Kúni keshe Reseige qarsy AQSh-tyń engizgen kezekti sanktsiiasynan keiin birqatar elderde, sonyń ishinde Qazaqstanda da reseilik Gazprombanktyń banktik kartasyna qyzmet kórsetý toqtatyldy, dep habarlaidy Dalanews.kz.
Bul arada banktiń halyqaralyq, iaǵni Qytaidyń tólem júiesinde tirkelgen UnionPay kartasy týraly sóz bolyp otyr.
Reseilik BAQ málimetterinshe, bankomattan aqsha alýǵa tyrysqanda, tehnikalyq qate nemese kartaǵa atalǵan bank qyzmet kórsetpeitini týraly eskertý habarlama shyǵady.
Astanada birqatar bank Gazprombanktyń UnionPay kartasyna qyzmet kórsetýdi toqtatqan. Tipti, onymen dúkenderde de saýda jasaý múmkin bolmai qalǵan, dep jazady exclusive.kz.
Sondai-aq bul karta BAÁ, Tailand, Túrkiia, Qatar, Vetnam, Germaniia jáne Majarstan da istemei tur.
Sondai-aq mobildi júielerge arnalǵan App Store dúkeninen de Gazprombank joǵalyp ketkeni aitylýda. Al Túrkiiada iPhone-ǵa júktelgen bank qosymshasy da ashylmaidy. "Bul versiia joiylǵan" dep shyǵady bank qosymshasyn ashýǵa tyrysqanda.
Aita ketsek, 20 qarashada AQSh jariialaǵan sanktsiiaǵa Gazprombankpen qatar onyń jaqyn elderdegi ókildikteri men sheteldik alty enshiles kompaniiasy da ilindi. Ókildikteri qatarynda Qytai, Mońǵoliia, Úndistanmen birge Qazaqstandaǵysy da bar. Al enshiles kompaniialary Liýksembýrgte, Gonkongta, Shveitsariiada, Ońtústik Afrikada jáne ekeýi Kiprda ornalasqan.
Odan bólek halyqaralyq bailanysy bar 50 reseilik bank, baǵaly qaǵazdardy tirkeýshi reseilik 40 uiym, qarjy salasyndaǵy 15 sheneýnik te sanktsiiaǵa ilindi. Olardyń barlyǵy AQSh-tyń Sheteldik aktivterdi baqylaý basqarmasynyń (OFAC) veb-saityndaǵy tizimge engizildi.
21 qarashada Gazprombank óz kartasyn ustaýshylardyń telefonyna habarlama jibere bastady. Iaǵni, olarǵa múmkindik bolsa, kartadaǵy aqshalaryn sheship alýdy eskertken.
"21 qarashadan bastap shetelde Union Pay júiesindegi kartamen tólem jasaýda qiyndyqtar týyndaýy múmkin. Eger siz shetelde bolsańyz, onda qolma-qol aqshany paidalanýǵa keńes beremiz", delingen bank habarlamasynda.
Gazprombanktiń búgingi kúnge deiin sanktsiiaǵa ilinbei kelgen sebebi, ol sheteldiktermen arada tólem jasaý úshin kerek bolyp kelgen. Ásirese, Eýropaǵa tabiǵi gaz tasymalynda mańyzdy ról atqarady. Biraq sońǵy jyldary Batys Resei gazyna táýeldilikten arylý úshin birqatar sharalar qabyldap, import kólemin 18%-ǵa deiin qysqartýǵa qol jetkizdi.
