سايكەس كەلگەن. الايدا دەنساۋلىق ساقتاۋ مينيسترلىگىنىڭ ءالى دە كۇدىگى باسىم. سول سەبەپتى، قىتايدان كەلەتىن تەستەردى كۇتىپ وتىرعاندارى بەلگىلى بولدى.
ال كوروناۆيرۋستى ايعاقتاپ بەرەتىن تەست مينيستر ەلجان ءبىرتانوۆتىڭ ايتۋىنشا، ارزان ەمەس. سوندىقتان، ونى كىم كورىنگەنگە جاساي بەرۋگە دە بولمايدى. تەكسەرىلۋ ءۇشىن اۋرۋدىڭ بەلگىلەرى بايقالۋى ءتيىس.
– اتالعان زەرتتەۋ ادامدا اۋرۋ بەلگىسى انىقتالعاندا عانا جاسالادى. دەنە قىزۋى، جوتەلۋ سىندى بەلگىلەر ادامداردىڭ 99 پايىزىندا كادىمگى تۇماۋ بولىپ شىعۋدا.
قىتايدان كەلگەن ادامدى تولىق تەكسەرۋدەن وتكىزە بەرۋگە نەگىز جوق.
كوروناۆيرۋسقا شالدىققان ادامدى تەز ارادا تەكسەرىپ، بەس-التى ساعات ىشىندە دياگنوزىن انىقتاۋعا بولادى. ءبىز 18 ميلليون حالىققا اناليز جاساي المايمىز. قاجەتتىلىك تە جوق، – دەپ ەلجان ءبىرتانوۆ ءوز ويىن ورتاعا سالدى.
ۆيرۋستىڭ ورشۋىنە بايلانىستى قازاقستان قىتايمەن اراداعى بارلىق قاتىناسقا شەكتەۋ قويعانى بەلگىىل. دەگەنمەن اۋەجاي، اۆتو جانە تەمىرجول ۆوكزالدارىندا جولاۋشىلار ءالى دە تەكسەرىلۋدە.
ماسەلەن، رەسەي جانە قىرعىزستانمەن اراداعى كەدەن بەكەتتەرىندە سانيتارلار ءجۇر. ەلىمىزدىڭ باس دارىگەرى كورشى ەلدەرمەن شەكارالاردى ەشقانداي كۇشەيتىلگەن سانيتارلىق رەجىمگە كوشىرۋدىڭ قاجەتى جوق دەپ سانايدى.
– ەۋرازيالىق وداق شارتىنا سايكەس، قازاقستان قىرعىزستانمەن جانە رەسەيمەن شەكارانى باقىلامايدى. بۇل ەلدەر جاعدايى قولايسىز ەلدەرگە جاتپايدى. ول جەردە كەدەندىك جانە شەكارالىق باقىلاۋ جۇمىس ىستەيدى. ءبىز وداق اياسىندا ءبىرىڭعاي كەدەندىك ايماق بولعاندىقتان، شەكارادا كۇشەيتىلگەن سانيتارلىق باقىلاۋ ەنگىزۋدىڭ قاجەتى جوق، – دەدى مينيستر.
6-شى قاڭتاردان بەرى قىتايدان ەلىمىزگە 30 مىڭنان استام ادام كەلگەن. ونىڭ 29 مىڭى – قازاقستاندىقتار. بۇگىندە ستاسيونارلاردا 33 ناۋقاس جاتىر. ولاردان كوروناۆيرۋستىڭ بەلگىسى انىقتالماسا دا، دارىگەرلەر ەم-دوم جاساۋدى جالعاستىرۋدا.
– ءقازىر 33 ادام اۋرۋحانادا قالدى. ال 61 ادام ستاسيوناردان شىعارىلدى. كۇن سايىن اۋرۋحانادان شىققانداردىڭ سانى ارتۋدا. بارلىق اۋرۋحانادان الىنعان سىنامالار قوسىمشا باقىلانۋ ءۇشىن الماتىداعى ۇلتتىق عىلىمي ەرەكشە جۇقپالى اۋرۋلار ورتالىعىنا جىبەرىلەدى، – دەيدى ق ر دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپ.
ال ەلورداعا ارنايى اۋە بورتىمەن ۋحاننان جەتكىزىلگەن ستۋدەنتتەر ينفەكسياعا قارسى كوپسالالى اۋرۋحانادا جاتىر. كارانتيندە جاتقانداردىڭ جاعدايى جاقسى. بارىنە جەكە زاتتارى مەن تەلەفوندارى سانيتارلىق وڭدەۋدەن وتكىزىلىپ، بەرىلگەن.
مينيستر ءبىرتانوۆ جالپى كوروناۆيرۋس ىندەتىنەن شوشىنعان جۇرتتى دۇرلىكپەي، سابىر ەتۋگە شاقىردى. ەلىمىزدە اۋرۋدىڭ تىركەلمەگەنىن ايتقان ول كەسەلگە قارسى تۇرۋعا ساقاداي-ساي ەكەنىن تىلگە تيەك ەتتى.
