قازاقستان حالقىنىڭ بىرلىگى كۇنىنە وراي «AMANAT» پارتياسى مەملەكەت باسشىسىنىڭ «تازا قازاقستان» جالپىحالىقتىق باستاماسى اياسىندا اۋقىمدى «بىرلىك اعاشى» ەكولوگيالىق اكسياسىن ۇيىمداستىردى. ەلىمىزدىڭ بارلىق ءوڭىرىن قامتىعان تازالىق ءىس-شاراسى ونمىڭداعان ازاماتتىڭ باسىن قوستى. كاسپيي تەڭىزىنىڭ جاعالاۋىنان باستاپ، ىلە الاتاۋىنىڭ شاتقالدارىنا دەيىن كوشە مەن اۋلا، تاريحي ەسكەرتكىشتەر مەن تابيعي اۋماقتار تازالاندى.
اكسياعا ەلىمىزدەگى پارتيا بەلسەندىلەرى مەن جاقتاستارى، قازاقستان حالقى اسسامبلەياسىنىڭ وكىلدەرى، ءماسليحات دەپۋتاتتارى، «جاستار رۋحى» جاستار قاناتىنىڭ مۇشەلەرى جانە تابيعاتقا بەيجاي قارامايتىن ازاماتتار قاتىستى.
استانادا پارتيانىڭ اتقارۋشى حاتشىسى داۋلەت كارىبەك «جاستار رۋحىنىڭ» مۇشەلەرىمەن بىرگە بەيبارىس سۇلتان كوشەسىنىڭ بويىنا اعاش ەكتى. ول اتالعان ءىس-شارانىڭ قازاقستان حالقىنىڭ بىرلىگى كۇنىنە وراي ۇيىمداستىرىلۋىنىڭ ءمانى مەن ماڭىزىنا توقتالدى.
– پارتيامىز مەملەكەت باسشىسى باستاماشىلىق ەتكەن «تازا قازاقستان» جوباسىنا العاشقى كۇننەن باستاپ بەلسەندى اتسالىسىپ كەلەدى. «AMANAT» پارتياسىنىڭ مۇرىندىق بولۋىمەن ەلىمىزدىڭ بارلىق وڭىرىندە وتكىزىلەتىن «تازا بەيسەنبى» ەكولوگيالىق اكسياسى ءبىر جارىم جىلدان استام ۋاقىتتان بەرى ۇزدىكسىز جالعاسىن تابۋدا. بيىل بۇل يگى ءىس-شارا قازاقستان حالقىنىڭ بىرلىگى كۇنىمەن جانە اسسامبلەيانىڭ 30 جىلدىعىمەن تۇسپا-تۇس كەلىپ وتىر. «بىرلىك اعاشى» ارقىلى ءبىز ورتاق ەڭبەكتىڭ، ازاماتتىق ۇستانىم مەن ىنتىماقتىڭ ۇلگىسىن كورسەتەمىز. پرەزيدەنت قاسىم-جومارت توقايەۆ ايتىپ وتكەندەي، «تازا قازاقستان» – بۇل تەك ەكولوگيالىق ناۋقان ەمەس، بۇل – ءومىر سالتى. تازالىق تەك قانا اينالامىزدا ەمەس، ويىمىز بەن سانامىزدا دا بولۋى قاجەت، – دەدى ول.
اقتاۋداعى كاسپيي تەڭىزىنىڭ جاعالاۋىندا وتكەن تازالىق اكسياسىنا 100-گە جۋىق ادام قاتىستى. 14-شاعىناۋدان جاعالاۋىنداعى قوقىستار جينالىپ، جازعى ماۋسىمعا دايىندىق جۇرگىزىلدى.
الماتى قالاسىندا تازالىق جۇمىسى بۋتاكوۆ شاتقالىندا ءوتتى. تاڭ بىلىنە قولدارىنا قولعاپ پەن قاپ ۇستاپ شىققان پارتيالاستار، «جاستار رۋحى» جاستار قاناتىنىڭ مۇشەلەرى جانە ەكولوگتار، ياعني باس-اياعى 50-دەن استام بەلسەندى تابيعاتتى قوقىستان تازارتتى.
پەتروپاۆل قالاسىندا تازالىق جۇمىسى ۇلى وتان سوعىسىندا قازا تاپقان جاۋىنگەرلەرگە ارنالعان ەسكەرتكىش ماڭىندا ءوتتى. ەسكى قالالىق زيراتتاعى مەموريالدىڭ اينالاسى رەتكە كەلتىرىلىپ، تازارتىلدى. سونىمەن قاتار ەسكەرتكىش قايتا بويالىپ، تاريحي ورىن قايتا قالپىنا كەلتىرىلدى. بۇل – ۇرپاقتار ساباقتاستىعى مەن بىرلىكتىڭ جارقىن كورىنىسى.
شىمكەنت قالاسىندا دا اۋقىمدى تازالىق جۇمىسى قولعا الىندى. اباي اتىنداعى ساياباقتا ورنالاسقان داڭق مەموريالىندا «جاستار رۋحىنىڭ» مۇشەلەرى باتىرلارعا تاعزىم ەتىپ، پاتريوتتىق تاربيە مەن ەكولوگيالىق مادەنيەت ۇندەستىگىنىڭ ماڭىزىن اتاپ ءوتتى. ايتا كەتەيىك، بۇل جەر جەڭىستىڭ 80 جىلدىعىن اتاپ وتەتىن نەگىزگى ورىنداردىڭ بىرىنە اينالماق.
جالپى، «تازا قازاقستان» باستاماسى قولعا الىنعاننان بەرى يگى ىسكە 4 ميلليوننان استام ادام قاتىستى. وسىلايشا، 1،5 ميلليون توننادان استام قوقىس جينالىپ، 3،3 ميلليوننان استام اعاش ەگىلدى. ال «تازا بەيسەنبى» اكسياسى اياسىندا ەل اۋماعىندا 1000-نان استام لاستانعان اۋماق تازارتىلىپ، 70 مىڭنان استام ازاماتتىڭ قاتىسۋىمەن 120 مىڭ توننا قوقىس جينالدى.
وسىنداي يگى باستامالار – ەل بىرلىگىنىڭ، ازاماتتىق بەلسەندىلىك پەن ورتاق جاۋاپكەرشىلىكتىڭ جارقىن ۇلگىسى.
