Qazaqstan halqynyń birligi kúnine orai «AMANAT» partiiasy Memleket basshysynyń «Taza Qazaqstan» jalpyhalyqtyq bastamasy aiasynda aýqymdy «Birlik aǵashy» ekologiialyq aktsiiasyn uiymdastyrdy. Elimizdiń barlyq óńirin qamtyǵan tazalyq is-sharasy onmyńdaǵan azamattyń basyn qosty. Kaspii teńiziniń jaǵalaýynan bastap, Ile Alataýynyń shatqaldaryna deiin kóshe men aýla, tarihi eskertkishter men tabiǵi aýmaqtar tazalandy.
Aktsiiaǵa elimizdegi partiia belsendileri men jaqtastary, Qazaqstan halqy Assambleiasynyń ókilderi, máslihat depýtattary, «Jastar Rýhy» jastar qanatynyń músheleri jáne tabiǵatqa beijai qaramaityn azamattar qatysty.
Astanada partiianyń Atqarýshy hatshysy Dáýlet Káribek «Jastar Rýhynyń» múshelerimen birge Beibarys Sultan kóshesiniń boiyna aǵash ekti. Ol atalǵan is-sharanyń Qazaqstan halqynyń birligi kúnine orai uiymdastyrylýynyń máni men mańyzyna toqtaldy.
– Partiiamyz Memleket basshysy bastamashylyq etken «Taza Qazaqstan» jobasyna alǵashqy kúnnen bastap belsendi atsalysyp keledi. «AMANAT» partiiasynyń muryndyq bolýymen elimizdiń barlyq óńirinde ótkiziletin «Taza beisenbi» ekologiialyq aktsiiasy bir jarym jyldan astam ýaqyttan beri úzdiksiz jalǵasyn tabýda. Biyl bul igi is-shara Qazaqstan halqynyń birligi kúnimen jáne Assambleianyń 30 jyldyǵymen tuspa-tus kelip otyr. «Birlik aǵashy» arqyly biz ortaq eńbektiń, azamattyq ustanym men yntymaqtyń úlgisin kórsetemiz. Prezident Qasym-Jomart Toqaev aityp ótkendei, «Taza Qazaqstan» – bul tek ekologiialyq naýqan emes, bul – ómir salty. Tazalyq tek qana ainalamyzda emes, oiymyz ben sanamyzda da bolýy qajet, – dedi ol.
Aqtaýdaǵy Kaspii teńiziniń jaǵalaýynda ótken tazalyq aktsiiasyna 100-ge jýyq adam qatysty. 14-shaǵynaýdan jaǵalaýyndaǵy qoqystar jinalyp, jazǵy maýsymǵa daiyndyq júrgizildi.
Almaty qalasynda tazalyq jumysy Býtakov shatqalynda ótti. Tań biline qoldaryna qolǵap pen qap ustap shyqqan partiialastar, «Jastar Rýhy» jastar qanatynyń músheleri jáne ekologtar, iaǵni bas-aiaǵy 50-den astam belsendi tabiǵatty qoqystan tazartty.
Petropavl qalasynda tazalyq jumysy Uly Otan soǵysynda qaza tapqan jaýyngerlerge arnalǵan eskertkish mańynda ótti. Eski qalalyq zirattaǵy memorialdyń ainalasy retke keltirilip, tazartyldy. Sonymen qatar eskertkish qaita boialyp, tarihi oryn qaita qalpyna keltirildi. Bul – urpaqtar sabaqtastyǵy men birliktiń jarqyn kórinisi.
Shymkent qalasynda da aýqymdy tazalyq jumysy qolǵa alyndy. Abai atyndaǵy saiabaqta ornalasqan Dańq memorialynda «Jastar Rýhynyń» músheleri batyrlarǵa taǵzym etip, patriottyq tárbie men ekologiialyq mádeniet úndestiginiń mańyzyn atap ótti. Aita keteiik, bul jer Jeńistiń 80 jyldyǵyn atap ótetin negizgi oryndardyń birine ainalmaq.
Jalpy, «Taza Qazaqstan» bastamasy qolǵa alynǵannan beri igi iske 4 millionnan astam adam qatysty. Osylaisha, 1,5 million tonnadan astam qoqys jinalyp, 3,3 millionnan astam aǵash egildi. Al «Taza beisenbi» aktsiiasy aiasynda el aýmaǵynda 1000-nan astam lastanǵan aýmaq tazartylyp, 70 myńnan astam azamattyń qatysýymen 120 myń tonna qoqys jinaldy.
Osyndai igi bastamalar – el birliginiń, azamattyq belsendilik pen ortaq jaýapkershiliktiń jarqyn úlgisi.
