كۇنى كەشە رەسەيگە قارسى اقش-تىڭ ەنگىزگەن كەزەكتى سانكسياسىنان كەيىن ءبىرقاتار ەلدەردە، سونىڭ ىشىندە قازاقستاندا دا رەسەيلىك گازپرومبانكتىڭ بانكتىك كارتاسىنا قىزمەت كورسەتۋ توقتاتىلدى، دەپ حابارلايدى Dalanews.kz.

بۇل ارادا بانكتىڭ حالىقارالىق، ياعني قىتايدىڭ تولەم جۇيەسىندە تىركەلگەن UnionPay كارتاسى تۋرالى ءسوز بولىپ وتىر.

رەسەيلىك ب ا ق مالىمەتتەرىنشە، بانكوماتتان اقشا الۋعا تىرىسقاندا، تەحنيكالىق قاتە نەمەسە كارتاعا اتالعان بانك قىزمەت كورسەتپەيتىنى تۋرالى ەسكەرتۋ حابارلاما شىعادى.

استانادا ءبىرقاتار بانك گازپرومبانكتىڭ UnionPay كارتاسىنا قىزمەت كورسەتۋدى توقتاتقان. ءتىپتى، ونىمەن دۇكەندەردە دە ساۋدا جاساۋ مۇمكىن بولماي قالعان، دەپ جازادى exclusive.kz.

سونداي-اق بۇل كارتا ءباا، تايلاند، تۇركيا، قاتار، ۆەتنام، گەرمانيا جانە ماجارستان دا ىستەمەي تۇر. 

سونداي-اق ءموبيلدى جۇيەلەرگە ارنالعان App Store دۇكەنىنەن دە گازپرومبانك جوعالىپ كەتكەنى ايتىلۋدا. ال تۇركيادا iPhone-عا جۇكتەلگەن بانك قوسىمشاسى دا اشىلمايدى. "بۇل ۆەرسيا جويىلعان" دەپ شىعادى بانك قوسىمشاسىن اشۋعا تىرىسقاندا.

ايتا كەتسەك، 20 قاراشادا اقش جاريالاعان سانكسياعا گازپرومبانكپەن قاتار ونىڭ جاقىن ەلدەردەگى وكىلدىكتەرى مەن شەتەلدىك التى ەنشىلەس كومپانياسى دا ءىلىندى. وكىلدىكتەرى قاتارىندا جۇڭگو، موڭعوليا، ۇندىستانمەن بىرگە قازاقستانداعىسى دا بار. ال ەنشىلەس كومپانيالارى ليۋكسەمبۋرگتە، گونكونگتا، شۆەيساريادا، وڭتۇستىك افريكادا جانە ەكەۋى كيپردا ورنالاسقان. 

ودان بولەك حالىقارالىق بايلانىسى بار 50 رەسەيلىك بانك، باعالى قاعازداردى تىركەۋشى رەسەيلىك 40 ۇيىم، قارجى سالاسىنداعى 15 شەنەۋنىك تە سانكسياعا ءىلىندى. ولاردىڭ بارلىعى اقش-تىڭ شەتەلدىك اكتيۆتەردى باقىلاۋ باسقارماسىنىڭ (OFAC) ۆەب-سايتىنداعى تىزىمگە ەنگىزىلدى. 

21 قاراشادا گازپرومبانك ءوز كارتاسىن ۇستاۋشىلاردىڭ تەلەفونىنا حابارلاما جىبەرە باستادى. ياعني، ولارعا مۇمكىندىك بولسا، كارتاداعى اقشالارىن شەشىپ الۋدى ەسكەرتكەن.

"21 قاراشادان باستاپ شەتەلدە Union Pay جۇيەسىندەگى كارتامەن تولەم جاساۋدا قيىندىقتار تۋىنداۋى مۇمكىن. ەگەر ءسىز شەتەلدە بولساڭىز، وندا قولما-قول اقشانى پايدالانۋعا كەڭەس بەرەمىز"، دەلىنگەن بانك حابارلاماسىندا. 

گازپرومبانكتىڭ بۇگىنگى كۇنگە دەيىن سانكسياعا ىلىنبەي كەلگەن سەبەبى، ول شەتەلدىكتەرمەن ارادا تولەم جاساۋ ءۇشىن كەرەك بولىپ كەلگەن. اسىرەسە، ەۋروپاعا تابيعي گاز تاسىمالىندا ماڭىزدى ءرول اتقارادى. ءبىراق سوڭعى جىلدارى باتىس رەسەي گازىنا تاۋەلدىلىكتەن ارىلۋ ءۇشىن ءبىرقاتار شارالار قابىلداپ، يمپورت كولەمىن 18%-عا دەيىن قىسقارتۋعا قول جەتكىزدى.